അരി ഉൽപാദനം കുറയുന്നു; വിപണിയിൽ വില കുതിച്ചുയരുന്നു
ന്യൂഡൽഹി ∙ നടപ്പു സാമ്പത്തിക വർഷത്തിൽ രാജ്യത്ത് നെല്ലുൽപാദനത്തിൽ ഇടിവുണ്ടാകുമെന്ന് കേന്ദ്ര കൃഷി മന്ത്രാലയത്തിന്റെ റിപ്പോർട്ട്. മുൻ വർഷം (2025–26) 15.4 കോടി ടൺ അരി ഉൽപാദിപ്പിച്ച സ്ഥാനത്ത്, ഈ വർഷം (2026–27) അത് 14.7 കോടി ടണ്ണായി കുറയുമെന്നാണ് ഔദ്യോഗിക കണക്കുകൂട്ടൽ.
1950 മുതൽ നീളുന്ന 76 വർഷത്തെ കാർഷിക ചരിത്രം പരിശോധിച്ചാൽ, ഇതിൽ 19 തവണ മാത്രമാണ് നെല്ലുൽപാദനത്തിൽ ഇത്തരമൊരു കുറവ് രേഖപ്പെടുത്തിയിട്ടുള്ളത്. 2015–16 വർഷത്തിലാണ് അവസാനമായി രാജ്യത്ത് ഇത്തരമൊരു ഉൽപാദനക്കുറവ് ഉണ്ടായത്.
അപര്യാപ്തമായ മഴയും ഇ–20 ഇന്ധന പദ്ധതിക്കായി ഉപയോഗിക്കുന്ന എഥനോൾ ഉൽപാദനവുമാണ് പ്രധാനമായും അരിയുടെ വിലയിൽ പ്രതിഫലിക്കുന്നത്. എഥനോൾ നിർമ്മാണത്തിനായി ചോളം, കരിമ്പ് എന്നിവയ്‌ക്കൊപ്പം ഫുഡ് കോർപറേഷൻ ഓഫ് ഇന്ത്യയുടെ ശേഖരത്തിലുള്ള അരി കൂടി വിനിയോഗിക്കുന്നതും ഉൽപാദനക്ഷമതയെയും ലഭ്യതയെയും കാര്യമായി ബാധിച്ചിട്ടുണ്ട്.
