കഠിന ചൂടിനാശ്വാസം; കനത്ത മഴയെത്തുന്നു; ഈ ജില്ലക്കാർ കയ്യിൽ കുട കരുതണം

കനത്ത മഴയ്ക്ക് മുന്നോടിയായി മാനം ഇരുണ്ടപ്പോൾ (ഫോട്ടോ: ജോഷ്‌വാൻ മനു)

തിരുവനന്തപുരം: കനത്ത ചൂടിൽ കേരളത്തിനാശ്വാസമായി പുതിയ മഴ മുന്നറിയിപ്പ്. സെപ്തംബർ പത്ത്, പതിനൊന്ന് തീയതികളിൽ വിവിധ ജില്ലകളിൽ കേന്ദ്ര കാലാവസ്ഥാ വകുപ്പ് യെല്ലോ അലർട്ട് പ്രഖ്യാപിച്ചു. എന്നാൽ മറ്റ് ദിവസങ്ങളിൽ ഒരിടത്തും മഴ മുന്നറിയിപ്പില്ല.

യെല്ലോ അലർട്ട് എവിടെയൊക്കെ?

10/09/2026: ആലപ്പുഴ, എറണാകുളം

11/09/2026: പത്തനംതിട്ട, കോട്ടയം, ഇടുക്കി, എറണാകുളം

എന്നീ ജില്ലകളിലാണ് മഞ്ഞ അലർട്ട് പ്രഖ്യാപിച്ചിട്ടുള്ളത്. ഒറ്റപ്പെട്ട ശക്തമായ മഴയ്ക്കുള്ള സാദ്ധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.

വർദ്ധിക്കുന്ന ചൂട്

സെപ്തംബർ ഏഴ് മുതൽ ഒൻപത് വരെ ഉയർന്ന താപനില (സാധാരണയേക്കാൾ മൂന്ന് മുതൽ നാല് ഡിഗ്രി സെൽഷ്യസ് വരെ കൂടുതൽ) ഉയരാൻ സാദ്ധ്യതയെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു. ഉയർന്ന ചൂട് സൂര്യാഘാതം, സൂര്യാതപം, നിർജലീകരണം തുടങ്ങി നിരവധി ഗുരുതരമായ ആരോഗ്യപ്രശ്നങ്ങൾക്ക് കാരണമാകും. ആയതിനാൽ പകൽ പതിനൊന്ന് മണിമുതല്‍ വൈകിട്ട് മൂന്നുവരെയുള്ള സമയത്ത് നേരിട്ട് ശരീരത്തിൽ കൂടുതൽ സമയം തുടർച്ചയായി സൂര്യപ്രകാശം ഏൽക്കുന്നത് ഒഴിവാക്കുക. കൂടാതെ ദാഹമില്ലെങ്കിലും വെള്ളം കുടിക്കുന്നത് തുടരുക. പരമാവധി ശുദ്ധജലം കുടിക്കുക. നിർജലീകരണമുണ്ടാക്കുന്ന മദ്യം, കാപ്പി, ചായ, കാർബണേറ്റഡ് സോഫ്റ്റ് ഡ്രിങ്കുകൾ തുടങ്ങിയ പാനീയങ്ങള്‍ പകല്‍ സമയത്ത് ഒഴിവാക്കണമെന്നും കാലാവസ്ഥാ വകുപ്പ് നി‌ർദേശിക്കുന്നു.

English Summary

Kerala is set for respite from intense heat with a yellow rain alert issued by the India Meteorological Department for September 10-11, 2026. Isolated heavy rainfall is predicted for districts including Alappuzha, Ernakulam, Pathanamthitta, Kottayam, and Idukki. This follows a heat warning for September 7-9.
RELATED TOPICS: KERALA RAIN ALERT, KERALA YELLOW ALERT, SEPTEMBER RAIN FORECAST KERALA, കേരള മഴ മുന്നറിയിപ്പ്, KERALA WEATHER UPDATE

Read News ⏭️