ഹർമൻപ്രീത്-സ്മൃതി മന്ദാന: കൈകൊടുക്കാൻ വിസമ്മതിച്ച് താരങ്ങൾ, വൈറലായി വിഡിയോ
വഡോദരയിൽ നടന്ന ഏകദിന പരമ്പരയിൽ സിംബാബ്‌വെയെ സമ്പൂർണ്ണമായി അടിയറവ് പറയിച്ചാണ് ഇന്ത്യൻ വനിതാ ക്രിക്കറ്റ് ടീം തങ്ങളുടെ ആധിപത്യം ഉറപ്പിച്ചത്. അഞ്ച് വിക്കറ്റുകൾ വീഴ്ത്തിയ വൈഷ്ണവി ശർമയുടെ തകർപ്പൻ ബോളിങ് പ്രകടനത്തിന്റെ പിൻബലത്തിൽ മൂന്നാം ഏകദിനത്തിൽ എട്ട് വിക്കറ്റിന്റെ മിന്നുന്ന വിജയമാണ് ഇന്ത്യ നേടിയത്. ഇതോടെ മൂന്ന് മത്സരങ്ങളടങ്ങിയ പരമ്പര ഇന്ത്യ 3-0 എന്ന നിലയിൽ തൂത്തുവാരി. ഉടനീളം മികച്ച ഫോമിലായിരുന്നെങ്കിലും, പരമ്പര അവസാനിച്ചതിന് പിന്നാലെ ക്യാപ്റ്റൻ സ്മൃതി മന്ഥനയും മുൻ നായിക ഹർമൻപ്രീത് കൗറും തമ്മിലുണ്ടായ ഒരു സംഭവമാണ് ഇപ്പോൾ കായികലോകത്ത് വലിയ ചർച്ചകൾക്ക് വഴിവെച്ചിരിക്കുന്നത്.
മത്സരശേഷം ഇരു ടീമിലെയും അംഗങ്ങൾ പരസ്പരം കൈകൊടുക്കുന്നതിനിടെയുണ്ടായ ചില നാടകീയ നീക്കങ്ങൾ, ഇരുവരും തമ്മിൽ അഭിപ്രായവ്യത്യാസങ്ങളുണ്ടെന്ന അഭ്യൂഹങ്ങൾക്ക് വീണ്ടും ശക്തിപകർന്നിരിക്കുകയാണ്. സിംബാബ്‌വെ പരമ്പരയ്ക്ക് തൊട്ടുമുമ്പാണ് ഇന്ത്യൻ ടീമിന്റെ നായകസ്ഥാനത്ത് നിന്ന് ഹർമൻപ്രീത് കൗർ പടിയിറങ്ങിയത്. തുടർന്ന് വൈസ് ക്യാപ്റ്റനായിരുന്ന സ്മൃതി മന്ഥനയെ ബിസിസിഐ പുതിയ നായികയായി പ്രഖ്യാപിക്കുകയായിരുന്നു. സ്മൃതിയുടെ സ്ഥിരം നായികയായുള്ള കന്നി പരമ്പരയായിരുന്നു ഇത്.
