ഗില്ലിന് റെക്കോർഡ്; അഞ്ചാം തവണയും ‘പ്ലെയർ ഓഫ് ദ് മന്ത്’ ആയി ഇന്ത്യൻ നായകൻ; വനിതാ താരമായി ഷഫാലി

മുംബൈ ∙ വെസ്റ്റിൻഡീസിനെതിരെ ഏകദിന പരമ്പരയിലെ മിന്നും പ്രകടനത്തിനു പിന്നാലെ സെപ്റ്റംബറിലെ ‘പ്ലെയർ ഓഫ് ദ് മന്ത്’ പുരസ്കാരം ഇന്ത്യൻ ക്യാപ്റ്റൻ ശുഭ്മൻ ഗില്ലിന്. ഇത് അഞ്ചാം തവണയാണ് ഗില്ലിനെ തേടി ഈ നേട്ടമെത്തുന്നത്. ഇതോടെ അഞ്ച് തവണ ഐസിസി പ്ലെയർ ഓഫ് ദ് മന്ത് പുരസ്കാരം നേടിയിട്ടുള്ള വെസ്റ്റിൻഡീസ് വനിതാ ക്യാപ്റ്റൻ ഹെയ്‌ലി മാത്യൂസിന്റെ റെക്കോർഡിനൊപ്പമെത്തി ഇന്ത്യൻ നായകൻ. ഇതിനുമുൻപ് 2023 ജനുവരി, സെപ്റ്റംബർ മാസങ്ങളിലും, 2025 ഫെബ്രുവരി, ജൂലൈ മാസങ്ങളിലും ഗില്ലിന് ഈ പുരസ്കാരം ലഭിച്ചിട്ടുണ്ട്. വനിതാ വിഭാഗത്തിൽ ഇന്ത്യൻ താരം ഷെഫാലി വർമയ്ക്കാണ് ഈ തവണത്തെ പുരസ്കാരം. ഏഷ്യാ കപ്പിലും ഏഷ്യൻ ഗെയിംസിലും നടത്തിയ തകർപ്പൻ പ്രകടനത്തിന്റെ അടിസ്ഥാനത്തിലാണ് ഷെഫാലിക്ക് പുരസ്കാരം.വെസ്റ്റിൻഡീസിനെതിരായ ഏകദിന പരമ്പരയിൽ ഒരു ഇരട്ട സെഞ്ചറിയും ഒരു സെഞ്ചറിയുമടക്കം 334 റൺസാണ് ശുഭ്മൻ ഗിൽ അടിച്ചുകൂട്ടിയത്. ‘‘എന്റെ അഞ്ചാമത്തെ ഐസിസി പ്ലെയർ ഓഫ് ദ് മന്ത് അവാർഡ് നേടാനായതിൽ വലിയ സന്തോഷമുണ്ട്, ഈ ബഹുമതി നൽകിയ പാനലിനോട് ഞാൻ നന്ദി പറയുന്നു.’’– ഗിൽ പറഞ്ഞു. കഴിഞ്ഞ വർഷം നവംബറിൽ നവി മുംബൈയിൽ ദക്ഷിണാഫ്രിക്കയ്ക്കെതിരെ നടന്ന ലോകകപ്പ് ഫൈനലിലെ മാച്ച് വിന്നിങ് പ്രകടനത്തിലൂടെ ഒരു തവണ ഈ അവാർഡ് നേടിയ ഷഫാലിക്ക് ഇതു രണ്ടാം തവണയാണ് പ്ലെയർ ഓഫ് ദ് മന്ത് പുരസ്കാരം ലഭിക്കുന്നത്.


Auto ⏭️