ഉറക്കത്തിന് മെലറ്റോണിൻ ഗുളികകൾ ഉപയോഗിക്കുന്നുണ്ടോ? അറിഞ്ഞിരിക്കേണ്ട പാർശ്വഫലങ്ങൾ
ഉറക്കപ്രശ്നങ്ങൾക്ക് പരിഹാരമായി മെലറ്റോണിൻ ഗുളികകൾ ഉപയോഗിക്കുന്നവരാണോ നിങ്ങൾ? എന്നാൽ, ഇത്തരം ഗുളികകളുടെ അമിതമായ ആശ്രയം ശരീരത്തിന്റെ സ്വാഭാവിക ഉറക്കത്തിന്റെ താളത്തെ താറുമാറാക്കാൻ സാധ്യതയുണ്ടെന്ന് നാഡീരോഗ വിദഗ്ധർ മുന്നറിയിപ്പ് നൽകുന്നു. രാത്രികാലങ്ങളിൽ ഉറക്കം ലഭിക്കാൻ മരുന്നുകളെ കൂട്ടുപിടിക്കുന്നത് പകൽ സമയങ്ങളിൽ അമിതമായ ക്ഷീണം, തലവേദന, തലകറക്കം, ഏകാഗ്രതക്കുറവ് തുടങ്ങിയ ഗുരുതരമായ ബുദ്ധിമുട്ടുകൾക്ക് വഴിയൊരുക്കും. താൽക്കാലികമായി ഉറക്കം ലഭിച്ചേക്കാമെങ്കിലും ഇതൊരു ശാശ്വത പരിഹാരമായി കണക്കാക്കരുതെന്ന് ആരോഗ്യരംഗത്തുള്ളവർ ഓർമ്മിപ്പിക്കുന്നു.
നമ്മുടെ ശരീരത്തിൽ സ്വാഭാവികമായി ഉൽപാദിപ്പിക്കപ്പെടുന്ന ഒരു ഹോർമോണാണ് മെലറ്റോണിൻ. ഉറക്കവും ഉണർവും കൃത്യമായ സമയത്ത് നടക്കുന്നുവെന്ന് ഉറപ്പാക്കുന്നത് ഇതിന്റെ ഉത്തരവാദിത്തമാണ്. രാത്രിയാകുമ്പോൾ ഇതിന്റെ അളവ് കൂടുകയും ശരീരം ഉറക്കത്തിലേക്ക് വഴുതിവീഴാൻ തയ്യാറാവുകയും ചെയ്യുന്നു. പുറമെ നിന്ന് ഗുളികകളായി മെലറ്റോണിൻ കഴിക്കുമ്പോൾ അത് ഈ ഹോർമോണിന് പകരമായി പ്രവർത്തിക്കുകയാണ് ചെയ്യുന്നത്. ദീർഘദൂര യാത്രകൾ മൂലം ഉറക്കത്തിന്റെ താളം തെറ്റുന്നവർക്കും മറ്റ് ഉറക്കപ്രയാസങ്ങൾ നേരിടുന്നവർക്കും ചില ഘട്ടങ്ങളിൽ ഇതൊരു സഹായമായേക്കാം. എങ്കിലും, തുടർച്ചയായി ഇത്തരം ഗുളികകൾ ഉപയോഗിക്കുന്നത് ശരീരത്തിന്റെ സ്വാഭാവിക പ്രവർത്തനത്തെ പ്രതികൂലമായി ബാധിക്കുമെന്ന് വിദഗ്ധർ മുന്നറിയിപ്പ് നൽകുന്നു.
തുടർച്ചയായ ഉപയോഗം മൂലം തലച്ചോറിന്റെ കാര്യക്ഷമത കുറയുക, തലവേദന, തലകറക്കം തുടങ്ങിയ പാർശ്വഫലങ്ങൾ അനുഭവപ്പെടാം. കൂടാതെ, അമിത ഉപയോഗം ഉറക്കത്തിന്റെ ഗുണമേന്മയെ എന്നെന്നേക്കുമായി ഇല്ലാതാക്കിയേക്കാം. ശരീരത്തിലെ സ്വാഭാവിക ഹോർമോൺ ഉൽപാദനത്തെ പോലും ഇത് ദീർഘകാലാടിസ്ഥാനത്തിൽ തകിടം മറിച്ചേക്കാമെന്നും വിദഗ്ധർ ചൂണ്ടിക്കാട്ടുന്നു. ഉറക്കക്കുറവിന് മെലറ്റോണിനെ മാത്രം ആശ്രയിക്കുന്നത് അതിന്റെ യഥാർഥ കാരണം കണ്ടെത്താൻ തടസ്സമാകും. മാനസിക സമ്മർദം, ഉത്കണ്ഠ, വിഷാദം, അല്ലെങ്കിൽ തെറ്റായ ജീവിതശൈലി എന്നിവയാണ് ഉറക്കമില്ലായ്മയ്ക്ക് കാരണമെങ്കിൽ അവയ്ക്ക് ശാസ്ത്രീയമായ പരിഹാരം തന്നെ തേടണം.
ഉറക്കപ്രശ്നങ്ങൾ പരിഹരിക്കപ്പെട്ടാൽ മെലറ്റോണിൻ ഉപയോഗം തുടരേണ്ടതില്ലെന്ന് ഡോക്ടർമാർ വ്യക്തമാക്കുന്നു. പരമാവധി രണ്ടുമുതൽ ആറാഴ്ച വരെ മാത്രം നീളുന്ന താൽക്കാലിക ഉപയോഗമാണ് ആരോഗ്യത്തിന് ഉചിതം. അമിതമായ മയക്കം, കടുത്ത ക്ഷീണം, അസ്വസ്ഥതയുണ്ടാക്കുന്ന സ്വപ്നങ്ങൾ എന്നിവ അനുഭവപ്പെട്ടാൽ ഉടൻ തന്നെ വൈദ്യസഹായം തേടേണ്ടതാണ്. ദീർഘകാലമായി മരുന്ന് ഉപയോഗിക്കുന്നവർ പെട്ടെന്ന് നിർത്തുന്നതിന് പകരം ഡോക്ടറുടെ നിർദ്ദേശപ്രകാരം ഡോസ് ക്രമേണ കുറച്ചുകൊണ്ടുവരുന്നതാണ് ഉചിതമായ മാർഗ്ഗം.
