ഇനി നടക്കാൻ പോകുന്നത് വിപ്ലവം; റീടെയിൽ നിക്ഷേപകർക്ക് നേട്ടം, സെറോദയ്ക്ക് സെബിയുടെ മെർച്ചന്റ് ബാങ്കിങ് ലൈസൻസ് ലഭിച്ചു

ഇന്ത്യയിലെ പ്രമുഖ സ്റ്റോക്ക് ബ്രോക്കറേജ് പ്ലാറ്റ്‌ഫോമായ സെറോദയ്ക്ക് ‘കാറ്റഗറി-1 മെർച്ചന്റ് ബാങ്കിംഗ് ലൈസൻസ്’ ലഭിച്ചു. സെക്യൂരിറ്റീസ് & എക്സ്ചേഞ്ച് ബോർഡ് ഓഫ് ഇന്ത്യ (SEBI) അംഗീകാരം നൽകിയതോടെ, ഇനി കമ്പനികൾക്ക് പ്രാഥമിക ഓഹരി വില്പനകൾ (IPOs) വഴി പണം സമാഹരിക്കാനുള്ള ഇൻവെസ്റ്റ്‌മെന്റ് ബാങ്കിംഗ് സേവനങ്ങൾ നൽകാൻ സെറോദയ്ക്ക് സാധിക്കും. റീടെയിൽ നിക്ഷേപകർക്കും ഇത് പലതരത്തിൽ പ്രയോജനം ചെയ്യും സെബി നൽകുന്ന ടകാറ്റഗറി-1 മർച്ചന്റ് ബാങ്കിംഗ് ലൈസൻസ്ട എന്നത് ഇന്ത്യയിലെ ഇൻവെസ്റ്റ്‌മെന്റ് ബാങ്കിംഗ് മേഖലയിലെ ഏറ്റവും ഉയർന്ന തലത്തിലുള്ള അനുമതിയാണ്. കമ്പനികളുടെ ക്യാപിറ്റൽ മാർക്കറ്റ് ഇടപാടുകൾക്ക് ഫുൾ-സർവീസ് ലീഡ് മാനേജരായി പ്രവർത്തിക്കാനും, അണ്ടർറൈറ്റിംഗ് സേവനങ്ങൾ നൽകാനും, സ്ട്രാറ്റജിക് അഡ്വൈസറി നൽകാനും ഇത് ഒരു ധനകാര്യ സ്ഥാപനത്തെ പ്രാപ്തമാക്കുന്നു.ബ്രോക്കറേജ് ഫീസുകൾ ഒഴിവാക്കിക്കൊണ്ട് ഇന്ത്യയിലെ ട്രേഡിംഗ് രംഗത്ത് വിപ്ലവം സൃഷ്ടിച്ച കമ്പനിയാണ് സെറോദ. ഇതേ കുറഞ്ഞ ചെലവിലുള്ള മോഡൽ, ഇഷ്യൂവർ/കമ്പനികൾക്കും, റീടെയിൽ നിക്ഷേപകർക്കും നൽകാനാണ് കമ്പനി ഉദ്ദേശിക്കുന്നത്.ലൈസൻസ് ലഭിച്ചതോടെ, മെയിൻബോർഡ് ഐ.പി.ഒകൾ, റൈറ്റ്സ് ഇഷ്യൂസ്, ഓഫർ ഫോർ സെയിൽ (OFS), കോർപ്പറേറ്റ് ലയനങ്ങളും, ഏറ്റെടുക്കലുകളും (M&A) എന്നിവയുടെ ലീഡ് മാനേജരാവുകയും മേൽനോട്ടം വഹിക്കുകയും ചെയ്യാൻ സെറോദയ്ക്ക് സാധിക്കും. വൻകിട ബാങ്കുകൾ കുത്തകയാക്കി വെച്ചിരിക്കുന്ന ഇൻവെസ്റ്റ്‌മെന്റ് ബാങ്കിംഗ് രംഗത്ത് കുറഞ്ഞ തുകയ്ക്ക് സേവനം ലഭ്യമാക്കുക എന്നതാണ് ഇതിലൂടെ കമ്പനി ലക്ഷ്യമിടുന്നത്.വരാൻ പോകുന്ന മാറ്റങ്ങൾപരമ്പരാഗതമായി കൊടക്, സിറ്റിബാങ്ക്, ജെ.പി. മോർഗൻ തുടങ്ങിയ വലിയ ഇൻവെസ്റ്റ്‌മെന്റ് ബാങ്കുകളാണ് മെയിൻബോർഡ് ഐ.പി.ഒകൾക്ക് ലീഡ് മാനേജർമാരായി പ്രവർത്തിക്കുന്നത്. സെറോദയുടെ വരവോടെ ഈ രം​ഗത്ത് വലിയ മാറ്റങ്ങൾ സംഭവിച്ചേക്കും. വൻകിട കമ്പനികൾ ഐപിഒ നടത്തുമ്പോൾ മെർച്ചന്റ് ബാങ്കർമാർക്ക് ഉയർന്ന കമ്മീഷൻ നൽകേണ്ടി വരാറുണ്ട്. ബ്രോക്കറേജ് രംഗത്ത് ചെയ്തതു പോലെ ഇവിടെയും മിതമായ നിരക്കിൽ സേവനം നൽകാൻ സെറോദയ്ക്ക് സാധിക്കുംമിഡ്-ടു-ലാർജ് കമ്പനികൾക്ക് മുന്നിൽ പുതിയ വാതായനം തുറക്കുക കൂടിയാണ് ചെയ്യുന്നത്. വളർന്നു വരുന്ന ഇടത്തരം കമ്പനികൾക്ക് വളരെ എളുപ്പത്തിൽ ക്യാപിറ്റൽ മാർക്കറ്റിലേക്ക് പ്രവേശിക്കാനും, ഐ.പി.ഒ നടത്താനും ആവശ്യമായ സാങ്കേതിക പിന്തുണ നൽകാൻ സെറോദയ്ക്ക് സാധിക്കും. കൂടാതെ കമ്പനികൾ ഐ.പി.ഒ പേപ്പർവർക്കുകളും, പേപ്പർ ഫയലിംഗുകളും നടത്തുന്ന രീതി പൂർണ്ണമായും ഡിജിറ്റലൈസ് ചെയ്യപ്പെടാനും, വേഗത്തിലാകാനും ഇത് വഴിയൊരുക്കും.റീടെയിൽ നിക്ഷേപകർക്ക് ലഭിക്കുന്ന നേട്ടങ്ങൾ1.6 കോടിയിലധികം സജീവ ഉപയോക്താക്കളുള്ള, ഇന്ത്യയിലെ ഏറ്റവും വലിയ ബ്രോക്കിങ് ഹൗസുകളിലൊന്നാണ് സെറോദ. പുതിയ ലൈസൻസ് വഴി റീട്ടെയിൽ നിക്ഷേപകർക്ക് ലഭിക്കുന്ന നേട്ടങ്ങൾ പലതാണ്. പുതിയ ലൈസൻസ് ലഭിച്ചതോടെ സെറോദ നേരിട്ട് ലീഡ് മാനേജരാകുന്ന ഐ.പി.ഒകൾ നടക്കും. കൈറ്റ് ആപ്പ് വഴി എളുപ്പത്തിൽ ഐ.പി.ഒകൾക്ക് അപേക്ഷിക്കാൻ നിക്ഷേപകർക്ക് സാധിക്കും.സെറോദ തന്നെ മെർച്ചന്റ് ബാങ്കറാകുന്നതോടെ ഐ.പി.ഒ, ഡി.ആർ.എച്ച്.പി വിവരങ്ങൾ കൂടുതൽ ലളിതമായി ആപ്പ് വഴി ലഭ്യമാകും. അനാവശ്യമായി ഹൈപ്പ് സൃഷ്ടിക്കുന്ന കമ്പനികളെ ഒഴിവാക്കി, സുതാര്യമായ വാല്യുവേഷനിലുള്ള ഐ.പി.ഒകൾ അവതരിപ്പിക്കാൻ ഇത് സഹായിക്കും.ഒരു ബ്രോക്കറേജ് പ്ലാറ്റ്‌ഫോം തന്നെ മർച്ചന്റ് ബാങ്കറായി പ്രവർത്തിക്കുമ്പോൾ, റീടെയിൽ നിക്ഷേപകരെ വഴിതെറ്റിക്കാതിരിക്കാൻ സെബിയുടെ ശക്തമായ നിബന്ധനകൾ നിലവിലുണ്ട്. സ്റ്റോക്ക് ബ്രോക്കിങ് ( സെറോദ കൈറ്റ് പ്ലാറ്റ്ഫോം) മ്യൂച്വൽ ഫണ്ട് (സെറോദ ഫണ്ട് ഹൗസ്), ലെൻഡിംഗ് (സെറോദ ക്യാപിറ്റൽ) എന്നിവയ്ക്ക് ശേഷം ഇൻവെസ്റ്റ്‌മെന്റ് ബാങ്കിംഗിലേക്ക് കടക്കുന്നതിലൂടെ, സമ്പൂർണ്ണ ധനകാര്യ സേവന പ്ലാറ്റ്‌ഫോമായി മാറുക എന്ന ലക്ഷ്യത്തിലേക്കാണ് സെറോദ ചുവടുവെക്കുന്നത്.


Read News