ചൂടുദോശയും ആവിപറക്കും ഓംലെറ്റും; ജയബാലേട്ടന്റെ രുചിക്കൂട്ടിൽ ഓർമ്മകൾ പങ്കുവെച്ച് ചിറ്റൂർ
ചേരാനല്ലൂർ ∙ ചുട്ടുപൊള്ളുന്ന ദോശയും ആവി പറക്കുന്ന ഓംലറ്റും പുഞ്ചിരിയോടെ വിളമ്പിയിരുന്ന ജയബാലേട്ടന്റെ തട്ടുകട ഇനി ഓർമ മാത്രം. കണ്ടെയ്നർ റോഡിലുണ്ടായ ദാരുണമായ അപകടത്തിൽ ജീവൻ നഷ്ടപ്പെട്ട ജയബാലകൃഷ്ണൻ, ചിറ്റൂരുകാർക്ക് മാത്രമല്ല, ആ വഴി കടന്നുപോകുന്ന യാത്രക്കാർക്കെല്ലാം പ്രിയങ്കരനായ ഒരാളായിരുന്നു. പണത്തിന് ബുദ്ധിമുട്ടുള്ളവരാണെങ്കിൽ പോലും ആരുടെയും വയറു നിറയ്ക്കാൻ മടി കാണിക്കാത്ത വലിയ മനസ്സിന് ഉടമയായിരുന്നു ജയബാലേട്ടനെന്ന് വാർഡ് അംഗവും പഞ്ചായത്ത് പ്രസിഡന്റുമായ ലിസി വാര്യത്ത് അനുസ്മരിക്കുന്നു.
ചിറ്റൂർ അമ്പലത്തിന് സമീപത്തായി പത്ത് വർഷം മുൻപാണ് അദ്ദേഹം ഈ ചെറിയ ഭക്ഷണശാല ആരംഭിച്ചത്. രുചികരമായ ദോശയും ചമ്മന്തിയും ഓംലറ്റും ആയിരുന്നു ഇവിടുത്തെ പ്രധാന ആകർഷണം. വളരെ ചെറിയൊരു തട്ടുകടയായിരുന്നിട്ടും, ഒരിക്കൽ ഭക്ഷണം കഴിച്ചവർ വീണ്ടും ജയബാലകൃഷ്ണന്റെ കൈപ്പുണ്യം തേടി എത്തിയിരുന്നുവെന്ന് നാട്ടുകാർ സാക്ഷ്യപ്പെടുത്തുന്നു.
അതേസമയം, വാഹനം ഓടിച്ച പതിനേഴുകാരനെ ആദ്യം സ്റ്റേഷൻ ജാമ്യത്തിലും പിന്നീട് ജുവനൈൽ ജസ്റ്റിസ് ബോർഡ് വഴിയും വിട്ടയച്ചത് ഉന്നതതല ഇടപെടലുകൾ മൂലമാണെന്ന ആരോപണം ശക്തമാണ്. പ്രതിയുടെ പിതാവായ ജഡ്ജിക്കെതിരെ നിയമനടപടികൾ സ്വീകരിച്ചുവെന്ന് പോലീസ് അവകാശപ്പെട്ടെങ്കിലും, ഇതുമായി ബന്ധപ്പെട്ട കൃത്യമായ രേഖകളൊന്നും ഹാജരാക്കാൻ അവർക്കായില്ല. ഇതിൽ പ്രതിഷേധിച്ചാണ് ജയബാലകൃഷ്ണന്റെ മക്കളും ബന്ധുക്കളും പോലീസ് സ്റ്റേഷന് മുന്നിൽ സമരവുമായി രംഗത്തെത്തിയത്.
