സ്വാതന്ത്ര്യസമര സേനാനിയുടെ മകനായ എന്നെ ദേശസ്‌നേഹം പഠിപ്പിക്കേണ്ട: നിയമനടപടികളെ നേരിടും
കെ മുരളീധരൻ
കാസർകോട്: മുള്ളേരിയ കുടുംബാരോഗ്യ കേന്ദ്രത്തിന്റെ ലാബ് ഉദ്ഘാടനച്ചടങ്ങിനിടെ വന്ദേമാതരം പാടിത്തീരുന്നതിന് മുൻപ് വേദിയിൽ ഇരുന്ന ആരോഗ്യമന്ത്രി കെ മുരളീധരനെതിരെ രൂക്ഷവിമർശനവുമായി ബിജെപി രംഗത്തെത്തി. ചടങ്ങിൽ നടന്ന സംഭവത്തെത്തുടർന്നുണ്ടായ വിവാദങ്ങൾക്കെതിരെ മന്ത്രി ശക്തമായ ഭാഷയിലാണ് മറുപടി നൽകിയത്.
ഔദ്യോഗിക സർക്കാർ പരിപാടികളിൽ ബിജെപിയുടെ രാഷ്ട്രീയ അജണ്ടകൾ അടിച്ചേൽപ്പിക്കാൻ അനുവദിക്കില്ലെന്ന് മന്ത്രി തുറന്നടിച്ചു. ‘സർക്കാർ ആസൂത്രണം ചെയ്യുന്ന പരിപാടികളിൽ ഈശ്വര പ്രാർത്ഥനയ്ക്ക് മാത്രമാണ് മുൻകൂട്ടി നിശ്ചയിച്ച പ്രകാരം സ്ഥാനമുള്ളത്. ഔദ്യോഗിക ചടങ്ങുകളിൽ വന്ദേമാതരം ആലപിക്കുന്നതിനെ അംഗീകരിക്കാനാവില്ല. ഈ വിഷയത്തിൽ നിയമപരമായ നടപടികൾ ഉണ്ടാവുകയാണെങ്കിൽ അതിനെ നേരിടാൻ പൂർണ്ണ സജ്ജനാണ്. ഒരു സ്വാതന്ത്ര്യസമര സേനാനിയുടെ മകനായ തന്നെ ദേശസ്‌നേഹം പഠിപ്പിക്കാൻ ആരും മെനക്കെടേണ്ടതില്ല’ എന്ന് കെ മുരളീധരൻ വ്യക്തമാക്കി.
ഇന്നലെ നടന്ന ചടങ്ങിൽ മന്ത്രിയെ കൂടാതെ കാസർകോട് ജില്ലാ കളക്ടർ, എംപി രാജ്‌മോഹൻ ഉണ്ണിത്താൻ, എംഎൽഎ കല്ലട്ര മാഹിൻ എന്നിവരും വേദിയിലുണ്ടായിരുന്നു. അതേസമയം, ചടങ്ങിൽ പങ്കെടുത്ത എംഎൽഎ കെ നീലകണ്ഠനും ഡിസിസി പ്രസിഡന്റ് പി കെ ഫൈസലും വന്ദേമാതരം പൂർത്തിയാകുന്നത് വരെ എഴുന്നേറ്റ് നിൽക്കുകയുണ്ടായി.
