BUSINESS
സൂര്യനേക്കാള് ചൂട്, 582 ടണ് ഭാരമുള്ള കാന്തം; കൃത്രിമ സൂര്യന് പദ്ധതിയില് വന് ജയവുമായി ചൈന, പരിധിയില്ലാത്ത ഊര്ജ്ജ സ്രോതസ്
China Fusion Magnet Test: ലോകത്തെ അമ്പരപ്പിച്ച് കൃത്രിമ സൂര്യന് പദ്ധതിയില് പ്രധാനപ്പെട്ട ഘട്ടം പൂര്ത്തീകരിച്ച് ചൈന. അനന്തവും ശുദ്ധവുമായ ഊര്ജ്ജസ്വപ്നത്തിലേക്ക് മാനവരാശി ഒരടി കൂടി അടുക്കുന്നുവെന്ന് പറയാം. ചൈനയുടെ കൃത്രിമ സൂര്യന് പദ്ധതിയിലെ നിര്ണായക കാന്തിക പരീക്ഷണം പൂര്ത്തിയായെന്നാണ് റിപ്പോര്ട്ടുകള് വ്യക്തമാക്കുന്നത്. ലോകത്തിന്റെ ഭാവി തന്നെ മാറ്റിമറിക്കുന്ന പരിസ്ഥിതി സൗഹൃദ ഊര്ജ്ജവിപ്ലവമാണ് ഇത്. ചൈനയുടെ കൃത്രിമ സൂര്യന് (Artificial Sun, Nuclear Fusion ) പദ്ധതിയെക്കുറിച്ചു നിങ്ങള് അറിയേണ്ട കാര്യങ്ങളാണ് താഴെ പറയുന്നത്.കൃത്രിമ സൂര്യന് പ്രധാന അപ്ഡേറ്റുകള് ചൈനയുടെ കൃത്രിമ സൂര്യന് പദ്ധതിക്കായി വികസിപ്പിച്ച രണ്ട് പ്രധാന സൂപ്പര്കണ്ടക്റ്റിംഗ് ഫ്യൂഷന് മാഗ്നറ്റുകളുടെ (Superconducting Magnets) സാങ്കേതിക പരിശോധനയാണ് നിലവില് വിജയകരമായി പൂര്ത്തിയാക്കിയത്. അന്ഹുയി പ്രവിശ്യയിലെ ഹെഫെയ്യിലുള്ള CRAFT (Comprehensive Research Facility for Fusion Technology) കാമ്പസിലാണ് ഈ നിര്ണായക നേട്ടം ചൈന കൈവരിച്ചത്.ചൈനീസ് അക്കാദമി ഓഫ് സയന്സസിന്റെ (CAS) കീഴിലുള്ള ഇന്സ്റ്റിറ്റ്യൂട്ട് ഓഫ് പ്ലാസ്മ ഫിസിക്സ് നിര്മ്മിച്ച, 582 ടണ് ഭാരമുള്ള ‘D’ ആകൃതിയിലുള്ള ‘ടോറോയിഡല് ഫീല്ഡ് മാഗ്നറ്റും’ (Toroidal Field Magnet), ‘സെന്ട്രല് സോളനോയിഡ് കോയിലും’ എല്ലാ പരിശോധനകളും വിജയകരമായി പൂര്ത്തിയാക്കിയെന്നാണ് റിപ്പോര്ട്ട്.വളരെ പ്രധാന്യമുള്ള ഘട്ടംപ്ലാസ്മ തടഞ്ഞുനിര്ത്തലാണ് ഈ കാന്തങ്ങളുടെ പ്രധാന ലക്ഷ്യം. കൃത്രിമ സൂര്യനുള്ളില് പ്ലാസ്മ 100 ദശലക്ഷം ഡിഗ്രി സെല്ഷ്യസിലധികം ചൂടാക്കുന്നു. ഇത് സൂര്യന്റെ കേന്ദ്രത്തേക്കാള് ഉയര്ന്ന ചൂടാണ് സൃഷ്ടിക്കുന്നത്. ഫ്രാന്സില് നിര്മ്മിക്കുന്ന അന്താരാഷ്ട്ര ഫ്യൂഷന് പദ്ധതിയായ ITER-ലെ മാഗ്നറ്റുകളേക്കാള് 1.3 ഇരട്ടി വലിപ്പവും, 3 ഇരട്ടി ഊര്ജ്ജ സംഭരണശേഷിയുമുള്ള ഫ്യൂഷന് മാഗ്നറ്റാണ് ചൈന വിജയിപ്പിച്ചിരിക്കുന്നത്. 100% തദ്ദേശീയ സാങ്കേതികവിദ്യയാണ് ചൈന ഉപയോഗിച്ചിരിക്കുന്നത്.പദ്ധതി പ്രാധാന്യം അറിയണം കാര്ബണ് പുറന്തള്ളല് ഇല്ലാത്തതും, പരിസ്ഥിതി സൗഹൃദവുമായ നിര്ബാധ ഊര്ജ്ജസ്രോതസാണ് ചൈന ലക്ഷ്യം വയ്ക്കുന്നത്. സാധാരണ അണുശക്തി നിലയങ്ങളിലെപ്പോലെ ഉരുകല് ഭീഷണിയോ, നൂറ്റാണ്ടുകളോളം നശിക്കാത്ത റേഡിയോ ആക്ടീവ് മാലിന്യങ്ങളോ ഇവിടെ ഇല്ല. കടല്വെള്ളത്തില് നിന്നും മണ്ണില് നിന്നും എളുപ്പത്തില് വേര്തിരിച്ചെടുക്കാവുന്ന ഹൈഡ്രജന് ഐസോടോപ്പുകളാണ് (ഡ്യൂട്ടീരിയം, ട്രീറ്റിയം) ഇവയില് ഇന്ധനമായി ഉപയോഗിക്കുന്നത്.പദ്ധതിയുടെ ചെലവ്കൃത്രിമ സൂര്യന് സാങ്കേതികവിദ്യക്കായി ചൈനീസ് സര്ക്കാര് പ്രതിവര്ഷം ഏകദേശം 1.5 ബില്യണ് യുഎസ് ഡോളര് (ഏകദേശം 12,500 കോടി രൂപ) ചെലവഴിക്കുന്നുവെന്നാണ് റിപ്പോര്ട്ടുകള് വ്യക്തമാക്കുന്നത്. മാഗ്നറ്റ് ടെസ്റ്റ് നടന്ന CRAFT റിസര്ച്ച് കാമ്പസിന് മാത്രം ഏകദേശം 700 മില്യണ് ഡോളര് (ഏകദേശം 5,800 കോടി രൂപ) ചെലവഴിച്ചിട്ടുണ്ട്. 2025-ല് സ്ഥാപിച്ച ‘China Fusion Energy’ കമ്പനിക്കായി 2.1 ബില്യണ് ഡോളര് നിക്ഷേപവും സര്ക്കാര് അനുവദിച്ചിട്ടുണ്ട്.കൃത്രിമ സൂര്യന്റെ പ്രവര്ത്തനം എങ്ങനെ?യഥാര്ത്ഥ സൂര്യന്റെ ഉള്ളില് ഊര്ജ്ജം ഉല്പ്പാദിപ്പിക്കപ്പെടുന്ന അതേ പ്രക്രിയ ഭൂമിയില് അനുകരിക്കുകയാണ് ചൈന. ഡ്യൂട്ടീരിയം, ട്രീറ്റിയം വാതകങ്ങളെ 100 ദശലക്ഷം ഡിഗ്രി സെല്ഷ്യസിലധികം ചൂടാക്കിയാണ് പരീക്ഷണം. അതിശക്തമായ ചൂടില് വാതകം ‘പ്ലാസ്മ’ അവസ്ഥയിലെത്തുന്നു. ‘ടോക്കാമാക്’ (Tokamak) എന്ന ഡോനട്ട് ആകൃതിയിലുള്ള യന്ത്രത്തിനുള്ളില് സൂപ്പര്കണ്ടക്റ്റിംഗ് കാന്തങ്ങള് സൃഷ്ടിക്കുന്ന ശക്തിയേറിയ കാന്തികമണ്ഡലത്താല് ഈ പ്ലാസ്മയെ റിയാക്ടറിന്റെ ഭിത്തികളില് തട്ടാതെ തടഞ്ഞുനിര്ത്തുന്നു. ചെറിയ അറ്റോമിക് ന്യൂക്ലിയസുകള് കൂടിച്ചേരുമ്പോള് ഉണ്ടാകുന്ന ഭീമമായ താപോര്ജ്ജം ഉപയോഗിച്ച് നീരാവി നിര്മ്മിക്കുകയും, അതുവഴി ടര്ബൈനുകള് കറക്കി വൈദ്യുതി ഉല്പ്പാദിപ്പിക്കുകയും ചെയ്യുന്നു.(മുകളില് പറഞ്ഞ കാര്യങ്ങള് നിലവില് ലഭ്യമായ റിപ്പോര്ട്ടുകള് അടിസ്ഥാനമാക്കി മാത്രമാണ്. കൂടുതല് വ്യക്തത വരുത്താവുന്നതാണ്.)
Read News
