പ്രസംഗത്തിനിടെ നെതന്യാഹുവിനെതിരെ പ്രതിഷേധിച്ചയാൾക്കെതിരെ പ്രതികരിച്ച് സാറ നെതന്യാഹു
ജറുസലം ∙ ഇസ്രായേൽ പ്രധാനമന്ത്രി ബെന്യാമിൻ നെതന്യാഹു പാർലമെന്റിൽ പ്രസംഗിക്കുന്നതിനിടെ അദ്ദേഹത്തിന്റെ ഭാര്യ സാറ നെതന്യാഹുവും പ്രതിപക്ഷ നേതാവായ നഫ്താലി ബെന്നറ്റും തമ്മിൽ രൂക്ഷമായ വാഗ്വാദം നടന്നതിന്റെ ദൃശ്യങ്ങൾ പുറത്തുവന്നു. പാർലമെന്റ് അംഗങ്ങളെ അഭിസംബോധന ചെയ്ത് നെതന്യാഹു സംസാരിച്ചുകൊണ്ടിരിക്കെ, പ്രസംഗത്തിൽ തടസ്സമുണ്ടാക്കിക്കൊണ്ട് നഫ്താലി ബെന്നറ്റ് ഇടപെട്ടതാണ് തർക്കത്തിന് തുടക്കമിട്ടത്. പിന്നാലെ സാറ നെതന്യാഹു വിഷയത്തിൽ ഇടപെടുകയും ഇരുവരും തമ്മിൽ വാക്കേറ്റം ഉണ്ടാവുകയുമായിരുന്നു.
ദേശീയ താൽപ്പര്യങ്ങൾ പരിഗണിച്ച് രാജ്യത്തിന്റെ ഐക്യത്തിനായി പ്രധാനമന്ത്രി നെതന്യാഹു ആഹ്വാനം ചെയ്യുന്നതിനിടെയാണ് മുൻ പ്രധാനമന്ത്രി കൂടിയായ നഫ്താലി ബെന്നറ്റ് അദ്ദേഹത്തിന്റെ പ്രസംഗം തടസ്സപ്പെടുത്തിയത്. ഒക്ടോബർ ഏഴിന് നടന്ന ആക്രമണത്തെക്കുറിച്ചുള്ള അന്വേഷണ റിപ്പോർട്ടുകളെക്കുറിച്ചും നിലവിലെ ഭരണകൂടത്തിനെതിരെ ഉയർന്നുവരുന്ന വിമർശനങ്ങൾക്കും കൃത്യമായ മറുപടി നൽകണമെന്ന് ബെന്നറ്റ് നെതന്യാഹുവിനോട് ആവശ്യപ്പെട്ടു. സഭയിൽ മുഴങ്ങിക്കേട്ട ബെന്നറ്റിന്റെ ഉച്ചത്തിലുള്ള ചോദ്യങ്ങൾ പ്രസംഗം തടസ്സപ്പെടുത്തിയതിനൊപ്പം നെതന്യാഹുവിന്റെ ശ്രദ്ധയും തിരിച്ചുവിട്ടു. ബഹളം കേട്ട ഭാഗത്തേക്ക് നെതന്യാഹു നോക്കുന്നതും ദൃശ്യങ്ങളിൽ കാണാൻ സാധിക്കും.
