ഗ്യാനേഷ് കുമാർ രാജിവയ്ക്കുന്നു; വൈകിട്ട് പ്രധാനമന്ത്രിയുമായി കൂടിക്കാഴ്ച
മുഖ്യതിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുകൊണ്ട് ഇന്ത്യാ മുന്നണി സംഘടിപ്പിച്ച ‘ചലോ ഡൽഹി’ റാലിയെ കടന്നാക്രമിച്ച് രാഷ്ട്രീയ നിരീക്ഷകനായ ശ്രീജിത്ത് പണിക്കർ രംഗത്ത്. 140 കോടി ജനങ്ങളെ അണിനിരത്തിയ റാലിയെന്നൊക്കെ വലിയ അവകാശവാദങ്ങൾ ഉന്നയിക്കുമ്പോഴും, ഇത്തരം പരിപാടികൾക്ക് എന്ത് പ്രസക്തിയാണുള്ളതെന്ന് അദ്ദേഹം പരിഹാസരൂപേണ ചോദിക്കുന്നു. ഗ്യാനേഷ് കുമാർ ഭയപ്പെട്ട് നാളെ ഉച്ചയ്ക്ക് മൂന്നിന് രാജിവെക്കുമെന്നും, തുടർന്ന് വൈകുന്നേരം ആറിന് മോദിയും സ്ഥാനമൊഴിയുമെന്നും ഫേസ്ബുക്ക് കുറിപ്പിൽ അദ്ദേഹം കളിയാക്കുന്നു. ഏഴരയ്ക്ക് വിയറ്റ്നാം നാഷണൽ കോൺഗ്രസിലെ ‘പപ്പേട്ടൻ മോക്ക്’ പ്രധാനമന്ത്രിയായി അധികാരമേൽക്കുമെന്ന തരത്തിലുള്ള രൂക്ഷമായ പരിഹാസമാണ് അദ്ദേഹം കുറിച്ചത്.
ഫേസ്ബുക്ക് പോസ്റ്റിന്റെ പൂർണ്ണരൂപം ഇപ്രകാരമാണ്:
140 കോടി ജനങ്ങളെ അണിനിരത്തിയ മഹാറാലി. ഭയചകിതനായ ഗ്യാനേഷ് കുമാർ നാളെ ഉച്ചതിരിഞ്ഞ് മൂന്ന് മണിക്ക് രാജിവയ്ക്കും. വൈകിട്ട് ആറിന് മോദിയും. ഏഴരയ്ക്ക് വിയറ്റ്നാം നാഷണൽ കോൺഗ്രസിന്റെ പപ്പേട്ടൻ മോക്ക് പ്രധാനമന്ത്രിയായി സത്യപ്രതിജ്ഞ ചെയ്യും.
റാലിയെ പരിഹസിച്ച് കേന്ദ്രമന്ത്രി കിരൺ റിജിജുവും വിമർശനങ്ങളുമായി രംഗത്തെത്തി. ഇന്ത്യാ സഖ്യ നേതാക്കൾ സമൂഹമാധ്യമങ്ങളിൽ പങ്കുവെച്ച റാലിയുടെ ദൃശ്യങ്ങളെ മുൻനിർത്തിയായിരുന്നു അദ്ദേഹത്തിന്റെ പ്രതികരണം. റാലിയിലെ ആൾക്കൂട്ടത്തെ കൃത്രിമമായി കാട്ടാൻ കോൺഗ്രസ് എഐ (AI) ഉപയോഗിച്ച് വ്യാജചിത്രങ്ങൾ നിർമ്മിക്കുകയായിരുന്നുവെന്ന് അദ്ദേഹം ആരോപിച്ചു. രാംലീല മൈതാനം ജനനിബിഡമാണെന്ന് വരുത്തിത്തീർക്കാൻ കോൺഗ്രസിന്റെ പ്രചാരണവിഭാഗം നടത്തിയ ശ്രമങ്ങൾ പാളിപ്പോയെന്നും, വേദിയിൽ രാഹുൽ ഗാന്ധിയുടെയും സോണിയാ ഗാന്ധിയുടെയും മുഖങ്ങൾ എഐ സഹായത്തോടെ എഡിറ്റ് ചെയ്ത് ചേർത്തതാണെന്നും അദ്ദേഹം ‘എക്സി’ൽ കുറിച്ചു.
