വൈക്കം മുൻ സിഐക്കെതിരെ കേസ്: അതിഥിത്തൊഴിലാളിയുടെ അക്കൗണ്ട് വഴി കൈക്കൂലി വാങ്ങിയതിന് അറസ്റ്റ്
തിരുവനന്തപുരം∙ മണ്ണ് മാഫിയയുമായും ക്രിമിനൽ കേസുകളിലെ പ്രതികളുമായും ഒത്തുകളിച്ച് കൈക്കൂലി വാങ്ങിയെന്നാരോപിച്ച് വൈക്കം മുൻ സിഐ ഷമീർഖാനെ വിജിലൻസ് സംഘം അറസ്റ്റ് ചെയ്തു. നേരത്തെ ഇദ്ദേഹത്തിനെതിരെ കേസെടുക്കുകയും സർവീസിൽ നിന്ന് സസ്‌പെൻഡ് ചെയ്യുകയും ചെയ്തിരുന്നു.
വൈക്കം സിഐ ആയിരിക്കെ ഷമീർഖാൻ, അസം സ്വദേശിയായ ഒരാളുടെ പേരിൽ വൈക്കത്തെ ഒരു കനറാ ബാങ്ക് ശാഖയിൽ 2026 സെപ്റ്റംബർ 5-ന് പുതിയ ബാങ്ക് അക്കൗണ്ട് തുറക്കുകയായിരുന്നു. ഇതിനായി അപേക്ഷയിൽ നൽകിയത് വൈക്കം സ്വദേശിയായ അരുൺ എന്നയാളുടെ മൊബൈൽ നമ്പറാണ്. എന്നാൽ, ഈ അക്കൗണ്ടുമായി ബന്ധപ്പെട്ട എടിഎം കാർഡും സിം കാർഡും സ്വന്തം കസ്റ്റഡിയിലാണ് അദ്ദേഹം സൂക്ഷിച്ചിരുന്നത്.
2026 സെപ്റ്റംബർ 5 മുതൽ ഒക്ടോബർ 16 വരെയുള്ള കാലയളവിൽ മണ്ണ് മാഫിയാ സംഘങ്ങൾ, ലോറി ഉടമകൾ, വിവിധ ക്രിമിനൽ കേസുകളിൽ ഉൾപ്പെട്ടവർ എന്നിവരിൽ നിന്ന് യുപിഐ ഇടപാടുകളിലൂടെ 2,27,000 രൂപ ഇദ്ദേഹം കൈക്കലാക്കിയതായാണ് വിജിലൻസിന്റെ അന്വേഷണത്തിൽ കണ്ടെത്തിയത്.
