ഇട്ടിവ ഗ്രാമപ്പഞ്ചായത്ത് കോട്ടുക്കൽ: വനിതാ ജംക്‌ഷനിലെ വിസ്മയക്കാഴ്ചകൾ
ഇട്ടിവ ഗ്രാമപ്പഞ്ചായത്തിന്റെ 2026–27 വാർഷിക പദ്ധതിയുടെ ഭാഗമായി കോട്ടുക്കലിൽ സംഘടിപ്പിച്ച ‘വനിതാ ജംക്‌ഷൻ’ വൻ വിജയമായി. ഒക്ടോബർ 31-ന് ഉച്ചയ്ക്ക് രണ്ടു മണി മുതൽ പിറ്റേന്ന് പുലർച്ചെ വരെ നീണ്ടുനിന്ന പരിപാടിയിൽ സ്ത്രീകളുടെ സമ്പൂർണ്ണ പങ്കാളിത്തമാണ് ദൃശ്യമായത്. കുടുംബശ്രീ പ്രവർത്തകരടക്കമുള്ള വനിതകളായിരുന്നു സ്റ്റാളുകളിലെ വിൽപനയും മേൽനോട്ടവും നിർവഹിച്ചത്. കലാവിരുന്നും നൃത്തച്ചുവടുകളും ഉൾപ്പെടെ വൈവിധ്യമാർന്ന പരിപാടികളുമായി സ്ത്രീകൾ തന്നെ വേദി സജീവമാക്കി.
സുരക്ഷാക്രമീകരണങ്ങൾക്കായി വനിതാ പൊലീസ് ഉദ്യോഗസ്ഥരെ വിന്യസിച്ചപ്പോൾ, ആരോഗ്യപരിപാലനത്തിനായി പ്രത്യേക വനിതാ മെഡിക്കൽ സംഘത്തെയും സജ്ജമാക്കിയിരുന്നു. ഇട്ടിവ കുടുംബാരോഗ്യ കേന്ദ്രത്തിലെ ഡോ. റഹിന, നഴ്സുമാരായ ഷീമ, അശ്വതി, അനുപ്രിയ, ഫാർമസിസ്റ്റ് അശ്വതി എന്നിവരാണ് മെഡിക്കൽ ടീമിലുണ്ടായിരുന്നത്. വിവിധയിടങ്ങളിൽ നിന്ന് സ്ത്രീകളെ പരിപാടിയിലേക്ക് എത്തിക്കുന്നതിനായി ‘വനിതാ ജംക്‌ഷൻ’ എന്ന് രേഖപ്പെടുത്തിയ നാല് ബസുകൾ സൗജന്യമായി സർവീസ് നടത്തി.
ഇട്ടിവ പഞ്ചായത്തിലെ 22 വാർഡുകളിൽ 14 വാർഡുകളെ ഉൾപ്പെടുത്തിയാണ് കോട്ടുക്കലിൽ ഈ സംരംഭം നടപ്പിലാക്കിയത്. പഞ്ചായത്തിന്റെ സ്വന്തം ഫണ്ടിൽ നിന്ന് അനുവദിച്ച ഒന്നര ലക്ഷം രൂപയും സ്പോൺസർമാരുടെ പിന്തുണയും ചേർത്താണ് ഇതിനായി ചെലവഴിച്ചത്. രണ്ടായിരത്തോളം പേർ പങ്കെടുത്ത ഈ പരിപാടി, സ്ത്രീകൾക്ക് ഏതു സമയത്തും നിർഭയമായി സഞ്ചരിക്കാനും ഒത്തുചേരാനും സാധിക്കുന്ന ഒരു സുരക്ഷിത ഇടമെന്ന ആശയത്തിന് തുടക്കം കുറിച്ചു. ജനുവരി മാസത്തിൽ പൊതിയാരുവിളയിലും സമാനമായ പദ്ധതി ആരംഭിക്കുമെന്നും എല്ലാ മാസവും ഇത് തുടരുമെന്നും അധികൃതർ അറിയിച്ചു.
