ആഫ്രിക്കൻ ഒച്ചുകളുടെ ശല്യം: വീടുകളിൽ ഭീതിയൊഴിയാതെ നാട്ടുകാർ
പാനൂർ: കണ്ണൂർ പന്ന്യന്നൂർ പഞ്ചായത്തിലെ ചമ്പാട്, കുറിച്ചിക്കര പ്രദേശങ്ങളിൽ ആഫ്രിക്കൻ ഒച്ചുകളുടെ ശല്യം രൂക്ഷമായതോടെ നാട്ടുകാർ വലിയ ദുരിതത്തിൽ. വീടുകൾക്ക് അകത്തും പുറത്തും, അടുക്കളയിൽ അടക്കം ഇവ കൂട്ടത്തോടെ ഇരച്ചുകയറുന്നത് ജനങ്ങളുടെ സ്വൈര്യജീവിതത്തിന് തടസ്സമായിരിക്കുകയാണ്. സന്ധ്യാസമയങ്ങളിലും പുലർച്ചെയുമാണ് ഇവയുടെ സാന്നിധ്യം ഏറ്റവും അധികമായി അനുഭവപ്പെടുന്നത്. കൃഷിയിടങ്ങളിലെ വിളകളെ നശിപ്പിക്കുന്നതിനൊപ്പം കിണറുകളിലും ജലസ്രോതസ്സുകളിലും ഒച്ചുകൾ വ്യാപിക്കുന്നത് ആശങ്ക വർധിപ്പിക്കുന്നു.
ഈ പ്രതിസന്ധിയെക്കുറിച്ച് നാട്ടുകാർ പഞ്ചായത്തിലും കൃഷിഭവനിലും പരാതി ബോധിപ്പിച്ചിട്ടുണ്ട്. തുരിശ് (കോപ്പർ സൾഫേറ്റ്) ലായനി ഉപയോഗിച്ച് ഒച്ചുകളെ ഇല്ലായ്മ ചെയ്യാനാണ് അധികൃതർ നിർദ്ദേശിച്ചിട്ടുള്ളത്. ഇതുമായി ബന്ധപ്പെട്ട് ജനങ്ങൾക്ക് ബോധവൽക്കരണ ക്ലാസുകളും സംഘടിപ്പിച്ചു. അതിരാവിലെ വീടും പരിസരവും പരിശോധന നടത്തി കണ്ടെത്തുന്ന ഒച്ചുകളെ പാത്രത്തിൽ ശേഖരിക്കുകയും, തുടർന്ന് തുരിശ് ലായനി ഉപയോഗിച്ച് കുഴിച്ചുമൂടുകയുമാണ് വേണ്ടതെന്ന് അധികൃതർ അറിയിച്ചു.
എങ്കിലും, ഒച്ചുകളുടെ വ്യാപനം നിയന്ത്രണാതീതമായി തുടരുന്ന സാഹചര്യത്തിൽ പഞ്ചായത്ത്, ആരോഗ്യ വകുപ്പ്, കൃഷി വകുപ്പ് എന്നിവയുടെ നേതൃത്വത്തിൽ പ്രദേശത്ത് കൂടുതൽ കർശനവും സമഗ്രവുമായ പ്രതിരോധ പ്രവർത്തനങ്ങൾ അടിയന്തരമായി നടപ്പാക്കണമെന്നാണ് നാട്ടുകാരുടെ ശക്തമായ ആവശ്യം.
