BUSINESS
കൈയില് നിന്ന് ഒരു രൂപ മുടക്കേണ്ട; വീട്ടില് സോളാര് വെക്കാം, 78,000 രൂപ സബ്സിഡിയും മാസം 300 യൂണിറ്റ് സൗജന്യ വൈദ്യുതിയും
3 KW Rooftop Solar Cost and Subsidy: വൈദ്യുതി ബില്ലിന്റെ പ്രതിമാസ ഭാരത്തില് നിന്ന് ശാശ്വതമായി ആശ്വാസം നേടാന് ആഗ്രഹിക്കുന്ന സാധാരണക്കാരന് ആണോ നിങ്ങള്. എങ്കില് നിങ്ങള്ക്ക് വീടുകളില് സോളര് ഘടിപ്പിക്കുന്നത് പരിഗണിക്കാം. നിലവില് ഏറ്റവും അനുയോജ്യമായ സ്കീം പിഎം സൂര്യഘര് പദ്ധതി തന്നെ. ഈ മേല്ക്കൂര സോളാര് പദ്ധതിക്ക് 78,000 രൂപ വരെ സബ്സിഡി വാഗ്ദാനം ചെയ്യുന്നു. പക്ഷെ പ്ലാന്റ് സ്ഥാപിക്കുന്നതിന് ഈ തുക പോരല്ലോ എന്നാണോ നിങ്ങള് ചിന്തിക്കുന്നത്. എന്നാല് കൈയ്യില് നിന്ന് ഒരു രൂപ മുടക്കാതെ, പണമൊന്നും മുന്കൂറായി നല്കാതെ തന്നെ നിങ്ങള്ക്ക് ഈ പ്ലാന്റുകള് സ്ഥാപിക്കാന് കഴിയും. ഇതിന് മികച്ച ഒരു ബാങ്ക് വായ്പയും, കൃത്യമായ ആസൂത്രണവുമാണ് ആവശ്യം. മേല്ക്കൂര സോളാര് പ്ലാന്റ് സ്ഥാപിക്കുന്നതുമായി ബന്ധപ്പെട്ട നിങ്ങളുടെ സംശയങ്ങള്ക്കുള്ള ഉത്തരങ്ങളാണ് താഴെ ചേര്ക്കുന്നത്. കൈയ്യില് നിന്ന് പണം മുടക്കാതെ ഇന്സ്റ്റാള് ചെയ്യാം കൈയ്യില് നിന്ന് ഒരു രൂപ പോലും മുടക്കേണ്ടെന്ന് പറഞ്ഞാല് പ്ലാന്റ് സൗജന്യം എന്നല്ല അര്ത്ഥം. ഈ പദ്ധതിയെ വിജയിപ്പിക്കുന്നതിനായി സര്ക്കാര് തന്നെ ബാങ്കുകള് വഴി നല്കിവരുന്ന പ്രത്യേക വായ്പ സ്കീമാണ് നേട്ടമാകുന്നത്. ബാങ്ക് വായ്പ വഴി കൈയ്യില് നിന്ന് ഒരു രൂപ പോലും മുടക്കാതെ ഈ പ്ലാന്റ് സ്ഥാപിക്കാം. ചെലവും സബ്സിഡിയുംപ്രതിമാസം 300 യൂണിറ്റ് സൗജന്യ വൈദ്യുതിയാണ് കെഎസ്ഇബി പോലുള്ള സംസ്ഥാന വൈദ്യുതി സ്ഥാപനങ്ങള് സോളാര് ഉപഭോക്താക്കള്ക്ക് നല്കി വരുന്നത്. അതിനാല് തന്നെ നിങ്ങള് 3 കിലോവാട്ട് ശേഷിയുള്ള ഒരു പ്ലാന്റ് സ്ഥാപിക്കുന്നതാകും ഉത്തമം. ഇത്തരമൊരു പ്ലാന്റിന് ഏകദേശം 1.5 ലക്ഷം രൂപ മുതല് 2.5 ലക്ഷം രൂപ വരെ ചെലവ് പ്രതീക്ഷിക്കാം. 3 കിലോവാട്ട് മുതല് മുകളിലേയ്ക്കുള്ള ഇന്സ്റ്റാളേഷനുകള്ക്ക് സര്ക്കാര് നല്കുന്ന പരമാവധി സബ്സിഡി തുക 78,000 രൂപയാണ്. ബാങ്ക് വായ്പയും ഇഎംഐയും എസ്ബിഐ, കാനറ ബാങ്ക്, എച്ച്ഡിഎഫ്സി ബാങ്ക് പോലുള്ള പ്രമുഖ ബാങ്കുകള് എല്ലാം തന്നെ സോളാര് സ്ഥാപിക്കാന് വായ്പകള് നല്കുന്നുണ്ട്. ഇത്തരം വായ്പകള് 5.5% പലിശ നിരക്ക് മുതല് ലഭ്യമാണ്. ഈ വായ്പയ്ക്ക് നിങ്ങള് ഈടോ പ്രോസസിങ് ഫീസോ നല്കേണ്ടതുമില്ല. സബ്സിഡി തുക ഈ അക്കൗണ്ടില് എത്തുന്നതോടെ ഇഎംഐ ഭാരം കുറയുകയും ചെയ്യും. പ്ലാന്റ് സ്ഥാപിക്കുന്നതോടെ പ്രതിമാസ കെഎസ്ഇബി ബില്ലില് ഉണ്ടാകുന്ന ലാഭം ഉപയോഗിച്ച് ബാങ്ക് ഇഎംഐ അടയ്ക്കാം. വായ്പാ കാലാവധി കഴിയുമ്പോള് പ്ലാന്റ് പൂര്ണ്ണമായും നിങ്ങളുടെ സ്വന്തമാവുകയും, തുടര്ന്നുള്ള വര്ഷങ്ങളില് സൗജന്യമായി വൈദ്യുതി ലഭിക്കുകയും ചെയ്യും.പണം ഇങ്ങോട്ട് ലഭിക്കുംനിങ്ങള്ക്ക് പ്രതിമാസം 300 യൂണിറ്റാണ് കെഎസ്ഇബി സൗജന്യമാക്കി നല്കുന്നത്. എന്നു കരുതി കാര്യങ്ങള് ഇവിടെ കഴിയുന്നുവെന്ന് അര്ത്ഥമില്ല. നിങ്ങള് മാസം ഉല്പ്പാദിപ്പിക്കുന്ന മുഴുവന് യൂണിറ്റും കെഎസ്ഇബി ഗ്രിഡില് എത്തുന്നു. ഇതില് നിന്ന് നിങ്ങളുടെ ഉപയോഗം കുറച്ചുള്ള യൂണിറ്റ് നിങ്ങളുടെ സോളാര് അക്കൗണ്ടില് വരവ് വയ്ക്കും. ഇങ്ങനെ സൂക്ഷിക്കപ്പെടുന്ന യൂണിറ്റുകള്ക്ക് സാമ്പത്തിക വര്ഷത്തിന്റെ അവസാനം കെഎസ്ഇബി പണം നല്കും. ഈ പണം നിങ്ങള് വായ്പയിലേയ്ക്ക് അടയ്ക്കുകയോ, സ്വന്തം ആവശ്യങ്ങള്ക്കായി ഉപയോഗിക്കുകയോ ചെയ്യാം. ചെലവ് കുറയ്ക്കാനുള്ള 5 പ്രധാന വഴികള്കൃത്യമായ ശേഷി തിരഞ്ഞെടുക്കുക: ഒരു സാധാരണ കുടുംബത്തില് 3 കിലോവാട്ട് പ്ലാന്റ് തന്നെ ധാരളമാണ്. ആഡംബരം കാട്ടാന് വലിയ പ്ലാന്റുകള് സ്ഥാപിക്കേണ്ടതില്ല. 3 കിലോ വാട്ടിന് മുകളില് എത്ര ശേഷിയുള്ള പ്ലാന്റ് വച്ചാലും ലഭിക്കുന്ന പരമാവധി സബ്സിഡി 78,000 രൂപ തന്നെയാണ്. അനാവശ്യമായി വലിയ പ്ലാന്റ് വയ്ക്കുന്നത് അധിക ചെലവുണ്ടാക്കും.വെണ്ടര്മാരുടെ നിരക്കുകള് താരതമ്യം ചെയ്യുക: PM Surya Ghar പോര്ട്ടലില് അംഗീകൃതരായ (Empanelled) വെയര്ഹൗസുകളില് നിന്നും, വെണ്ടര്മാരില് നിന്നും ഒന്നിലധികം കൊട്ടേഷന് വാങ്ങി പാനലുകളുടെയും, ഇന്വര്ട്ടറുകളുടെയും ബ്രാന്ഡ്, വില താരതമ്യം ചെയ്ത് തീരുമാനമെടുക്കുക. ഫ്രെയിം/ സ്ട്രക്ചര് ചെലവ് നിയന്ത്രിക്കുക: സാധാരണ മേല്ക്കൂരയില് പാനല് ഉറപ്പിക്കാന് ചെലവ് കുറവാണ്. എന്നാല് വളരെ ഉയരമുള്ള സ്ട്രക്ചറുകള് നിര്മ്മിക്കുമ്പോള് 15,000- 30,000 വരെ അധിക ചെലവ് വരാം. അനാവശ്യ ഉയരം ഒഴിവാക്കുക.പിഎം സൂര്യഘര് സ്പെഷ്യല് ലോണ് ഉപയോഗിക്കുക: സോളാര് സ്ഥാപിക്കാന് സാധാരണ പേഴ്സണല് ലോണുകള് എടുക്കരുത്. ഇവിടെ പലിശ നിരക്ക് 11%-16% വരെയാകാം. എന്നാല് ബാങ്കുകളുടെ സ്പെഷ്യല് സോളര് വായ്പകള് 5.5% മുതല് പലിശയ്ക്ക് ലഭ്യമാണ്. സബ്സിഡി തുക വായ്പാ അക്കൗണ്ടിലേക്ക് ക്രഡിറ്റ് ആകുമ്പോള് പലിശ ഭാരം വീണ്ടും കുറയും. ANERT / KSEB അംഗീകൃത ഏജന്സികള്: സോളാര് പദ്ധതിയില് നെറ്റ് മീറ്ററിങ് (Net Metering) വളരെ പ്രധാനമാണ്. ഇത്തരം പ്ലാന്റുകളുടെ അപ്രൂവലുകള്ക്ക് അധിക തുക ഈടാക്കാത്ത ഏജന്സികളെ തിരഞ്ഞെടുക്കുക. അനെര്ട്ടിന്റെയോ, കെഎസ്ഇബിയുടേയോ പോര്ട്ടല് വഴി പ്രൊസസ് ചെയ്യുന്നത് അനാവശ്യ ഏജന്സി ഫീസുകള് ഒഴിവാക്കാന് സഹായിക്കും.
Read News
