ലഗേജിലെ ചെറിയ അശ്രദ്ധ വിമാനത്താവളത്തിൽ കുരുക്കാകും; സ്നേഹപ്പൊതികൾ കൈമാറുമ്പോൾ ജാഗ്രത പാലിക്കാൻ നിർദ്ദേശം
കുവൈത്തിലേക്ക് യാത്ര പ്ലാൻ ചെയ്യുന്ന പ്രവാസികളും വിനോദസഞ്ചാരികളും തങ്ങളുടെ ലഗേജുകളിൽ നിരോധിത ഭക്ഷ്യവസ്തുക്കളോ, നിയമപരമായ അനുമതിയില്ലാത്ത മരുന്നുകളോ, വിലക്കപ്പെട്ട മറ്റ് ഉൽപന്നങ്ങളോ ഇല്ലെന്ന് ഉറപ്പുവരുത്തണമെന്ന് അധികൃതർ മുന്നറിയിപ്പ് നൽകി. കസ്റ്റംസ് ചട്ടങ്ങൾ ലംഘിക്കുന്ന പക്ഷം സാധനങ്ങൾ കണ്ടുകെട്ടുന്നതുൾപ്പെടെയുള്ള കർശനമായ നടപടികൾ നേരിടേണ്ടി വരുമെന്ന് ഉദ്യോഗസ്ഥർ വ്യക്തമാക്കി.
മറ്റ് രാജ്യങ്ങളിൽ നിത്യോപയോഗ സാധനങ്ങളോ സാധാരണയായി വിപണിയിൽ ലഭ്യമാകുന്നവയോ ആണെങ്കിൽ പോലും, കുവൈത്തിന്റെ നിയമപ്രകാരം അവ നിരോധിക്കപ്പെട്ടവയോ അല്ലെങ്കിൽ ഇറക്കുമതി ചെയ്യുന്നതിന് പ്രത്യേക അനുമതി ആവശ്യമുള്ളവയോ ആകാൻ സാധ്യതയുണ്ട്. അതിനാൽ, യാത്ര തിരിക്കുന്നതിന് മുൻപായി രാജ്യത്തെ നിലവിലെ നിയമങ്ങൾ കൃത്യമായി പരിശോധിക്കാൻ എല്ലാവരും ശ്രദ്ധിക്കണം. വിദേശത്ത് നിന്ന് മടങ്ങിയെത്തുന്ന താമസക്കാർക്കും, ബിസിനസ് അല്ലെങ്കിൽ വിനോദസഞ്ചാര ആവശ്യങ്ങൾക്കായി എത്തുന്നവർക്കും ഈ നിബന്ധനകൾ ഒരുപോലെ ബാധകമാണ്.
പ്രത്യേകിച്ച് മരുന്നുകളുടെ കാര്യത്തിൽ അതീവ ജാഗ്രത പുലർത്തേണ്ടതുണ്ട്. ലഹരി പദാർത്ഥങ്ങൾ അടങ്ങിയതോ സൈക്കോട്രോപിക് ഘടകങ്ങൾ ഉള്ളതോ ആയ ഔഷധങ്ങൾ കൊണ്ടുവരുന്നതിൽ കുവൈത്തിൽ ശക്തമായ നിയന്ത്രണങ്ങളാണുള്ളത്. ചികിത്സാർത്ഥം എത്തുന്നവർക്ക് ചില നിബന്ധനകൾക്ക് വിധേയമായി, 15 ദിവസത്തേക്ക് ആവശ്യമായ മരുന്നുകളും, ഒരു മാസം വരെ ഉപയോഗിക്കാവുന്ന അംഗീകൃത സൈക്കോട്രോപിക് മരുന്നുകളും കൈവശം വെക്കാൻ അനുവാദമുണ്ട്.
