നിങ്ങളുടെ മണ്ടത്തരങ്ങള്‍; ഉപയോക്താക്കള്‍ അറിയാതെ ബാങ്ക് അക്കൗണ്ട് ചോരുന്ന വഴികള്‍, സൂക്ഷിക്കുക

Banking Tips: ഇന്ത്യ ഡിജിറ്റല്‍ യുഗത്തിലാണ്. സാധാരണക്കാര്‍ പോലും ഡിജിറ്റല്‍ പേമെന്റ് മാര്‍ഗങ്ങള്‍ സ്വീകരിക്കുന്നു. അതിനാല്‍ തന്നെ കാര്യങ്ങള്‍ എല്ലാം ബാങ്ക് അക്കൗണ്ടിനെ ചുറ്റിപ്പറ്റി കിടക്കുന്നു. എന്നാല്‍ നിങ്ങളില്‍ എത്രപേര്‍ കൃത്യമായി ബാങ്ക് അക്കൗണ്ട് സ്‌റ്റേറ്റ്‌മെന്റുകള്‍ പരിശോധിക്കാറുണ്ട്? ഓണ്‍ലൈന്‍ തട്ടിപ്പുകാരെ മാത്രം പേടിച്ചാല്‍ പോരാ, നമ്മള്‍ വരുത്തുന്ന ചെറിയ അശ്രദ്ധകള്‍ കൊണ്ടും ബാങ്ക് അക്കൗണ്ടിലെ പണം ചോരാമെന്നതാണ് സത്യം. പലരും ബാങ്ക് അക്കൗണ്ടുകള്‍ പരിശോധിക്കാത്തതുകൊണ്ട് തന്നെ ഈ അബദ്ധങ്ങള്‍ പലപ്പോഴും തിരിച്ചറിയാറുമില്ല. സബ്സ്‌ക്രിപ്ഷനുകളും, മിനിമം ബാലന്‍സും ഉള്‍പ്പെടെ നമ്മള്‍ ശ്രദ്ധിക്കാതെ പോകുന്ന 7 വലിയ അബദ്ധങ്ങളെക്കുറിച്ചാണ് ഈ ലേഖനം.ഓട്ടോ ഡെബിറ്റ്/ സബ്സ്‌ക്രിപ്ഷനുകള്‍: ഇന്ന് ഒടിടി പ്ലാറ്റ്‌ഫോമുകള്‍ ഉപയോഗിക്കുന്ന നിരവധി ആളുകളുണ്ട്. ഇത്തരം ഒടിടി പ്ലാറ്റ്‌ഫോമുകള്‍ എല്ലാം തന്നെ ഓട്ടോ ഡെബിറ്റ് സബ്‌സ്‌ക്രിപ്ഷന്‍ മോഡലില്‍ പ്രവര്‍ത്തിക്കുന്നു. അതായത് നിങ്ങള്‍ സേവനം ഉപയോഗിച്ചാലും ഇല്ലെങ്കിയും അവര്‍ അക്കൗണ്ടില്‍ നിന്ന് പണം കൊണ്ടുപോകും. ഇന്ന് പല മൊബൈല്‍ റീചാര്‍ജുകള്‍ക്കുമൊപ്പം ഒടിടി സബ്‌സ്‌ക്രിപ്ഷനുകള്‍ സൗജന്യമായി ലഭിക്കുന്നുണ്ട്. എന്നാല്‍ പലരും ഈ സൗജന്യത്തിനൊപ്പം ഇപ്പോഴും പണ്ട് സെറ്റ് ചെയ്ത ഓട്ടോ ഡെബിറ്റ് പിന്തുടര്‍ന്ന് പോരുന്നുണ്ട്. ഒടിടി പ്ലാറ്റ്ഫോമുകള്‍ മാത്രമല്ല, ജിം മെമ്പര്‍ഷിപ്പുകള്‍, ട്രയല്‍ കാലയളവിനു ശേഷം ക്യാന്‍സല്‍ ചെയ്യാന്‍ മറന്നുപോയ സേവനങ്ങള്‍ ഇങ്ങനെ പണം പോകുന്ന വഴികള്‍ ഏറെയാണ്. മിനിമം ബാലന്‍സ് : സേവിംഗ്‌സ് അക്കൗണ്ടുകളില്‍ പ്രതിമാസ ശരാശരി ബാലന്‍സ് സൂക്ഷിക്കേണ്ടതുണ്ട്. ഇതിന്റെ നിബന്ധകളും, പിഴകളും അക്കൗണ്ട് തരം, ബാങ്ക് എന്നിവ അനുസരിച്ച് മാറും. നിങ്ങള്‍ വരുത്തുന്ന പിഴവുകള്‍ പിഴയിനത്തില്‍ വലിയ ബാധ്യതയാകും. ബാങ്ക് എടിഎമ്മുകളുടെ അമിത ഉപയോഗം: എപ്പോഴും കുറച്ചു പണം കൈവശം ലിക്വിഡ് ആയി സൂക്ഷിക്കുന്നത് നല്ലതാണ്. നിങ്ങള്‍ സ്ഥിരമായി എടിഎം ഉപയോഗിക്കുന്ന ഒരു വ്യക്തിയാണെങ്കില്‍ ഇത്തരം ഇടപാടുകള്‍ വഴി നിങ്ങള്‍ക്ക് മാസവും ഒരു വലിത തുക നഷ്ടമാകുന്നുണ്ടാകാം. നിങ്ങള്‍ സ്വന്തം ബാങ്കിന്റെയല്ലാതെ മറ്റ് ബാങ്കുകളുടെ എടിഎമ്മുകള്‍ പരിധിയില്‍ കൂടുതല്‍ ഉപയോഗിക്കുന്നുവെങ്കില്‍ ഈ നഷ്ടം വര്‍ധിക്കുകയും ചെയ്യും. ക്രെഡിറ്റ് കാര്‍ഡ് ബില്ലുകള്‍: പലരും ഇന്ന് കെഡ്രിറ്റ് കാര്‍ഡ് ബില്ലിലെ ‘മിനിമം ഡ്യൂ’ (Minimum Due) മാത്രം അടച്ച് ബാക്കി തുക മാറ്റിവെക്കുന്ന പതിവുണ്ട്. ഇതൊരു തെറ്റായ പ്രവണതയാണ്. ഇത് ബാക്കി തുകയ്ക്ക് മേല്‍ 35% മുതല്‍ 45% വരെ ഭീമമായ പലിശയ്ക്കും, ലേറ്റ് ഫീസിനും വഴിവയ്ക്കും. ഇത് സത്യത്തില്‍ നിങ്ങളുടെ അക്കൗണ്ടിനെ ചോര്‍ത്തുന്നതിന് തുല്യമാണ്. അക്കൗണ്ടുകള്‍ ക്ലോസ് ചെയ്യാതെ ഉപേക്ഷിക്കുന്നത്: ഉപയോഗിക്കാത്ത പഴയ അക്കൗണ്ടുകളോ, സേവിങ്‌സ് അക്കൗണ്ടുകളോ കൃത്യമായി ക്ലോസ് ചെയ്യാത്തതും മണ്ടത്തരമാണ്. ഇവ മിനിമം ബാലന്‍സ് ഇല്ലാത്ത അക്കൗണ്ടുകളായി മാറും. ഇവിടെ പിഴ, ഡെബിറ്റ് കാര്‍ഡ് ചാര്‍ജ്ജുകള്‍ എന്നിവ സൃഷ്ടിക്കപ്പെടുന്നു. ആവശ്യമില്ലാത്ത അക്കൗണ്ടുകള്‍ ശരിയായി ക്ലോസ് ചെയ്യുക എന്നത് വളരെ പ്രധാനമാണ്. മറ്റ് സര്‍വീസ് ചാര്‍ജ്ജുകള്‍: എസ്എംഎസ് അലേര്‍ട്ടുകള്‍, ഡെബിറ്റ് കാര്‍ഡ് വാര്‍ഷിക ഫീസ്, ചെക്ക് ബുക്ക് ചാര്‍ജ്ജുകള്‍ എന്നിവ നിങ്ങള്‍ പരിശോധിക്കാറുണ്ടോ? നിങ്ങള്‍ നോക്കിയാലും ഇല്ലേലും ബാങ്കുകള്‍ കൃത്യമായി ഇവ പിടിക്കുന്നുണ്ട്. എസ്എംഎസ് ചാര്‍ജ് സഹിക്കാം. പക്ഷെ നിങ്ങള്‍ ഇന്ന് എത്രപേര്‍ ഡെബിറ്റ് കാര്‍ഡ് ഉപയോഗിക്കുന്നുണ്ട്. എടിഎമ്മുകളില്‍ പോലും ആപ്പുകള്‍ വഴി പണം പിന്‍വലിക്കാം. പിന്നെ വര്‍ഷം തോറും എടിഎം കാര്‍ഡിന് പണം കൊടുക്കുന്നത് എന്തിനാണ്? ആവശ്യമില്ലെങ്കില്‍ ക്യാന്‍സല്‍ ചെയ്യുക. ലോണ്‍ ഇഎംഐ: അക്കൗണ്ടില്‍ പണമില്ലാത്തത് കാരണം ഹോം ലോണ്‍ അല്ലെങ്കില്‍ കാര്‍ ലോണ്‍ ഇഎംഐകള്‍ മുടങ്ങുന്നതും വലിയ പ്രശ്‌നമാണ്. ഇതിന് ബാങ്ക് ബൗണ്‍സ് ചാര്‍ജ്ജുകള്‍ ഇടാക്കും. ഇത് നിങ്ങളെ അറിയണമെന്നു നിര്‍ബന്ധമില്ല. ഇത്തരം അടവുകള്‍ തെറ്റുന്നത് നിങ്ങളുടെ സിബില്‍ (CIBIL) സ്‌കോറിനെയും ബാധിക്കും.


Read News