ബഹ്‌റൈൻ ഗോൾഡൻ ലൈസൻസ്: വൻ തൊഴിലവസരങ്ങളിലേക്ക് വഴിതുറക്കുന്നു
മനാമ∙ വ്യോമയാന, റിയൽ എസ്റ്റേറ്റ്, സാങ്കേതികവിദ്യാ മേഖലകളിലായി 389 കോടി യുഎസ് ഡോളർ മുതൽമുടക്കുള്ള നാല് സുപ്രധാന നിക്ഷേപ പദ്ധതികൾക്ക് ബഹ്‌റൈൻ ഗോൾഡൻ ലൈസൻസ് അനുവദിച്ചു. രാജ്യത്തിന്റെ സാമ്പത്തിക അടിത്തറ വിപുലീകരിക്കുന്നതിനും സുസ്ഥിരമായ വളർച്ച കൈവരിക്കുന്നതിനും ഈ സംരംഭങ്ങൾ വലിയൊരു ചുവടുവയ്പ്പായിരിക്കും.
ബഹ്‌റൈൻ ഇക്കണോമിക് ഡെവലപ്‌മെന്റ് ബോർഡ് (ബഹ്‌റൈൻ ഇഡിബി) സംഘടിപ്പിച്ച ‘ഗേറ്റ്‌വേ ഗൾഫ് 2026’ ഫോറത്തിലാണ് ഈ നിർണ്ണായക പ്രഖ്യാപനം നടത്തിയത്. ബഹ്‌റൈനിലെയും വിശാലമായ ഗൾഫ് മേഖലയിലെയും നിക്ഷേപ സാധ്യതകൾ വിലയിരുത്തുന്നതിനായി ലോകത്തിന്റെ വിവിധ ഭാഗങ്ങളിൽ നിന്നുള്ള പ്രമുഖരായ മന്ത്രിമാർ, ഭരണാധികാരികൾ, വിവിധ ആഗോള കമ്പനികളുടെ സിഇഒമാർ, നിക്ഷേപകർ തുടങ്ങിയവർ ഫോറത്തിൽ അണിനിരന്നു.
ഏവിയേഷൻ ലോജിസ്റ്റിക്സ്, അത്യാധുനിക സാങ്കേതികവിദ്യ, ഇൻഫ്രാസ്ട്രക്ചർ വികസനം എന്നിവ മുൻനിർത്തി നടപ്പാക്കുന്ന ഈ പദ്ധതികൾ രാജ്യത്ത് തൊഴിൽ മേഖലയിൽ വലിയ കുതിച്ചുചാട്ടം ഉണ്ടാക്കുമെന്നാണ് വിലയിരുത്തപ്പെടുന്നത്. ആഗോള തലത്തിലുള്ള നിക്ഷേപകരെ വാണിജ്യ മേഖലയിലേക്ക് കൂടുതൽ ആകർഷിക്കുന്നതിന് ഗോൾഡൻ ലൈസൻസ് പദ്ധതി വലിയ രീതിയിൽ സഹായകമാകുമെന്ന് അധികൃതർ ഉറപ്പിച്ചു പറഞ്ഞു.
