തെറ്റ് ചെയ്തവർക്ക് അർഹമായ ശിക്ഷ ഉറപ്പാക്കണം: ഡോ. കെ.എസ്. രാധാകൃഷ്ണൻ
ഇന്ത്യയിലെ ഏറ്റവും സുതാര്യമായ ഭരണഘടനാ സ്ഥാപനമെന്നു കരുതപ്പെടുന്ന കേരള പബ്ലിക് സർവീസ് കമ്മിഷനിൽ അഴിമതിയുടെ കറ പുരളുന്നത് അതീവ ഗൗരവത്തോടെയാണ് കാണേണ്ടതെന്ന് പി.എസ്.സി മുൻ ചെയർമാൻ ഡോ. കെ.എസ്. രാധാകൃഷ്ണൻ അഭിപ്രായപ്പെടുന്നു. പി.എസ്.സി നടത്തിയ ആഭ്യന്തര വിജിലൻസ് അന്വേഷണത്തിലും ക്രൈംബ്രാഞ്ച് പരിശോധനയിലും അഴിമതി നടന്നതായി പ്രാഥമികമായി തെളിഞ്ഞിട്ടുണ്ട്. ഇതിന്റെ അടിസ്ഥാനത്തിൽ, ഗവർണർ വിശദമായ റിപ്പോർട്ട് തേടുകയും അത് രാഷ്ട്രപതിക്ക് കൈമാറുകയും ചെയ്തിരുന്നു. ചെയർമാനെ നേരിൽ വിളിച്ച് ഗവർണർ വിവരങ്ങൾ ആരായുകയുമുണ്ടായി. താൻ മാത്രമായല്ല, കമ്മിഷൻ ഒന്നടങ്കമാണ് തീരുമാനങ്ങൾ എടുത്തതെന്ന ന്യായീകരണമാണ് ചെയർമാൻ ഗവർണർക്ക് മുന്നിൽ നിരത്തിയത്. ചുരുക്കത്തിൽ, കമ്മിഷൻ മൊത്തത്തിൽ ആരോപണങ്ങളുടെ നിഴലിലായിരിക്കുന്നു. തെറ്റ് ചെയ്തവർ ആരായാലും അവർ മാതൃകാപരമായി ശിക്ഷിക്കപ്പെടേണ്ടതുണ്ട്.
ഭരണഘടനയിലെ 317-ാം അനുഛേദം പ്രകാരം ഇത്തരമൊരു നടപടി സ്വീകരിക്കുമ്പോൾ സംസ്ഥാന സർക്കാരിന്റെ ഉപദേശം തേടണമെന്ന് നിർബന്ധമില്ല. ഗവർണർ കൈക്കൊണ്ടത് ഒരു അച്ചടക്ക നടപടിയാണ്, അതിനായി ഗവർണർക്ക് നേരിട്ട് ലഭിച്ച പരാതികൾ തന്നെ ധാരാളമാണ്. പി.എസ്.സി അംഗങ്ങളും ഉദ്യോഗസ്ഥരും ചെയർമാനും ചേർന്ന് ചോദ്യപേപ്പർ നിർമ്മാണം മുതൽ നിയമനം വരെയുള്ള കാര്യങ്ങളിൽ സ്വജനപക്ഷപാതവും അഴിമതിയും കാണിക്കുന്നുവെന്ന ഗുരുതരമായ ആക്ഷേപമാണ് ഉയർന്നത്. മുഖ്യമന്ത്രിയും ഈ വിഷയത്തിൽ സമഗ്ര അന്വേഷണം ആവശ്യപ്പെട്ടിരുന്നു.
നേരത്തെ മഹാരാഷ്ട്ര (2007), ഝാർഖണ്ഡ് (2010, 2026), പഞ്ചാബ് (2023), അരുണാചൽ പ്രദേശ് (2025), കർണ്ണാടകം (2026) തുടങ്ങിയ സംസ്ഥാനങ്ങളിലും അഴിമതി ആരോപണങ്ങളെത്തുടർന്ന് പി.എസ്.സികൾ പിരിച്ചുവിടപ്പെട്ട ചരിത്രമുണ്ട്. കേരള പി.എസ്.സിയിൽ ചട്ടം 82 ലംഘിക്കപ്പെട്ടുവെന്ന കാര്യത്തിൽ അന്വേഷണ ഏജൻസികൾക്ക് സംശയമില്ല, പി.എസ്.സിക്കും ഇക്കാര്യത്തിൽ തർക്കമില്ല. എന്നാൽ, അഴിമതിയുടെ ഉത്തരവാദിത്തം ആർക്കാണെന്ന കാര്യത്തിൽ പരസ്പരം പഴിചാരുകയാണ് ഉദ്യോഗസ്ഥരും ചെയർമാനും അംഗങ്ങളും ചെയ്യുന്നത്. ഭരണതലത്തിലെ ഈ ഒത്തുകളി ഹൈക്കോടതിയുടെ പോലും രൂക്ഷമായ വിമർശനത്തിന് വഴിവെച്ചിരുന്നു. കേരളത്തിലെ രാഷ്ട്രീയ പ്രസ്ഥാനങ്ങൾ കൈകോർത്തു നടത്തുന്ന അഴിമതിയുടെ വ്യാപ്തിയാണ് ഈ സംഭവങ്ങൾ വെളിപ്പെടുത്തുന്നത്.
(സമൂഹമാദ്ധ്യമത്തിൽ കുറിച്ചത്)
