ദിവസവും ബദാം കഴിക്കുന്നവർ അറിയേണ്ട കാര്യങ്ങൾ
പ്രതീകാത്മക ചിത്രം
ആരോഗ്യ ഗുണങ്ങൾ ഏറെയുള്ള ഒരു ഭക്ഷണമാണ് ബദാം. തിരക്കിട്ട ജീവിതശൈലിക്കിടയിൽ എളുപ്പത്തിൽ കഴിക്കാവുന്ന പോഷകസമൃദ്ധമായ ഒരു ലഘുഭക്ഷണം കൂടിയാണിത്. പ്രോട്ടീൻ, ഫൈബർ, ഗുണകരമായ കൊഴുപ്പുകൾ എന്നിവയാൽ സമ്പന്നമായ ബദാം പതിവായി കഴിക്കുന്നവർ നിരവധിയാണ്. എങ്കിലും, ഇവയുടെ കൃത്യമായ പ്രയോജനങ്ങളെക്കുറിച്ചോ എത്ര അളവിൽ കഴിക്കണമെന്നതിനെക്കുറിച്ചോ പലർക്കും വ്യക്തമായ അറിവില്ല. ബദാം നിത്യവും ആഹാരത്തിൽ ഉൾപ്പെടുത്തുന്നത് ശരീരത്തിൽ എങ്ങനെയൊക്കെയാണ് ഗുണപരമായ മാറ്റങ്ങൾ കൊണ്ടുവരുന്നതെന്ന് തിരിച്ചറിയേണ്ടത് അനിവാര്യമാണെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു.
ശരീരത്തിലെ ചീത്ത കൊളസ്ട്രോളായ എൽ.ഡി.എൽ (LDL) കുറയ്ക്കാൻ ബദാം സഹായിക്കുമെന്ന് വിവിധ പഠനങ്ങൾ തെളിയിക്കുന്നുണ്ട്. എന്നാൽ, ഇതിനായി ഒരു നിശ്ചിത അളവ് പാലിക്കേണ്ടതുണ്ട്. ദിവസവും ഏകദേശം 23 ബദാം വീതം കഴിക്കണമെന്നാണ് ഡോക്ടർമാർ നിർദ്ദേശിക്കുന്നത്. ഈ അളവിൽ കഴിക്കുമ്പോൾ ശരീരത്തിന് ആവശ്യമായ നാല് ഗ്രാം ഫൈബർ ലഭിക്കുകയും, അത് ദഹനപ്രക്രിയ കൂടുതൽ കാര്യക്ഷമമാക്കാൻ സഹായിക്കുകയും ചെയ്യുന്നു.
കാർബോഹൈഡ്രേറ്റ് അടങ്ങിയ ഭക്ഷണങ്ങൾക്കൊപ്പം ബദാം കൂടി ഉൾപ്പെടുത്തുന്നത് രക്തത്തിലെ പഞ്ചസാരയുടെ അളവ് ക്രമീകരിക്കാൻ സഹായിക്കും. 23 ബദാം കഴിക്കുമ്പോൾ ഏകദേശം ആറ് ഗ്രാം പ്രോട്ടീനും ഹൃദയാരോഗ്യത്തിന് ഉതകുന്ന നല്ല കൊഴുപ്പുമാണ് ശരീരത്തിലെത്തുന്നത്. ഇത് വയർ നിറഞ്ഞതായുള്ള തോന്നൽ നിലനിർത്താനും അതുവഴി അമിതമായി ഭക്ഷണം കഴിക്കുന്ന ശീലം നിയന്ത്രിക്കാനും സഹായിക്കുന്നു. കൂടാതെ, ചർമ്മത്തിലെ ചുളിവുകൾ അകറ്റാനും ബദാം മികച്ചതാണ്. 24 ആഴ്ചയോളം തുടർച്ചയായി ബദാം ശീലമാക്കിയവരിൽ ചർമ്മത്തിലെ ചുളിവുകളുടെ തീവ്രതയിൽ 16 ശതമാനം വരെ കുറവുണ്ടായതായി പഠനങ്ങൾ വ്യക്തമാക്കുന്നതായി വിദഗ്ധർ ഓർമ്മിപ്പിക്കുന്നു.
(ശ്രദ്ധിക്കുക: ഈ വിവരങ്ങൾ പൊതുവായ അറിവിലേക്കായി നൽകിയിട്ടുള്ളതാണ്. ആരോഗ്യപരമായ ഏത് കാര്യത്തിലും തീരുമാനങ്ങൾ എടുക്കുന്നതിന് മുൻപ് ഒരു വിദഗ്ധ ഡോക്ടറുടെ ഉപദേശം തേടേണ്ടതാണ്.)
