ബാങ്കുകളുടെ ജപ്തി നടപടിക്കെതിരെ യൂസഫലി; കുടുംബങ്ങളെ പുറത്താക്കരുത്, വിവാദ യൂട്യൂബർക്ക് മറുപടി
ദുബായ്: വായ്പാ തിരിച്ചടവ് മുടങ്ങിയതിന്റെ പേരിലുള്ള ബാങ്കുകളുടെ ജപ്തി നടപടികൾക്കിരയായി വഴിയാധാരമാകുന്ന കുടുംബങ്ങൾക്ക്, കുറഞ്ഞത് ആറു മാസത്തേക്കെങ്കിലും താമസസൗകര്യം ഒരുക്കാൻ ബാങ്കിങ് സ്ഥാപനങ്ങൾ മുൻകൈ എടുക്കണമെന്ന് പ്രമുഖ വ്യവസായിയും ലുലു ഗ്രൂപ്പ് ചെയർമാനുമായ എം.എ. യൂസഫലി ആവശ്യപ്പെട്ടു. ലോൺ തിരിച്ചടയ്ക്കാൻ സാധിക്കാതെ വരുന്ന സാഹചര്യത്തിൽ, പിഞ്ചുകുഞ്ഞുങ്ങളടക്കമുള്ള കുടുംബങ്ങളെ പെരുവഴിയിലേക്ക് ഇറക്കിവിടുന്ന ബാങ്കുകളുടെ നിലപാടിനെതിരെ ശക്തമായ വിയോജിപ്പാണ് അദ്ദേഹം രേഖപ്പെടുത്തിയത്. ഒരാളുടെ വീട് ജപ്തി ചെയ്യും മുൻപ്, അവർക്ക് മാറിത്താമസിക്കാൻ വേണ്ട സൗകര്യങ്ങൾ ഒരുക്കിക്കൊടുക്കാൻ ബാങ്കുകൾക്ക് സാമൂഹികമായ ഉത്തരവാദിത്തമുണ്ടെന്ന് അദ്ദേഹം ഓർമ്മിപ്പിച്ചു.
മുൻ ത്രോബോൾ താരമായ അശ്വതിയും കുടുംബവും ബാങ്ക് ജപ്തിയെത്തുടർന്ന് കുഞ്ഞുങ്ങളുമൊത്ത് താൽക്കാലിക ഷെഡിൽ കഴിയേണ്ടി വന്ന ദുരവസ്ഥയ്ക്ക് പരിഹാരമായി, അവരുടെ 35 ലക്ഷം രൂപയുടെ കടബാധ്യത പൂർണ്ണമായും ഏറ്റെടുത്ത് വീട് വീണ്ടെടുത്തു നൽകാൻ യൂസഫലി തയ്യാറായിരുന്നു. ഈ സംഭവത്തിന്റെ പശ്ചാത്തലത്തിലാണ് ബാങ്കുകൾ ഇത്തരം കാര്യങ്ങളിൽ കൂടുതൽ മാനുഷികമായ സമീപനം സ്വീകരിക്കണമെന്ന് അദ്ദേഹം നിർദ്ദേശിച്ചത്. ദുബായ് ഊദ് അൽ മുതിനയിൽ പുതുതായി ആരംഭിച്ച ലുലു ഹൈപ്പർ മാർക്കറ്റിന്റെ ഉദ്ഘാടന ചടങ്ങിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.
