പ്രീമിയം പെട്രോള്‍ അടിച്ച് മണ്ടന്മാരാകരുത്, എല്ലാ പ്രീമിയം ഇന്ധനവും എഥനോള്‍ ഫ്രീ അല്ല; കേരളത്തില്‍ എവിടെ കിട്ടും? വില എത്ര?

XP100 Petrol Kerala: ഭാരതത്തിന്റെ എഥനോള്‍ നയം കേന്ദ്രം വ്യക്തമാക്കിയതോടെ രാജ്യത്ത് പ്രീമിയം പെട്രോളിന് ആവശ്യക്കാര്‍ കൂടിയിട്ടുണ്ട്. ഇ20 തന്ത്രത്തില്‍ നിന്ന് പിന്നോട്ടില്ലെന്നും, ഘട്ടംഘട്ടമായി പെട്രോളിലെ എഥനോളിന്റെ അളവ് ഉയര്‍ത്തുമെന്നും സര്‍ക്കാര്‍ പലവട്ടം വ്യക്തമാക്കിയിട്ടുണ്ട്. എഥനോള്‍ അടങ്ങാത്ത പെട്രോള്‍ ആവശ്യമുള്ളവര്‍ പ്രീമിയം പെട്രോള്‍ ഉപയോഗിക്കാനാണ് ഔദ്യോഗിക നിര്‍ദേശം. പഴ വാഹനങ്ങള്‍ കൈവശമുള്ളവര്‍ തങ്ങളുടെ വാഹനങ്ങളുടെ സുരക്ഷയ്ക്കായി നിലവില്‍ ഉയര്‍ന്ന വിലകൊടുത്ത് പമ്പുകളില്‍ നിന്ന് പ്രീമിയം പെട്രോള്‍ നിറയ്ക്കുന്നു. എന്നാല്‍ ഇവിടെ നിങ്ങള്‍ കാണിക്കുന്ന ഒരു മണ്ടത്തരമുണ്ട്. കേരളത്തിലെ സാധാരണ പമ്പുകളില്‍ ലഭിക്കുന്ന എല്ലാ പ്രീമിയം പെട്രോളും എഥനോള്‍ പ്രീ അല്ല. എഥനോള്‍ വേണ്ടാത്തവര്‍ അടിക്കേണ്ടത് ഇന്ത്യന്‍ ഓയിലിന്റെ ശുദ്ധമായ 100 ഒക്ടേന്‍ XP100 ഇന്ധനം പോലുള്ളവയാണ്. കേരളത്തില്‍ ഇത് വളരെ തെരഞ്ഞെടുത്ത ഔട്ട്‌ലെറ്റുകളില്‍ മാത്രമാണ് ലഭ്യമായിട്ടുള്ളത്. ഇത് എവിടെ കിട്ടും, എന്തു വില വരും തുടങ്ങിയ വിവരങ്ങള്‍ അറിയാം.എല്ലാ പ്രീമിയം പെട്രോളും എഥനോള്‍ ഫ്രീ ആണോ?ഉത്തരം അല്ലെന്നാണ്. വിപണിയില്‍ സാധാരണയായി ലഭ്യമാകുന്ന പ്രീമിയം പെട്രോള്‍ വേരിയന്റുകളായ XP95 (Indian Oil), Speed (BPCL), Power (HPCL), Shell V-Power എന്നിവയൊന്നും എഥനോള്‍ ഫ്രീ അല്ല. കേന്ദ്ര സര്‍ക്കാര്‍ നയമനുസരിച്ച് ഇവയില്‍ നിലവില്‍ 20% വരെ എഥനോള്‍ (E20 Blend) ഉണ്ട്.അള്‍ട്രാ പ്രീമിയം വേരിയന്റുകള്‍ മാത്രമാണ് എഥനോള്‍ ഫ്രീ ആയി തുടരുന്നത്. 100 ഓക്‌റ്റെയ്ന്‍ (100 Octane) ശേഷിയുള്ള അള്‍ട്രാ പ്രീമിയം പെട്രോളുകളായ XP100 (IndianOil), Speed 100 (BPCL), poWer100 (HPCL) എന്നിവ മാത്രമാണ് നിലവില്‍ 100% എഥനോള്‍ ഫ്രീ (E0) ആയി ഇന്ത്യയില്‍ ലഭ്യമായിട്ടുള്ളത്.കേരളത്തിലെ പമ്പുകളില്‍ എഥനോള്‍ ഇല്ലാത്ത ഈ പെട്രോള്‍ ലഭ്യമാണോ?കേരളത്തിലും ഈ ഗ്രേഡ് പെട്രോളുകള്‍ ലഭ്യമാണ്. എന്നാല്‍ വിരലില്‍ എണ്ണാവുന്ന ഔട്ട്‌ലെറ്റുകളില്‍ മാത്രമാണ് ഇവ ലഭ്യമായിട്ടുള്ളൂ. നിലവില്‍ ലഭ്യമായ വിവരങ്ങള്‍ പ്രകാരം ഇന്ത്യന്‍ ഓയിലിന്റെ XP100 ലഭ്യമായ കേരളത്തിലെ പ്രധാന പമ്പുകള്‍; തിരുവനന്തപുരം: ആനയറയില്‍ ലൂലു മാളിനും കെഎസ്ആര്‍ടിസി ബസ് ടെര്‍മിനലിനും സമീപം പ്രവര്‍ത്തിക്കുന്ന ഇന്ത്യന്‍ ഓയിലിന്റെ കമ്പനി ഔണ്‍ഡ് കമ്പനി ഓപ്പറേറ്റഡ് ഔട്ട്‌ലെറ്റ് (COCO). എറണാകുളം / കൊച്ചി: വൈറ്റില ഹബ്ബിന് സമീപമുള്ള വൈറ്റില COCO പമ്പ്, പടിവട്ടത്തുള്ള എസ്.ആര്‍ ഫ്യുവല്‍സ് (SR Fuels, Cochin Bypass Road). തൃശ്ശൂര്‍: തൃശ്ശൂര്‍ നഗരത്തിലെ ഐഒസിഎല്‍ സിഒസിഒ ഔട്ട്ലെറ്റ്. കോഴിക്കോട്: കെടിസി രാമനാട്ടുകര, നഗരത്തിലെ പ്രധാന ഐഒസിഎല്‍ ഔട്ട്ലെറ്റുകള്‍.ഉയര്‍ന്ന ഗ്രേഡിന് ഉയര്‍ന്ന വിലഅള്‍ട്രാ പ്രീമിയം ഗ്രേഡ് ആയതിനാല്‍ സാധാരണ പെട്രോളിനേക്കാള്‍ ഇവയ്ക്ക് വില വളരെ കൂടുതലാണ്. അതേസമയം മൈലേജും അല്‍പം കൂടുതലാണ്. കേരളത്തില്‍ XP100 പെട്രോളിന് ലിറ്ററിന് ഏകദേശം 160 മുതല്‍ 180 രൂപ വില വരുന്നുവെന്നാണ് റിപ്പോര്‍ട്ട്.ശ്രദ്ധിക്കേണ്ട കാര്യങ്ങള്‍XP100 പ്രധാനമായും ഹൈ കംപ്രഷന്‍ എഞ്ചിനുള്ള സൂപ്പര്‍ കാറുകള്‍, ഉയര്‍ന്ന ശേഷിയുള്ള സൂപ്പര്‍ ബൈക്കുകള്‍, ആഡംബര ഇറക്കുമതി വാഹനങ്ങള്‍ എന്നിവയ്ക്കായി നിര്‍മ്മിച്ചിട്ടുള്ളതാണ്. നിങ്ങളുടെ സാധാരണ ബൈക്കിലോ, കാറിലോ XP100 ഉപയോഗിക്കുന്നത് എഞ്ചിന് കേടുപാടുകള്‍ ഉണ്ടാക്കില്ല. പക്ഷെ നിങ്ങളുടെ പോക്കറ്റിന് കടുത്ത സാമ്പത്തിക ബാധ്യത വരുത്തിവെക്കും.എഥനോള്‍ പെട്രോള്‍ (E20) ഉപയോഗിക്കുമ്പോള്‍ പഴയ വാഹനങ്ങളുടെ റബ്ബര്‍ പൈപ്പുകള്‍, കാര്‍ബുറേറ്റര്‍, ഫ്യുവല്‍ ടാങ്ക് എന്നിവയ്ക്ക് ഉണ്ടാകാന്‍ സാധ്യതയുള്ള തുരുമ്പും കേടുപാടുകളും ഒഴിവാക്കാന്‍ വിന്റേജ്, ക്ലാസിക് വാഹന ഉടമകള്‍ക്ക് XP100 മികച്ചൊരു ബദലാണ്. എഥനോള്‍ ഇല്ലാത്തതിനാലും, ഉയര്‍ന്ന ഓക്‌റ്റെയ്ന്‍ റേറ്റിംഗ് ഉള്ളതിനാലും എഞ്ചിന്റെ പ്രകടനം മെച്ചപ്പെടാനും നേരിയ തോതില്‍ കൂടുതല്‍ മൈലേജ് ലഭിക്കാനും ഇത് സഹായിക്കും.പക്ഷെ ഇവയുടെ ലഭ്യത വലിയ പ്രശ്‌നമാണ്. ബിപിസിഎല്‍, എച്ച്പിസിഎല്‍ എന്നിവയുടെ 100% ശുദ്ധമായ പെട്രോള്‍ എവിടെ ലഭ്യമാകുമെന്ന വിവരങ്ങള്‍ നിലവില്‍ ഓണ്‍ലൈനില്‍ ലഭ്യവുമല്ല. പ്രധാന നഗരങ്ങളില്‍ മാത്രമാണ് ഇതിന്റെ ലഭ്യതയുള്ളത്. കൂടുതലായും കമ്പനി ഓണ്‍ഡ് കമ്പനി ഓപ്പറേറ്റഡ് ഔട്ടുലെറ്റുകളില്‍ മാത്രമാണ് ഇവ കണ്ടു വരുന്നത്.(മുകളില്‍ പറഞ്ഞ വിവരങ്ങള്‍ നിലവില്‍ ലഭ്യമായ റിപ്പോര്‍ട്ടുകള്‍ അടിസ്ഥാനമാക്കിയാണ്. വ്യക്തത വരുത്താവുന്നതാണ്. ഔട്ട്‌ലെറ്റുകളുടെ കൃത്യമായ സ്ഥലങ്ങളും തത്സമയ ലഭ്യതയും അറിയാന്‍ ‘IndianOil ONE’ മൊബൈല്‍ ആപ്പ് അല്ലെങ്കില്‍ IOCL വെബ്സൈറ്റിലെ Pump Locator ഉപയോഗിക്കാം.)


Read News