ട്രംപിനെ വിശ്വാസമില്ല; ആണവ നിലയങ്ങൾക്ക് സമീപം പ്രതിരോധ ഗുളികകൾ വിതരണം ചെയ്ത് ഇറാൻ
പശ്ചിമേഷ്യയിൽ സംഘർഷാന്തരീക്ഷം കലുഷിതമായതോടെ, ആണവ നിലയങ്ങൾക്ക് സമീപമുള്ള ജനങ്ങൾക്ക് വികിരണങ്ങളിൽ നിന്ന് രക്ഷനേടാനുള്ള അയഡിൻ ഗുളികകൾ ഇറാൻ നൽകുന്നുവെന്ന തരത്തിൽ പ്രചരിക്കുന്ന വാർത്തകൾ ആഗോളതലത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്. അമേരിക്കൻ പ്രസിഡന്റ് ഡോണൾഡ് ട്രംപിന്റെ ഭാഗത്തുനിന്നുണ്ടായേക്കാവുന്ന സൈനിക ഇടപെടലുകളെക്കുറിച്ചുള്ള ആശങ്കകളാണ് ഇത്തരം പ്രചരണങ്ങൾക്ക് ആധാരം. എന്നാൽ, ഈ വാദങ്ങളെ പൂർണ്ണമായും തള്ളിക്കളഞ്ഞുകൊണ്ട് ഇറാൻ ആരോഗ്യ മന്ത്രാലയം ഔദ്യോഗികമായി രംഗത്തെത്തി.
ലണ്ടൻ കേന്ദ്രമായി പ്രവർത്തിക്കുന്ന ‘ദി ടൈംസ്’, ‘അൽ ജസീറ’ തുടങ്ങിയ പ്രമുഖ അന്താരാഷ്ട്ര മാധ്യമങ്ങളാണ് ഇറാൻ അയഡിൻ വിതരണം ചെയ്യുന്നുവെന്ന വാർത്ത ആദ്യം പുറത്തുവിട്ടത്. ഇറാൻ ആരോഗ്യ മന്ത്രാലയത്തിലെ പേര് വെളിപ്പെടുത്താത്ത ഉന്നത ഉദ്യോഗസ്ഥനെ ഉദ്ധരിച്ചാണ് ഈ വിവരം പുറത്തുവന്നത്. ട്രംപിന്റെ നിലപാടുകളെ വിശ്വസിക്കാനാകില്ലെന്നും, അദ്ദേഹം ഏത് ക്രൂരമായ നടപടിക്കും മുതിർന്നേക്കാമെന്ന ഭീതിയാൽ മുൻകരുതലുകൾ സ്വീകരിക്കുന്നുണ്ടെന്നുമാണ് ഉദ്യോഗസ്ഥൻ പറഞ്ഞതായി വാർത്തകളിൽ ഉണ്ടായിരുന്നത്.
ഈ വാർത്തകൾ വ്യാപകമായി പ്രചരിച്ചതോടെ ഇറാൻ ആരോഗ്യ മന്ത്രാലയത്തിന്റെ പബ്ലിക് റിലേഷൻസ് ആൻഡ് ഇൻഫർമേഷൻ സെന്റർ തലവൻ ഹൊസൈൻ കെർമൻപൂർ ഇതിനെ നിശിതമായി വിമർശിച്ചുകൊണ്ട് രംഗത്തെത്തി. ‘എക്സ്’ പ്ലാറ്റ്‌ഫോമിലൂടെയാണ് അദ്ദേഹം തന്റെ ഔദ്യോഗിക നിലപാട് വ്യക്തമാക്കിയത്. ആരോഗ്യ മന്ത്രാലയത്തിലെ ആരുംതന്നെ ‘ദി ടൈംസ്’ പോലുള്ള മാധ്യമങ്ങളുമായി സംസാരിച്ചിട്ടില്ലെന്നും, മന്ത്രാലയത്തിന്റേതായി പുറത്തുവന്ന പ്രസ്താവനകൾ തികച്ചും അടിസ്ഥാനരഹിതവും വ്യാജവുമാണെന്നും അദ്ദേഹം വ്യക്തമാക്കി.
