യുഡിഎഫ് ഭരണത്തിൽ കേരളം ദുരിതത്തിൽ: വിമർശനവുമായി ഇപി ജയരാജൻ
ഇപി ജയരാജൻ
കണ്ണൂർ: യുഡിഎഫ് സർക്കാർ അധികാരമേറ്റ് ആറുമാസം പിന്നിടുമ്പോൾ കേരളത്തിന് വലിയൊരു ബാധ്യതയായി ഭരണകൂടം മാറിയെന്ന് സിപിഎം നേതാവ് ഇപി ജയരാജൻ. നാടിന്റെ സമസ്ത മേഖലകളെയും തകർത്തെറിഞ്ഞ സർക്കാർ സാധാരണക്കാരുടെ ജീവിതം അതീവ ദുഷ്കരമാക്കിയിരിക്കുകയാണെന്നും, അഴിമതിക്ക് വഴിയൊരുക്കുന്ന നയങ്ങളാണ് സർക്കാർ സ്വീകരിക്കുന്നതെന്നും അദ്ദേഹം ഫേസ്ബുക്കിലൂടെ കുറ്റപ്പെടുത്തി.
‘എല്ലാ രംഗങ്ങളിലും അഴിമതിക്ക് കളമൊരുക്കുന്ന നിലപാടാണ് ഭരണകൂടം സ്വീകരിക്കുന്നത്. ഇതിന്റെ തെളിവാണ് എക്സൈസ് വകുപ്പിലെ ഐഎഎസ് ഉദ്യോഗസ്ഥൻ തന്നെ ബാർ ലൈസൻസ് അനുവദിക്കുന്നതിലെ ക്രമക്കേടുകൾ വെളിപ്പെടുത്തി രംഗത്തെത്തിയത്. വകുപ്പ് കൈകാര്യം ചെയ്യുന്ന ഉന്നത ഉദ്യോഗസ്ഥൻ തന്നെ അഴിമതിക്കെതിരെ പരസ്യമായി സംസാരിക്കുമ്പോൾ ആ വകുപ്പിനോ സർക്കാരിനോ ഭരണത്തിൽ തുടരാൻ യാതൊരു അർഹതയുമില്ല.’
ഈ സ്ഥിതി എക്സൈസ് വകുപ്പിൽ മാത്രമല്ല ഉള്ളത്. വൈദ്യുതി ബോർഡും റഗുലേറ്ററി കമ്മീഷനും സ്വകാര്യ കമ്പനികളിൽ നിന്ന് വൈദ്യുതി വാങ്ങുന്നതുമായി ബന്ധപ്പെട്ട് നിലനിൽക്കുന്ന സംശയങ്ങൾ മന്ത്രിയുടെ ശ്രദ്ധയിൽപ്പെടുത്തിയിരുന്നു. എന്നാൽ, കോൺഗ്രസുകാരനായ വൈദ്യുതി മന്ത്രിക്ക് പോലും തന്റെ വകുപ്പിൽ കാര്യങ്ങൾ നടക്കുന്നത് അറിവില്ലാതെയാണെന്ന ഗതികേടാണ് ഉണ്ടായത്. സ്വന്തം വകുപ്പിന്റെ കാര്യങ്ങൾ പോലും മുഖ്യമന്ത്രിയുടെ ഓഫീസിൽ നിന്നുള്ള വാർത്താക്കുറിപ്പിലൂടെ മാത്രം അറിയേണ്ട അവസ്ഥയിലാണ് മന്ത്രിമാർ. സ്വന്തം വകുപ്പിൽ എന്താണ് നടക്കുന്നതെന്ന് പോലും മനസ്സിലാക്കാൻ സാധിക്കാത്ത അവസ്ഥയിലാണ് മന്ത്രിമാർ ഉള്ളത്.
ഇത്തരം മന്ത്രിമാർക്കും മുഖ്യമന്ത്രിക്കും അധികാരത്തിൽ തുടരാൻ ധാർമികമായ യാതൊരു അവകാശവുമില്ല. ഉദ്യോഗസ്ഥർ തന്നെ അഴിമതിക്കെതിരെ വിരൽ ചൂണ്ടുന്ന സാഹചര്യത്തിൽ, അന്തസ്സായി സ്ഥാനമൊഴിയുന്നതാണ് സർക്കാർ ചെയ്യേണ്ടത്. ജനങ്ങൾ വലിയ പ്രതിസന്ധിയിൽ നട്ടംതിരിയുമ്പോൾ ആഢംബര ജീവിതത്തിൽ അഭിരമിക്കുകയാണ് മന്ത്രിമാർ. ഭരിക്കാൻ ഒട്ടും യോഗ്യതയില്ലാത്ത സർക്കാർ സംവിധാനമായി യുഡിഎഫ് മാറിയിരിക്കുന്നു’- ഇപി
RELATED TOPICS: ഇപി ജയരാജൻ, യുഡിഎഫ് സർക്കാർ, കേരള രാഷ്ട്രീയം, യുഡിഎഫ് വിമർശനം, കേരള രാഷ്ട്രീയ വാർത്തകൾ
