ശബരിമല തീർഥാടനം: 13 മുതൽ ചെങ്ങന്നൂരിൽ നിന്ന് കെഎസ്ആർടിസി പ്രത്യേക സർവീസ്
ചെങ്ങന്നൂർ ∙ ശബരിമല മകരവിളക്ക് മഹോത്സവത്തോട് അനുബന്ധിച്ച് ഈ മാസം 13 മുതൽ ചെങ്ങന്നൂരിൽ നിന്ന് കെഎസ്ആർടിസി പ്രത്യേക സർവീസുകൾ ആരംഭിക്കും. തിരക്ക് ക്രമീകരിക്കുന്നതിന്റെ ഭാഗമായി ആദ്യഘട്ടത്തിൽ 60 ബസുകളും പിന്നീട് ആവശ്യാനുസരണം ഇത് 80 ബസുകളായും വർധിപ്പിക്കും. മുഴുവൻ സമയ സേവനം ഉറപ്പാക്കുന്നതിനായി ജീവനക്കാരെ 24 മണിക്കൂറും വിന്യസിക്കും. മന്ത്രി കെ. മുരളീധരന്റെ നേതൃത്വത്തിൽ നടന്ന ഉന്നതതല അവലോകന യോഗത്തിലാണ് ഇതുസംബന്ധിച്ച തീരുമാനങ്ങൾ കൈക്കൊണ്ടത്. ജനപ്രതിനിധികളും ദേവസ്വം ഉദ്യോഗസ്ഥരും വിവിധ വകുപ്പുതല മേധാവികളും യോഗത്തിൽ പങ്കെടുത്തു.
തീർഥാടകർക്ക് സുരക്ഷിതമായ സൗകര്യങ്ങൾ ഒരുക്കുന്നതിന്റെ ഭാഗമായി ഭക്ഷ്യസുരക്ഷാ വിഭാഗത്തിന്റെ പരിശോധനകൾ കർശനമാക്കാൻ മന്ത്രി നിർദ്ദേശിച്ചു. കുടിവെള്ള ലഭ്യത തടസ്സമില്ലാതെ ഉറപ്പാക്കുന്നതിനൊപ്പം പകർച്ചവ്യാധികൾക്കെതിരെ അതീവ ജാഗ്രത പുലർത്തണമെന്നും നിർദ്ദേശമുണ്ട്. തീർഥാടന കേന്ദ്രങ്ങളിൽ വൈദ്യുതി മുടക്കം ഒഴിവാക്കുന്നതിനായി കെഎസ്ഇബിക്ക് പ്രത്യേകം ജാഗ്രതാ നിർദ്ദേശം നൽകിയിട്ടുണ്ട്. സജി ചെറിയാൻ എംഎൽഎ അധ്യക്ഷത വഹിച്ച യോഗത്തിൽ കൊടിക്കുന്നിൽ സുരേഷ് എംപി, ദേവസ്വം ബോർഡ് പ്രസിഡന്റ് കെ. ജയകുമാർ, അംഗം പി.ഡി. സന്തോഷ്കുമാർ, ജില്ലാ പോലീസ് മേധാവി ടി.കെ. വിഷ്ണുപ്രദീപ്, നഗരസഭാ അധ്യക്ഷൻ മനീഷ് കീഴാമഠത്തിൽ, അയ്യപ്പ സേവാസംഘം ദേശീയ ജനറൽ സെക്രട്ടറി ഡി. വിജയകുമാർ തുടങ്ങിയവർ സംസാരിച്ചു. പാറക്കടവ് മേഖലയിൽ തീർഥാടകരുടെ നീക്കം കർശനമായി നിയന്ത്രിക്കാനും യോഗത്തിൽ തീരുമാനമായി.
