വായുമലിനീകരണം 1000 കടന്നു; പടക്കം പൊട്ടിച്ചതിന് 200 കേസുകൾ, ശ്വാസംമുട്ടി ഡൽഹി
ന്യൂഡൽഹി∙ പരമോന്നത കോടതിയുടെ കർശനമായ വിലക്കുകൾ നിലനിൽക്കെ തന്നെ, നിയന്ത്രണങ്ങൾ കാറ്റിൽപ്പറത്തി വ്യാപകമായി പടക്കം പൊട്ടിച്ചതോടെ ഡൽഹി-എൻസിആർ മേഖലയിൽ വായുമലിനീകരണം അതിരൂക്ഷമായി. നഗരത്തിന്റെ മിക്ക ഇടങ്ങളും കനത്ത കരിമ്പുകയിൽ മുങ്ങിയതോടെ കാഴ്ചാപരിധി ഗണ്യമായി കുറഞ്ഞു. മിക്ക സ്ഥലങ്ങളിലും വായുനിലവാര സൂചിക (എക്യുഐ) 400 എന്ന അപകടകരമായ നിലയും കടന്നു കുതിക്കുകയാണ്. ഡൽഹിക്കു പുറമെ ഹരിയാന, പഞ്ചാബ്, പടിഞ്ഞാറൻ ഉത്തർപ്രദേശ് എന്നീ പ്രദേശങ്ങളിലും സ്ഥിതി സമാനമാണ്.
ദീപാവലി ദിനത്തിൽ രാവിലെ 6 മുതൽ 7 വരെയും രാത്രി 8 മുതൽ 10 വരെയും സർക്കാർ നിബന്ധനകൾക്ക് വിധേയമായ ഹരിത പടക്കങ്ങൾ മാത്രം ഉപയോഗിക്കണമെന്നായിരുന്നു സുപ്രീംകോടതിയുടെ അന്ത്യശാസനം. എന്നാൽ, ഈ നിർദേശങ്ങൾ അവഗണിച്ച് ആഘോഷങ്ങൾക്ക് മുൻപേ തന്നെ സാധാരണ പടക്കങ്ങളും ഗുണനിലവാരമില്ലാത്ത ഇനങ്ങളും വിപണി കീഴടക്കിയിരുന്നു. ഇന്നലെ പുലർച്ചെ വരെ നഗരത്തിന്റെ വിവിധ ഭാഗങ്ങളിൽ നിയമലംഘനങ്ങൾ തുടർന്നു.
മലിനീകരണ കണക്കുകളിൽ കൃത്യതയില്ലെന്ന ആരോപണവുമായി വിദഗ്ധർ രംഗത്തെത്തിയിട്ടുണ്ട്. കഴിഞ്ഞ അഞ്ചു വർഷത്തിനിടയിലെ ഏറ്റവും മോശം വായുമലിനീകരണമാണ് ദീപാവലി ദിനത്തിൽ ഡൽഹി നേരിട്ടതെങ്കിലും, യഥാർഥ വിവരങ്ങൾ അധികൃതർ മറച്ചുവെക്കുകയാണെന്ന് ആക്ഷേപമുണ്ട്. ദീപാവലി രാത്രിയിൽ നഗരത്തിലെ 59 വായുനിലവാര നിരീക്ഷണ കേന്ദ്രങ്ങളിൽ 45 എണ്ണത്തിലും മണിക്കൂറുകളോളം വിവരങ്ങൾ രേഖപ്പെടുത്തിയിരുന്നില്ല. കേന്ദ്ര മലിനീകരണ നിയന്ത്രണ ബോർഡിന്റെ യന്ത്രങ്ങൾ പലയിടത്തും തകരാറിലായതോടെ, പുറത്തുവന്ന കണക്കുകളേക്കാൾ മലിനീകരണം വളരെ കൂടുതലാണെന്ന് പരിസ്ഥിതി പ്രവർത്തകർ മുന്നറിയിപ്പ് നൽകുന്നു.
