ഇന്ത്യയില്‍ വിറ്റഴിക്കുന്നവയില്‍ പകുതിയും വ്യാജന്‍; വ്യാജ ഉല്‍പ്പന്നങ്ങളുടെ തലസ്ഥാനമായി ഹൈദരാബാദ്, തട്ടിപ്പ് തിരിച്ചറിയാം

Top Cities With Fake Goods In India: ഇന്ത്യയില്‍ വ്യാജ ഉല്‍പ്പന്നങ്ങള്‍ പെരുകുന്നുവെന്ന് റിപ്പോര്‍ട്ട്. അറിയാതെ പോലും നമ്മളില്‍ ഭൂരിഭാഗവും വ്യാജ ഉല്‍പ്പന്നങ്ങളുടെ ഇരയാകുന്നുണ്ടെന്നാണ് കണക്കുകള്‍ പറയുന്നത്. കഷ്ടപ്പെട്ട് ഉണ്ടാക്കുന്ന പണവും ആരോഗ്യവും ഒരുപോലെ സംരക്ഷിക്കാന്‍ വ്യാജന്മാരെ തിരിച്ചറിയേണ്ടതുണ്ട്. നിങ്ങള്‍ ഓരോ സാധനങ്ങള്‍ വാങ്ങുമ്പോഴും ഏറെ ജാഗ്രത പാലിക്കേണ്ടതുണ്ടെന്ന് ASPA- CRISIL State of Counterfeiting in India 2025 റിപ്പോര്‍ട്ട് വ്യക്തമാക്കുന്നു.ഹൈദരാബാദ് വ്യാജന്‍മാരുടെ തലസ്ഥാനംഇന്ത്യക്കാരായ ഉപഭോക്താക്കളില്‍ 89 ശതമാനം പേരും ജീവിതത്തില്‍ ഒരിക്കലെങ്കിലും വ്യാജ ഉല്‍പ്പന്നങ്ങള്‍ (Fake, Counterfeit products) വാങ്ങിയിട്ടുണ്ടെന്ന് പഠനം വ്യക്തമാക്കുന്നു. കഴിഞ്ഞ ഒരു വര്‍ഷത്തിനിടെ ഏറ്റവും കൂടുതല്‍ ആളുകള്‍ വ്യാജ ഉല്‍പ്പന്നങ്ങള്‍ വാങ്ങിയതായി കണ്ടെത്തിയത് ഹൈദരാബാദിലാണ് (46%). തൊട്ടുപിന്നില്‍ ചെന്നൈയും (39%) ബംഗളൂരുവും (33%) ആണ്.കൂടുതല്‍ വ്യാജന്‍ ഈ മേഖലകളില്‍വസ്ത്രങ്ങള്‍ (34%), ഇലക്ട്രോണിക്‌സ് ഉപകരണങ്ങള്‍ (31%), ആരോഗ്യ സംരക്ഷണ ഉല്‍പ്പന്നങ്ങള്‍ അഥവാ മരുന്നുകള്‍ (28%), എഫ്എംസിജി (25%), വാഹനങ്ങളുടെ പാര്‍ട്‌സുകള്‍ എന്നിവയിലാണ് വ്യാജ ഉല്‍പ്പന്നങ്ങള്‍ ഏറ്റവും കൂടുതല്‍ വിറ്റഴിക്കപ്പെടുന്നതെന്നും റിപ്പോര്‍ട്ട് വ്യക്തമാക്കുന്നു.കഴിഞ്ഞ ഒരു വര്‍ഷത്തിനിടെ തങ്ങളുടെ പ്രദേശത്ത് വ്യാജ ഉല്‍പ്പന്നങ്ങളുടെ വില്‍പ്പന വര്‍ദ്ധിച്ചതായി 74% ആളുകളും വിശ്വസിക്കുന്നു. പ്രാദേശിക വിപണികളില്‍ ലഭ്യമാകുന്നവയില്‍ 29 ശതമാനത്തോളം ഉല്‍പ്പന്നങ്ങളും. വ്യാജനാകാമെന്നും പഠനം കൂട്ടിച്ചേര്‍ക്കുന്നു.അജ്ഞതയും വിലക്കുറവുംപലരും ഇത്തരം വ്യാജന്‍മാരില്‍ കുടുങ്ങിപോകുന്നത് അജ്ഞതയും വിലക്കുറവും കൊണ്ടാണ്. ഉല്‍പ്പന്നം വാങ്ങുന്ന സമയത്തുള്ള അജ്ഞത കൊണ്ടാണ് തങ്ങള്‍ വ്യാജ ഉല്‍പ്പന്നങ്ങള്‍ വാങ്ങിയതെന്ന് 25% ആളുകളും സമ്മതിക്കുന്നു. ഇതിന് പുറമെ വിലക്കുറവും, അസല്‍ ഉല്‍പ്പന്നങ്ങള്‍ വിപണിയില്‍ പെട്ടെന്ന് ലഭ്യമല്ലാത്തതും ഇതിന് കാരണമായി മറ്റു ചിലര്‍ പറയുന്നു.ഭൂരിഭാഗം ആളുകളും (59% – 66%) പാക്കിങ്ങും, ബ്രാന്‍ഡിന്റെ പേരും മാത്രമാണ് സാധനങ്ങള്‍ വാങ്ങുമ്പോള്‍ ശ്രദ്ധിക്കുന്നത്. ഉല്‍പ്പന്നം യഥാര്‍ത്ഥമാണോ എന്നറിയാന്‍ ഹോളോഗ്രാം (34%), ക്യുആര്‍ കോഡ് (23%) തുടങ്ങിയ ഡിജിറ്റല്‍ സംവിധാനങ്ങള്‍ ഉപയോഗിക്കുന്നവര്‍ വളരെ കുറവാണ്.സാധാരണക്കാരെ ബാധിക്കുന്നത് എങ്ങനെഒറിജിനല്‍ ഉല്‍പ്പന്നങ്ങളുടെ അതേ വില നല്‍കി ഗുണനിലവാരമില്ലാത്ത വ്യാജ ഉല്‍പ്പന്നങ്ങള്‍ വാങ്ങുന്നത് പലര്‍ക്കും വലിയ സാമ്പത്തിക നഷ്ടമുണ്ടാക്കുന്നു.പലരും ഒറിജിനല്‍ ആണെന്ന് കരുതിയാണ് വ്യാജ ഉല്‍പ്പന്നങ്ങള്‍ ഉപയോഗിക്കുന്നത്. ഇത്തരം ഉല്‍പ്പന്നങ്ങള്‍ കേടാകുമ്പോള്‍ മാത്രമാണ് പലരും തങ്ങള്‍ക്കു പറ്റിയ അബദ്ധം മനസിലാക്കുന്നത്.വ്യാജ മരുന്നുകള്‍, സൗന്ദര്യവര്‍ദ്ധക വസ്തുക്കള്‍, ഭക്ഷ്യവസ്തുക്കള്‍ എന്നിവ ഉപയോഗിക്കുന്നത് അലര്‍ജികള്‍ക്കും മറ്റ് ഗുരുതരമായ ആരോഗ്യപ്രശ്‌നങ്ങള്‍ക്കും കാരണമാകുന്നുണ്ട്. വാഹനങ്ങളുടെ വ്യാജ സ്‌പെയര്‍ പാര്‍ട്‌സുകള്‍, നിലവാരമില്ലാത്ത ഇലക്ട്രോണിക് ഉപകരണങ്ങള്‍ എന്നിവ ഉപയോഗിക്കുന്നത് ഷോര്‍ട്ട് സര്‍ക്യൂട്ടിനും, മറ്റ് വലിയ അപകടങ്ങള്‍ക്കും വഴിവെക്കാം.ശ്രദ്ധിക്കേണ്ട കാര്യങ്ങള്‍ എന്തൊക്കെ കേവലം പാക്കിംഗ് കണ്ട് മാത്രം ഉല്‍പ്പന്നങ്ങള്‍ വാങ്ങരുത്. അതിലെ ഹോളോഗ്രാമുകള്‍, ക്യുആര്‍ കോഡുകള്‍, ബാച്ച് നമ്പര്‍, മാനുഫാക്ചറിംഗ് ഡേറ്റ് എന്നിവ ഉറപ്പുവരുത്തുക. ഉല്‍പ്പന്നങ്ങള്‍ എപ്പോഴും അംഗീകൃത ഡീലര്‍മാരില്‍ നിന്നോ, കമ്പനിയുടെ ഔദ്യോഗിക ഷോറൂമുകളില്‍ നിന്നോ മാത്രം വാങ്ങുക. ഓണ്‍ലൈന്‍ ഷോപ്പിംഗ് നടത്തുമ്പോള്‍ ‘Authorised Sellers’ ആണോ എന്ന് ഉറപ്പാക്കുക. മറ്റ് കടകളേക്കാളും, ഓണ്‍ലൈന്‍ സൈറ്റുകളേക്കാളും വലിയ ഡിസ്‌കൗണ്ടില്‍ സാധനങ്ങള്‍ വില്‍ക്കുന്നത് കണ്ടാല്‍ അത് വ്യാജനാകാന്‍ സാധ്യതയുണ്ടെന്ന് മനസിലാക്കുക. ബ്രാന്‍ഡിന്റെ പേരിലെ അക്ഷരത്തെറ്റുകള്‍, ലോഗോയിലെ ചെറിയ വ്യത്യാസങ്ങള്‍, പാക്കിംഗിലെ നിലവാരമില്ലായ്മ എന്നിവ കണ്ടാല്‍ അത്തരം സാധനങ്ങള്‍ ഒഴിവാക്കുക. സാധനങ്ങള്‍ വാങ്ങുമ്പോള്‍ കൃത്യമായ ജിഎസ്ടി ബില്ല് ആവശ്യപ്പെടുക. വ്യാജ സാധനങ്ങള്‍ വില്‍ക്കുന്നവര്‍ പലപ്പോഴും യഥാര്‍ത്ഥ ബില്ല് നല്‍കാന്‍ തയ്യാറാകില്ല. ഇത് തട്ടിപ്പുകാരെ തിരിച്ചറിയാന്‍ സഹായിക്കും.


Read News