കാറിടിച്ചു തെറിച്ചുവീണു; നാട്ടുകാർ നോക്കിനിൽക്കെ റോഡരികിൽ രക്തം വാർന്നു കിടന്നത് പത്തു മിനിറ്റിലേറെ
പാലക്കാട് കൂറ്റനാട് നടന്ന ദാരുണമായ വാഹനാപകടത്തിൽ പരുക്കേറ്റ കാൽനടയാത്രക്കാരന് കൃത്യസമയത്ത് ചികിത്സ ലഭ്യമാക്കാൻ കഴിയാഞ്ഞത് ദൗർഭാഗ്യകരമായി. അപകടത്തെത്തുടർന്ന് ഗുരുതരമായ പരുക്കുകളോടെ പത്തു മിനിറ്റിലേറെ സമയം രക്തം വാർന്ന് റോഡരികിൽ കിടന്ന അബൂബക്കർ (66) ഒടുവിൽ മരണത്തിന് കീഴടങ്ങി. സംഭവസ്ഥലത്തുണ്ടായിരുന്ന നാട്ടുകാർ ഇദ്ദേഹത്തെ രക്ഷിക്കാനായി കിണഞ്ഞു പരിശ്രമിച്ചെങ്കിലും ആ ശ്രമങ്ങളൊന്നും ഫലം കണ്ടില്ല. അബൂബക്കറിനെ ആശുപത്രിയിലെത്തിക്കാൻ സഹായം അഭ്യർഥിച്ച് നാട്ടുകാർ അതുവഴി കടന്നുപോയ ഒട്ടനവധി വാഹനങ്ങൾക്ക് കൈകാണിച്ചെങ്കിലും, ഒന്നുപോലും നിർത്താൻ തയ്യാറായില്ല.
കഴിഞ്ഞദിവസം വൈകിട്ട് കൂറ്റനാട്–എടപ്പാൾ റോഡിൽ വട്ടേനാട് സ്കൂളിന് സമീപത്തുവെച്ചാണ് ഈ അപകടം നടന്നത്. കൂറ്റനാട് തൊഴുക്കാട് തേവർപ്പറമ്പിൽ സ്വദേശിയായ അബൂബക്കർ, ഡോക്ടറെ കാണാനായി കൂറ്റനാട് ന്യൂ ബസാറിലേക്ക് നടന്നുപോകുകയായിരുന്നു. ഈ സമയം അമിതവേഗതയിലെത്തിയ കാർ ഇദ്ദേഹത്തെ ഇടിച്ചുതെറിപ്പിക്കുകയായിരുന്നു. റോഡിലേക്ക് ശക്തമായി വീണ ഇദ്ദേഹത്തിന്റെ തലയ്ക്ക് ഗുരുതരമായ പരുക്കേറ്റു. രക്തം വാർന്ന് റോഡരികിൽ കിടന്ന അബൂബക്കറിനെ ഉടൻ ആശുപത്രിയിൽ എത്തിക്കാൻ നാട്ടുകാർ ആംബുലൻസിനെ വിളിച്ചുവരുത്താൻ ശ്രമിച്ചെങ്കിലും, ആംബുലൻസ് സ്ഥലത്തെത്തുന്നതിന് മുൻപേ മരണം സംഭവിക്കുകയായിരുന്നു.
