വീട്ടിലെ സോളാർ പ്ളാന്റുകളിൽ പരിശോധന വരുന്നു; പ്രശ്നങ്ങൾ കണ്ടെത്തിയാൽ സബ്സിഡിത്തുക പലിശസഹിതം തിരിച്ചുകൊടുക്കണം
പ്രതീകാത്മക ചിത്രം
തിരുവനന്തപുരം: പുരപ്പുറ സോളാർ പ്ളാന്റുകൾ സ്ഥാപിച്ച വീടുകളിൽ പരിശോധന നടത്താൻ അധികൃതർ തയ്യാറെടുക്കുന്നതായി റിപ്പോർട്ട്. പദ്ധതിയിൽ ഉപഭോക്താക്കൾ അറിഞ്ഞും അറിയാതെയും ചില ക്രമക്കേടുകൾ നടക്കുന്നുണ്ടെന്ന് ശ്രദ്ധയിൽപ്പെട്ടതോടെയാണ് പരിശോധന നടത്താൻ തീരുമാനിച്ചതെന്നാണ് റിപ്പോർട്ട് വ്യക്തമാക്കുന്നത്. ചെലവുകുറച്ച് ലാഭമാർജിൻ വർദ്ധിപ്പിക്കാനാണ് ചില കമ്പനികൾ ഇത്തരത്തലുള്ള തട്ടിപ്പുനടത്തുന്നത്. ഇത്തരക്കാരെ കണ്ടെത്തുകയാണ് ലക്ഷ്യമെന്നാണ് ഒരു മാദ്ധ്യമം പുറത്തുവിട്ട റിപ്പോർട്ടിൽ പറയുന്നത്.
കേന്ദ്ര ഊർജ മന്ത്രാലവും വിതരണ കമ്പനികളും നിയോഗിച്ചിട്ടുള്ള അംഗീകൃത തേർഡ് പാർട്ടി ഇൻസ്പെക്ഷൻ ഏജൻസികളാവും വീടുകളിൽ പരിശോധന നടത്തുന്നത്. ഇതിനാെപ്പം കെഎസ്ഇബി ഉദ്യോഗസ്ഥരും എത്തിയേക്കാം എന്നാണ് റിപ്പോർട്ടിൽ പറയുന്നത്. ഇവർ നടത്തുന്ന അന്വേഷണത്തിൽ എന്തെങ്കിലും തട്ടിപ്പ് ശ്രദ്ധയിൽപ്പെട്ടാൽ തുടർന്ന നടപടികളുണ്ടാവും.
സബ്സിഡി തട്ടിയെടുക്കാൻ വാണിജ്യാവശ്യത്തിനുള്ള കെട്ടിടങ്ങളെ ഗാർഹിക ആവശ്യത്തിനാണെന്ന് കാണിക്കുക, ഗുണനിലവാരമില്ലാത്ത ഉപകരണങ്ങളും പ്ളാന്റുകളും ഉപയോഗിക്കുക തുടങ്ങിയവയാണ് ഇവരുടെ ശ്രദ്ധയിൽപ്പെടാവുന്ന തട്ടിപ്പുകൾ. പാനലുകളും മറ്റ് ഉപകരണങ്ങളും കേന്ദ്രസർക്കാരിന്റെ ലിസ്റ്റിൽ ഉൾപ്പെട്ടിട്ടുള്ളതാണോ എന്ന് ഇവർ പരിശോധിക്കും. പ്ലാന്റ് സ്ഥാപിച്ചിരിക്കുന്ന കെട്ടിടത്തിലെ വൈദ്യുത കണക്ഷൻ ശരിക്കുള്ള ഗാർഹിക കണക്ഷൻ തന്നെയാണോ, എർത്ത്, വയറിംഗ് തുടങ്ങിയവയുടെ സുരക്ഷ എന്നിവയും പരിശോധിച്ച് ഉറപ്പുവരും.
പലിശ സഹിതം തിരിച്ചുകൊടുക്കേണ്ടിവരും
പരിശോധനയിൽ എന്തെങ്കിലും തരത്തലെ ക്രമക്കേട് കണ്ടെത്തിയാൽ കർശന നടപടികളാവും ഉണ്ടാവുക. തട്ടിപ്പ് നടന്നത് ഉപഭോക്താവിന്റെ അറിവോടുകൂടിയാണോ എന്നതതും പരിശോധിക്കും. ക്രമക്കേട് കാട്ടിയ ഉപഭോക്താക്കൾക്ക് കേന്ദ്രം നൽകുന്ന സബ്സിഡി തുക ലഭിക്കില്ല. ഇത് ലഭിച്ചതിനുശേഷമാണ് തട്ടിപ്പ് കണ്ടെത്തുന്നതെങ്കിൽ കൈപ്പറ്റിയ തുക പലിശസഹിതം തിരിച്ചടക്കേണ്ടിവരും. കേന്ദ്രസർക്കാരിന്റെ ലിസ്റ്റിൽപ്പെടാത്ത സാമഗ്രികൾ ഉപയോഗിച്ച വിതരണക്കാരെ ബ്ളാക്ക് ലിസ്റ്റിൽ പെടുത്തിയേക്കും. വ്യാജ രേഖ ഉണ്ടാക്കുകയോ വിശ്വാസ വഞ്ചന നടത്തുകയോ ചെയ്തവർക്കെതിരെ ക്രിമിനൽ നടപടി സ്വീകരിക്കുകയും ചെയ്യും എന്നാണ് റിപ്പോർട്ടിൽ പറയുന്നത്.
RELATED TOPICS: SOLAR PLANT INSPECTION KERALA, വീട്ടിലെ സോളാർ പരിശോധന, HOME SOLAR INSPECTION, SOLAR PLANT പരിശോധന, KERALA SOLAR NEWS
Read News ⏭️
