ഉറ്റചങ്ങാതികളുടെ ജീവനെടുക്കാൻ അനിലയെ പ്രേരിപ്പിച്ചത് മാനസിക സംഘർഷമോ?; പൊലീസിന്റെ മൗനത്തിന് പിന്നിലെ രഹസ്യം

കലിഫോർണിയ∙ മിൽപിറ്റാസിലും സാൻ ജോസിലുമായി നടന്ന ആക്രമണങ്ങളിൽ തൃശൂർ സ്വദേശിനിയായ അഞ്ജന ഹരി (35), തിരുവനന്തപുരം സ്വദേശിനിയായ ആൻ മേരി മാത്യു (40) എന്നിവർ കൊല്ലപ്പെട്ട കേസിൽ സുഹൃത്തായിരുന്ന അനില ബേബി എങ്ങനെ കൊലയാളിയായി മാറി എന്ന ചോദ്യത്തിന് മുന്നിൽ ഉത്തരമില്ലാതെ ഉഴലുകയാണു ബന്ധുക്കളും നാട്ടുകാരും. മിൽപിറ്റാസ് പൊലീസും സാൻ ജോസ് പൊലീസും അന്വേഷണം ഊർജിതമായി തുടരുമ്പോൾ, പ്രതിയുടെ മാനസികാവസ്ഥയെക്കുറിച്ചോ കൃത്യത്തിന് പിന്നിലെ യഥാർഥ പ്രേരണയെക്കുറിച്ചോ ഉള്ള ഔദ്യോഗിക വിവരങ്ങൾ ഉടൻ പുറത്തുവന്നേക്കില്ലെന്നാണ് റിപ്പോർട്ടുകൾ.ഈ ദാരുണ സംഭവത്തെ നിയമപരവും മനശാസ്ത്രപരവുമായ രണ്ട് വ്യത്യസ്ത കോണുകളിൽ നിന്ന് നോക്കിക്കാണേണ്ടതുണ്ട്. നിയമപാലകരുടെയും കോടതിയുടെയും കാഴ്ചപ്പാടിൽ, ഇത്തരം കൃത്യങ്ങളെ വിലയിരുത്തുന്നത് കുറ്റകൃത്യത്തിന്റെ ഗൗരവം മുൻനിർത്തിയാണ്. ഒരു അപ്പാർട്മെന്റിനുള്ളിൽ അതിക്രമിച്ച് കയറി മാരകമായി കുത്തിക്കൊലപ്പെടുത്തുന്നതും, തുടർന്ന് കാറോടിച്ചുപോയി മറ്റൊരു വ്യക്തിയെ എസ്‌യുവി ഇടിപ്പിച്ച് കൊലപ്പെടുത്തിയതും യാദൃശ്ചികമല്ലെന്നാണ് പ്രാഥമിക അന്വേഷണ സൂചനകൾ നൽകുന്നത്. ഒന്നിന് പിറകെ ഒന്നായി രണ്ട് വ്യത്യസ്ത വ്യക്തികളെ കൃത്യമായ ലക്ഷ്യത്തോടെ ആക്രമിച്ചു എന്നത് പെട്ടെന്നുള്ള പ്രകോപനത്തിനപ്പുറം ഗൂഢാലോചന നടന്നതായി സംശയിക്കാൻ ഇടയാക്കുന്നു. ആസൂത്രണം, കൊലപാതക ഉദ്ദേശ്യം, കടുത്ത ശത്രുത എന്നിവ മുൻനിർത്തി ശക്തമായ കൊലപാതകക്കുറ്റങ്ങൾ തന്നെയാകും പ്രോസിക്യൂഷൻ ചുമത്തുക.ഈ കേസിൽ പലരും ചോദിക്കുന്ന പ്രധാന സംശയമാണ് പ്രതിയുടെ മൊഴിയോ കൃത്യത്തിന് പിന്നിലെ യഥാർഥ കാരണമോ പൊലീസ് എന്തുകൊണ്ട് ഉടൻ പുറത്തു വിടുന്നില്ല എന്നത്. എന്നാൽ, ഇന്ത്യൻ ജുഡീഷ്യൽ സംവിധാനവും അമേരിക്കൻ നിയമസംവിധാനവും തമ്മിൽ ഇക്കാര്യത്തിൽ വലിയ വ്യത്യാസങ്ങളുണ്ട്. അമേരിക്കൻ നിയമപ്രകാരം, ഒരു കൊലക്കേസിൽ കുറ്റാരോപിതനായ വ്യക്തിയുടെ പ്രസ്താവനകളോ മൊഴികളോ വിചാരണയ്ക്ക് മുൻപ് മാധ്യമങ്ങളിലൂടെയോ പൊതുസമൂഹത്തിലോ പൂർണമായി പുറത്തുവിടാൻ പൊലീസ് ബാധ്യസ്ഥരല്ല. കുറ്റക്കാരനാണോ അല്ലയോ എന്ന് തീരുമാനിക്കുന്നത് സാധാരണക്കാരായ ജൂറി അംഗങ്ങളാണ്. വിചാരണയ്ക്ക് മുൻപ് പ്രതിയുടെ മൊഴികൾ പുറത്തുവന്നാൽ അത് ജൂറി അംഗങ്ങളുടെ നിഷ്പക്ഷതയെയും ഭാവിയിലെ വിചാരണയെയും പ്രതികൂലമായി ബാധിച്ചേക്കാം. പൊതുജനാഭിപ്രായം രൂപപ്പെടുന്നത് തടയാൻ അന്വേഷണ ഉദ്യോഗസ്ഥർ അതീവ ജാഗ്രത പാലിക്കാറുണ്ട്. ഇന്ത്യൻ പൊലീസ് സംവിധാനത്തിൽ നിന്ന് തികച്ചും വ്യത്യസ്തമാണ് അമേരിക്കയിലെ പ്രോസിക്യൂഷൻ രീതികൾ. ഇന്ത്യയിൽ പലപ്പോഴും അറസ്റ്റിന് തൊട്ടുപിന്നാലെ തന്നെ പൊലീസിന്റെ ഭാഗത്തുനിന്നുള്ള വിശദീകരണങ്ങളും പ്രതികളുടെ സമ്മതമൊഴികളും വാർത്തകളിൽ വരാറുണ്ട്. എന്നാൽ യുഎസിൽ കർശനമായ ഭരണഘടനാപരമായ അവകാശങ്ങളും നിയമവ്യവസ്ഥയുമാണുള്ളത്.


Fashion ⏭️