ഗ്യാനേഷ് കുമാറിന്റെ രാജി: ഇന്ത്യ സഖ്യത്തിന്റെ ജനകീയ കുറ്റവിചാരണ
ന്യൂഡൽഹി: മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരെ ‘ജനകീയ കുറ്റവിചാരണ’യുമായി പ്രതിപക്ഷ സഖ്യമായ ഇന്ത്യ രംഗത്ത്. കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ ഔദ്യോഗിക വസതിയിൽ വെച്ചാണ് ഈ വേറിട്ട പ്രതിഷേധം അരങ്ങേറിയത്. തിരഞ്ഞെടുപ്പ് കമ്മിഷണറുടെ നേതൃത്വത്തിൽ നടന്ന വോട്ടർ പട്ടിക പുതുക്കലുമായി (എസ്ഐആർ) ബന്ധപ്പെട്ട് ഗുരുതരമായ ക്രമക്കേടുകൾ ഉയർന്നുവന്ന പശ്ചാത്തലത്തിലാണ് ഇത്തരമൊരു നടപടി. മുൻ ലോക്‌സഭാ സ്പീക്കർ മീരാ കുമാറായിരുന്നു ഈ സവിശേഷ യോഗത്തിൽ അധ്യക്ഷത വഹിച്ചത്.
ഗ്യാനേഷ് കുമാറിനെ സ്ഥാനത്തുനിന്നും നീക്കം ചെയ്യണമെന്നാവശ്യപ്പെട്ടുകൊണ്ടുള്ള പ്രമേയം മല്ലികാർജുൻ ഖർഗെ സഭയിൽ അവതരിപ്പിച്ചു. ജനാധിപത്യം സംരക്ഷിക്കാനുള്ള നിർണ്ണായക പോരാട്ടമാണിതെന്ന് അദ്ദേഹം അഭിപ്രായപ്പെട്ടു. മുഖ്യ തിരഞ്ഞെടുപ്പ് കമ്മിഷണറോട് വ്യക്തിപരമായ പകയോ വിരോധമോ ഇല്ലെന്ന് വ്യക്തമാക്കിയ ഖർഗെ, ഭരണഘടനാ സ്ഥാപനമായ തിരഞ്ഞെടുപ്പ് കമ്മിഷൻ പൂർണ്ണമായും നിഷ്പക്ഷത പാലിക്കണമെന്നാണ് ആഗ്രഹിക്കുന്നതെന്നും കൂട്ടിച്ചേർത്തു. പ്രധാനമന്ത്രി നരേന്ദ്ര മോദിയുടെയും കേന്ദ്ര ആഭ്യന്തര മന്ത്രി അമിത് ഷായുടെയും അജണ്ടകൾക്ക് അനുസൃതമായാണ് ഗ്യാനേഷ് കുമാർ തിരഞ്ഞെടുപ്പ് കമ്മിഷനെ മുന്നോട്ട് നയിക്കുന്നതെന്നും ഖർഗെ രൂക്ഷമായി വിമർശിച്ചു.
