കൊച്ചി കായലിൽ അത്യാഡംബര ഹൗസ് ബോട്ട്: 8 ബെഡ്‌റൂമുകളും കോൺഫറൻസ് ഹാളും സജ്ജം
കൊച്ചി കായലിന്റെ മനോഹാരിത ഹൗസ് ബോട്ടിലിരുന്ന് ആസ്വദിക്കാൻ ഇനി അവസരം. എട്ട് കിടപ്പുമുറികളും വിപുലമായ കോൺഫറൻസ് ഹാളും സജ്ജീകരിച്ചിട്ടുള്ള ഈ ഹൗസ് ബോട്ടിന്റെ ഔദ്യോഗിക ഉദ്ഘാടനം നവംബർ 13 വെള്ളിയാഴ്ച വൈകിട്ട് അഞ്ചുമണിക്ക് മറൈൻ ഡ്രൈവിലെ കൊച്ചിൻ ബോട്ട് ക്ലബ് ജെട്ടിയിൽ വെച്ച് മുഖ്യമന്ത്രി വി.ഡി. സതീശൻ നിർവഹിക്കും. ചടങ്ങിൽ എംപി ഹൈബി ഈഡൻ മുഖ്യാതിഥിയായി പങ്കെടുക്കും.
കൊച്ചി കായലിൽ രാത്രി താമസിക്കാൻ സൗകര്യമുള്ള ഹൗസ് ബോട്ട് സർവീസ് ഇതാദ്യമായാണ് നിലവിൽ വരുന്നത്. നഗരക്കാഴ്ചകളും ഗ്രാമീണ ഭംഗിയും ഒരേസമയം ആസ്വദിക്കാൻ കഴിയുന്നുവെന്നതാണ് ‘സൺറൈസ് ഹൗസ് ബോട്ട് ക്രൂയിസി’ന്റെ പ്രധാന സവിശേഷത. ഒരേസമയം 24 പേർക്ക് സുഖകരമായി താമസിക്കാനുള്ള സൗകര്യങ്ങൾ ഇവിടെയുണ്ട്. കൂടാതെ ഡേ പാക്കേജുകളും ഡിന്നർ പാക്കേജുകളും സന്ദർശകർക്കായി ഒരുക്കിയിട്ടുണ്ട്. 30 പേരടങ്ങുന്ന സംഘമാണെങ്കിൽ പ്രത്യേക പാക്കേജുകൾ വഴി നഗരത്തിന്റെയും ഗ്രാമത്തിന്റെയും ദൃശ്യവിരുന്നൊരുക്കാം. ഒപ്പം പെപ്പർ ദ്വീപിലെ വിനോദപരിപാടികളിലും സജീവമായി പങ്കുചേരാം.
ഏകദേശം മൂന്ന് കോടി രൂപയുടെ നിക്ഷേപത്തോടെയാണ് ഈ അത്യാഡംബര ഹൗസ് ബോട്ട് പദ്ധതി പൂർത്തീകരിച്ചിരിക്കുന്നത്. കേരളത്തിന്റെ പ്രീമിയം ടൂറിസം മേഖലയിൽ പുതിയ സാധ്യതകൾ തുറന്നിടാനും, ആഭ്യന്തര-വിദേശ സഞ്ചാരികളെ ആകർഷിക്കാനും ലക്ഷ്യമിട്ടാണ് ലക്ഷ്വറി ക്രൂയിസ് രംഗത്തേക്ക് കടന്നതെന്ന് ഗ്രീനിക്സ് അധികൃതർ അറിയിച്ചു. കൊച്ചിയെ സാംസ്കാരിക ടൂറിസത്തിന്റെയും ലക്ഷ്വറി ജലവിനോദങ്ങളുടെയും കേന്ദ്രമായി മാറ്റാനാണ് തങ്ങളുടെ പദ്ധതിയെന്ന് ഗ്രീനിക്സ് എക്സ്പീരിയൻസ് വ്യക്തമാക്കി. ആവശ്യമായ അടിസ്ഥാന സൗകര്യങ്ങൾ ഉറപ്പാക്കിയാൽ കൊച്ചിയിൽ മികച്ചൊരു വാട്ടർ ടൂറിസം സംസ്കാരം വളർത്തിയെടുക്കാൻ സാധിക്കുമെന്ന് സ്റ്റാലിൻ ബെന്നി അഭിപ്രായപ്പെട്ടു. ബോട്ടുകൾ സുരക്ഷിതമായി നങ്കൂരമിടാനുള്ള സൗകര്യം വർദ്ധിപ്പിക്കണമെന്നും, ഇത്തരം അത്യാഡംബര ബോട്ടുകൾ നിർമ്മിക്കുന്നതിനായുള്ള സാങ്കേതിക സഹായങ്ങൾ ലഭ്യമാക്കാൻ നടപടികൾ വേണമെന്നും അദ്ദേഹം കൂട്ടിച്ചേർത്തു.
