ബ്രിട്ടനിലെ ആഡംബര മോഷണം: ക്രിമിനോളജി അധ്യാപികയെ നാടുകടത്താൻ ഉത്തരവ്
ലണ്ടൻ∙ മോഷണക്കേസുകളിൽ പ്രതിയായ മുൻ ക്രിമിനോളജി അധ്യാപികയെ ബ്രിട്ടനിൽനിന്നു പുറത്താക്കാനൊരുങ്ങി അധികൃതർ. പോളണ്ടുകാരിയായ 36-കാരി പോളിൻ അൽ സയീദാണ് നാടുകടത്തൽ ഭീഷണി നേരിടുന്നത്. താനൊരു ‘ആഡംബര മോഷ്ടാവാണെന്ന്’ സ്വയം വിശേഷിപ്പിക്കാറുള്ള ഇവർക്ക് വിവിധ മോഷണക്കേസുകളിൽ പങ്കുണ്ടെന്ന് കോടതി കണ്ടെത്തിയിരുന്നു. കുറ്റക്കാരിയാണെന്ന് തെളിഞ്ഞതിനെത്തുടർന്ന് തടവുശിക്ഷ ലഭിച്ചെങ്കിലും, 18 മാസത്തേക്ക് ആ ശിക്ഷ നടപ്പാക്കുന്നതിൽനിന്നു കോടതി ഇളവ് നൽകുകയായിരുന്നു.
നിശ്ചിത സമയത്തിനുള്ളിൽ നാടുകടത്തൽ നടപടിക്കെതിരെ അപ്പീൽ സമർപ്പിച്ചില്ലെങ്കിൽ യുവതിയെ നിർബന്ധപൂർവം രാജ്യത്തുനിന്നു പുറത്താക്കുമെന്ന് ബ്രിട്ടീഷ് ആഭ്യന്തര മന്ത്രാലയം കർശനമായി മുന്നറിയിപ്പ് നൽകിയിട്ടുണ്ട്. ബാത്ത് സ്പാ സർവകലാശാലയിൽ അധ്യാപികയായി സേവനമനുഷ്ഠിച്ചിരുന്ന ഇവർ ക്രിമിനോളജിയിൽ ഉന്നത ബിരുദധാരി കൂടിയാണ്. ഏകദേശം 13,000 പൗണ്ട് (ഏകദേശം 15 ലക്ഷം രൂപ) വിലമതിക്കുന്ന ഉൽപ്പന്നങ്ങൾ കവർച്ച ചെയ്ത കേസുകളിലാണ് ഇവർ കുടുങ്ങിയിരിക്കുന്നത്.
തന്റെ മൗലികമായ മനുഷ്യാവകാശങ്ങൾ ഹനിക്കുന്നതാണ് നാടുകടത്തൽ നടപടിയെന്ന് വാദിച്ചുകൊണ്ട് യുവതി ഹോം ഓഫിസിന് അപേക്ഷ നൽകിയിരുന്നെങ്കിലും, ആ വാദങ്ങൾ അധികൃതർ പൂർണമായും തള്ളിക്കളഞ്ഞു. യുവതിയുടെ സ്വകാര്യ ജീവിതത്തിനും കുടുംബപരമായ കാര്യങ്ങൾക്കും നൽകുന്നതിനേക്കാൾ പ്രാധാന്യം, കുറ്റവാളികളെ നാടുകടത്തുന്നതിലൂടെയുണ്ടാകുന്ന പൊതുതാൽപര്യത്തിനാണെന്നാണ് ഹോം ഓഫിസിന്റെ ഔദ്യോഗിക നിലപാട്.
