വീട്ടിലെ തക്കാളിക്കൃഷിയിൽ ഇരട്ടി വിളവ് ലഭിക്കാൻ ഈ വിദ്യ പരീക്ഷിക്കൂ
പ്രതീകാത്മക ചിത്രം
അടുക്കളത്തോട്ടങ്ങളിൽ പച്ചക്കറി കൃഷി ചെയ്യുന്നവർ പലപ്പോഴും നേരിടുന്ന പ്രധാന വെല്ലുവിളിയാണ് കീടങ്ങളുടെ ശല്യം. പ്രത്യേകിച്ച് തക്കാളിച്ചെടികളിൽ ഇത്തരം കീടബാധകൾ വളരെ വേഗത്തിൽ പടരാറുണ്ട്. എങ്കിലും, ചെറിയ ചില മുൻകരുതലുകളും കൃത്യമായ പരിപാലന രീതികളും പിന്തുടർന്നാൽ തക്കാളിയിൽ നിന്ന് മികച്ച വിളവെടുപ്പ് സാധ്യമാണ്. ചെടികൾക്ക് ആവശ്യമായ പരിചരണവും ജൈവ കീടനാശിനികളുടെ പ്രയോഗവും നടത്തിയാൽ കീടങ്ങളെ ഫലപ്രദമായി പ്രതിരോധിക്കാൻ സാധിക്കും.
ഒരു ലിറ്റർ വെള്ളത്തിൽ അഞ്ച് മില്ലി വീതം വേപ്പെണ്ണ, വെളുത്തുള്ളി-കാന്താരിമുളക് സത്ത്, ഒപ്പം അല്പം സോപ്പുലായനി എന്നിവ ചേർത്ത് തയ്യാറാക്കുന്ന ലായനി കീടനിയന്ത്രണത്തിന് ഏറെ ഫലപ്രദമാണ്. ഈ മിശ്രിതം ആഴ്ചയിലൊരിക്കൽ വീതം തക്കാളിച്ചെടികളിൽ തളിച്ചുകൊടുക്കുന്നത് വെള്ളീച്ച, ഇലപ്പേൻ തുടങ്ങിയ ചെറിയ കീടങ്ങളെ പൂർണ്ണമായും തുരത്താൻ സഹായിക്കും.
തോട്ടത്തിൽ മഞ്ഞക്കെണികൾ ഉപയോഗിക്കുന്നതും കീടങ്ങളെ ആകർഷിച്ച് നശിപ്പിക്കാൻ മികച്ച വഴിയാണ്. ചെടികളുടെ അതേ ഉയരത്തിൽ മഞ്ഞക്കെണികൾ സ്ഥാപിക്കാൻ ശ്രദ്ധിക്കുക.
അടുക്കളത്തോട്ടത്തിൽ തക്കാളിക്ക് ഇടവിളയായി ജമന്തി നട്ടുപിടിപ്പിക്കുന്നത് കീടങ്ങളെ അകറ്റി നിർത്താൻ വളരെ നല്ലതാണ്. തക്കാളിച്ചെടിയുടെ വേരുപടലങ്ങളെ ബാധിക്കുന്ന നിമാവിരകളെ (നൂൽപ്പുഴു) നശിപ്പിക്കാൻ ജമന്തിക്ക് പ്രത്യേക കഴിവുണ്ട്. കൂടാതെ, ജമന്തിപ്പൂവിന്റെ തീവ്രമായ ഗന്ധം മറ്റ് കീടങ്ങളെയും ചെടികളിൽ നിന്ന് അകറ്റി നിർത്താൻ സഹായിക്കുന്നു.
ചെടിയുടെ മുകൾഭാഗത്തായി വെള്ളം നനയ്ക്കാതെ, തടത്തിൽ മാത്രം നനയ്ക്കാൻ ശ്രദ്ധിക്കുക.
മണ്ണിൽ നിന്നും ഇലകൾ വഴിയുമാണ് പലപ്പോഴും രോഗങ്ങളും കീടങ്ങളും ചെടിയിലേക്ക് വ്യാപിക്കുന്നത്. അതിനാൽ, ചെടിയുടെ ചുവടുഭാഗത്തുനിന്ന് ഒരടി ഉയരത്തിലുള്ള ഇലകൾ വെട്ടിമാറ്റി വൃത്തിയാക്കി സൂക്ഷിക്കുന്നത് രോഗവ്യാപനം കുറയ്ക്കാൻ സഹായിക്കും.
