ക്ലിനിക്കൽ സൈക്കോളജിസ്റ്റുകളുടെ കുറവ്: ഭിന്നശേഷി സർട്ടിഫിക്കറ്റ് ലഭിക്കാൻ വലഞ്ഞ് രക്ഷിതാക്കൾ
കോഴിക്കോട്: സംസ്ഥാനത്തെ സർക്കാർ ആശുപത്രികളിൽ ക്ലിനിക്കൽ സൈക്കോളജിസ്റ്റുകളുടെ കടുത്ത ക്ഷാമം ഭിന്നശേഷി സർട്ടിഫിക്കറ്റുകൾ ലഭിക്കുന്നതിന് വലിയ തടസ്സമായി മാറുന്നു. മാസങ്ങളോളം, ചില സന്ദർഭങ്ങളിൽ ഒരു വർഷത്തിലധികമായി അപേക്ഷ നൽകി കാത്തിരിക്കുന്നവർക്ക് പോലും സർട്ടിഫിക്കറ്റ് ലഭിക്കാത്ത ഗുരുതരമായ സാഹചര്യമാണുള്ളത്. സർട്ടിഫിക്കറ്റ് വൈകുന്നതുമൂലം അർഹരായ കുട്ടികൾക്ക് ലഭിക്കേണ്ട പല ആനുകൂല്യങ്ങളും നഷ്ടപ്പെടുന്നതായി രക്ഷിതാക്കൾ ഒന്നടങ്കം ആരോപിക്കുന്നു.
ഭിന്നശേഷി സർട്ടിഫിക്കേഷൻ നടപടികളുടെ ഭാഗമായുള്ള ബുദ്ധിവികാസ പരിശോധനയ്ക്ക് (IQ Test) ക്ലിനിക്കൽ സൈക്കോളജിസ്റ്റുകളുടെ സാന്നിധ്യം അനിവാര്യമാണ്. എന്നാൽ, സംസ്ഥാനത്തൊട്ടാകെ ആവശ്യത്തിന് ക്ലിനിക്കൽ സൈക്കോളജിസ്റ്റുകൾ ഇല്ലാത്തതാണ് ഈ പ്രതിസന്ധിക്ക് കാരണം. മെഡിക്കൽ കോളേജുകൾ, ജനറൽ ആശുപത്രികൾ, ജില്ലാ ആശുപത്രികൾ, താലൂക്ക് ആശുപത്രികൾ എന്നിങ്ങനെ 98 കേന്ദ്രങ്ങളിലായി ഭിന്നശേഷി നിർണ്ണയ ക്യാമ്പുകൾ നടക്കുന്നുണ്ടെങ്കിലും, ആകെയുള്ളത് 22 ക്ലിനിക്കൽ സൈക്കോളജിസ്റ്റുകളുടെ തസ്തിക മാത്രമാണ്. ഇതിൽ 17 പേർ ആരോഗ്യവകുപ്പിന് കീഴിലും അഞ്ചുപേർ മെഡിക്കൽ വിദ്യാഭ്യാസ വകുപ്പിന് കീഴിലുമാണ് ജോലി ചെയ്യുന്നത്. ഏറ്റവും കൂടുതൽ ഭിന്നശേഷിക്കാരുള്ള മലപ്പുറം ജില്ലയിൽപ്പോലും രണ്ട് സൈക്കോളജിസ്റ്റുകൾ മാത്രമാണുള്ളത്.
കേന്ദ്ര സർക്കാരിന്റെ പുതിയ മാനദണ്ഡങ്ങൾ പ്രകാരം 18 വയസ്സിന് മുമ്പ് മൂന്നുതവണ ഭിന്നശേഷി നിർണ്ണയ പരിശോധനയ്ക്ക് വിധേയരായാൽ മാത്രമേ സ്ഥിരമായ സർട്ടിഫിക്കറ്റ് ലഭ്യമാകൂ. ഈ ഘട്ടങ്ങളിലെല്ലാം ഐക്യു പരിശോധന നിർബന്ധവുമാണ്. 2015-ലെ സെൻസസ് പ്രകാരം തന്നെ ഒരു ലക്ഷത്തോളം പേർക്ക് ഇത്തരം പരിശോധനകൾ അത്യാവശ്യമായിരുന്നു. സെറിബ്രൽ പാൾസി, ഓട്ടിസം തുടങ്ങിയ വിഭാഗങ്ങളിൽപ്പെട്ടവരും ഇതിൽ ഉൾപ്പെടുന്നു. പത്ത് വർഷം പിന്നിടുമ്പോൾ ഭിന്നശേഷിക്കാരുടെ എണ്ണത്തിൽ വലിയ വർധനവാണ് ഉണ്ടായിരിക്കുന്നത്.
ഈ കണക്കുകളിൽ 50 ശതമാനത്തോളം വർധനയുണ്ടാകാൻ സാധ്യതയുണ്ടെന്നാണ് കണക്കാക്കപ്പെടുന്നത്. അതിനാൽ ഭിന്നശേഷി നിർണ്ണയം നടക്കുന്ന എല്ലാ സർക്കാർ ആശുപത്രികളിലും ക്ലിനിക്കൽ സൈക്കോളജിസ്റ്റുകളെ അടിയന്തരമായി നിയമിക്കണമെന്നും നടപടികൾ വേഗത്തിലാക്കണമെന്നും പരിവാർ അസോസിയേഷൻ മലപ്പുറം ജില്ലാ കമ്മിറ്റി സർക്കാരിനോട് ആവശ്യപ്പെട്ടു.
