111 ഡോളർ കടന്ന് തീ പിടിക്കുന്ന ക്രൂഡ് വില; ഇന്ത്യയിൽ പെട്രോൾ, ഡീസൽ, ഭക്ഷ്യവില, ഇ.എം.ഐ എന്നിവയെ ബാധിക്കുന്നതിങ്ങനെ

ആഗോള വിപണിയിൽ ക്രൂഡ് ഓയിൽ വില ബാരലിന് 111 ഡോളർ കടന്നിരിക്കുകയാണ്. സൗദി അറേബ്യയിലെ പുതിയ ആക്രമണങ്ങളെ തുടർന്നുള്ള സപ്ലൈ സംബന്ധമായ ആശങ്കകളാണ് വില ഉയരാനുള്ള പ്രധാന കാരണം. അസംസ്കൃത വില ഉയരുന്നത് ഇന്ത്യയെ സംബന്ധിച്ച് നിർണായകമാണ്. രാജ്യത്തിന്റെ ക്രൂഡ് ഡിമാൻഡിന്റെ സിംഹഭാഗവും ഇറക്കുമതിയിലൂടെയാണ് നിറവേറ്റുന്നത്. ഇതിനാൽ എണ്ണ വിലയിലെ വർധന സാധാരണക്കാരന്റെ കുടുംബ ബജറ്റിന് പോലും ഭീഷണിയാണ്.എന്നാൽ ആഗോള ക്രൂഡ് ഓയിൽ വില ഉയരുന്നതുകൊണ്ട് മാത്രം ഇന്ത്യയിൽ പെട്രോൾ, ഡീസൽ വില ഉടൻ അതേ അനുപാതത്തിൽ ഉയരുമെന്ന് ഉറപ്പില്ല. എണ്ണക്കമ്പനികളുടെ വിലനിർണയം, രൂപയുടെ വിനിമയ നിരക്ക്, നികുതികൾ, സർക്കാർ നയങ്ങൾ എന്നിവയും അന്തിമ നിരക്കുകളെ സ്വാധീനിക്കുന്നുണ്ട്.ക്രൂഡ് ഓയിൽ വില വർധനയും ഇന്ത്യയുംഇന്ത്യയുടെ എണ്ണ ഇറക്കുമതി സംബന്ധമായ ചെലവ്, അന്താരാഷ്ട്ര വിപണിയിലെ ക്രൂഡ് വില, ഡോളറിനെതിരായ രൂപയുടെ മൂല്യം എന്നിവയെ ആശ്രയിച്ചിരിക്കുന്നു. ക്രൂഡ് വില ഉയരുമ്പോൾ ഇന്ത്യയ്ക്ക് എണ്ണ വാങ്ങാൻ കൂടുതൽ വിദേശനാണ്യം ചെലവഴിക്കേണ്ടിവരും. വില ഉയർന്ന നിലയിൽ ദീർഘകാലം തുടരുകയാണെങ്കിൽ വ്യാപാരക്കമ്മി വർധിക്കാനും, രൂപയുടെ മൂല്യത്തിൽ സമ്മർദമുണ്ടാകാനും, പണപ്പെരുപ്പം ഉയരാനും സാധ്യതയുണ്ട്.സാധാരണക്കാരെ എങ്ങനെ ബാധിക്കും?ഇന്ധനവില ഉയർന്നാൽ സ്വന്തമായി വാഹനങ്ങൾ ഉപയോഗിക്കുന്നവരുടെ യാത്രാച്ചെലവ് കൂടാം. വിലവർധന ഉപഭോക്താക്കളിലേക്ക് കൈമാറുന്ന സാഹചര്യത്തിൽ പ്രതിമാസ കുടുംബ ബജറ്റിൽ കൂടുതൽ തുക ഇന്ധനത്തിനായി മാറ്റിവെക്കേണ്ടിവരും.ചരക്കുനീക്കത്തിൽ ഡീസലിന് വലിയ പങ്കുണ്ട്. ട്രക്ക്, ലോറി തുടങ്ങിയവയുടെ ചെലവ് ഉയർന്നാൽ പച്ചക്കറി, പഴം, പാൽ, ധാന്യങ്ങൾ, പാക്കറ്റ് ഉൽപ്പന്നങ്ങൾ എന്നിവയുടെ വിതരണച്ചെലവും കൂടാം. വ്യാപാരികൾ ഈ ചെലവിന്റെ ഒരു ഭാഗം വിലയിൽ ഉൾപ്പെടുത്തിയാൽ അടുക്കള ബജറ്റിനും സമ്മർദമുണ്ടാകും.ഇന്ധനച്ചെലവ് വർധിച്ചാൽ ഓട്ടോ, ടാക്സി, ചരക്കുവാഹനങ്ങൾ എന്നിവയുടെ പ്രവർത്തനച്ചെലവ് കൂടും. നിരക്കുകൾ വർധിപ്പിക്കുന്ന സാഹചര്യമുണ്ടായാൽ ദിവസേന യാത്ര ചെയ്യുന്ന ജീവനക്കാർക്കും, വിദ്യാർഥികൾക്കും അധിക ചെലവ് വരാം.വാണിജ്യ എൽപിജി, ഗതാഗതം, ഭക്ഷ്യവസ്തുക്കൾ എന്നിവയുടെ ചെലവ് ഉയർന്നാൽ ഹോട്ടലുകൾക്കും ചെറുകിട ഭക്ഷണശാലകൾക്കും സമ്മർദമുണ്ടാകും. ഇത് ഭക്ഷണവില ഉയരാനുള്ള ഒരു കാരണമാകാം. എന്നാൽ പാചകവാതക വില, ക്രൂഡ് വിലയോടൊപ്പം ഒരേ തോതിൽ ഉടൻ മാറണമെന്നില്ല.ക്രൂഡ് വില – ഇ.എം.ഐ, പലിശ നിരക്കുകളിലെ സ്വാധീനംക്രൂഡ് വില ഉയരുന്നത് പണപ്പെരുപ്പത്തിൽ സമ്മർദമുണ്ടാക്കാം. പണപ്പെരുപ്പം ദീർഘകാലം ഉയർന്നുനിന്നാൽ റിസർവ് ബാങ്കിന്റെ പലിശനിരക്ക് സംബന്ധിച്ച തീരുമാനങ്ങൾ കൂടുതൽ സങ്കീർണമാകും. ഭാവിയിൽ റിപ്പോ നിരക്ക് ഉയർത്തേണ്ട സാഹചര്യം ഉണ്ടായാൽ പുതിയ വായ്പകളുടെ ചെലവിനെയും, ഫ്ലോട്ടിങ് നിരക്കിലുള്ള ചില വായ്പകളുടെ EMIയെയും അത് ബാധിച്ചേക്കാം.എന്നാൽ ക്രൂഡ് വില ഉയർന്നതുകൊണ്ട് മാത്രം RBI ഉടൻ പലിശനിരക്ക് ഉയർത്തുമെന്ന് പറയാനാവില്ല. പണപ്പെരുപ്പം, സാമ്പത്തിക വളർച്ച, രൂപയുടെ മൂല്യം, മറ്റ് ആഭ്യന്തര-ആഗോള ഘടകങ്ങൾ എന്നിവയും പരിഗണിച്ചാണ് കേന്ദ്രബാങ്ക് തീരുമാനങ്ങളെടുക്കുകഇന്ത്യയുടെ ഇറക്കുമതി ബില്ലിൽ എന്ത് മാറ്റമുണ്ടാകും?ക്രൂഡ് വില ഉയർന്ന നിലയിൽ തുടരുകയാണെങ്കിൽ ഇന്ത്യയുടെ എണ്ണ ഇറക്കുമതിക്ക് കൂടുതൽ പണം ചെലവഴിക്കേണ്ടിവരും. അതിന്റെ ഫലമായി വിദേശനാണ്യത്തിന്റെ ഡിമാൻഡ് കൂടുകയും വ്യാപാരക്കമ്മി വർധിക്കാനുള്ള സാധ്യതയുണ്ടാകുകയും ചെയ്യും. ഡോളറിനെതിരെ രൂപ ദുർബലമായാൽ എണ്ണ ഇറക്കുമതിയുടെ രൂപയിലെ ചെലവ് വീണ്ടും ഉയരാം.ഇതിന്റെ ആഘാതം സർക്കാരിന്റെ സാമ്പത്തിക കണക്കുകളിലും പ്രതിഫലിക്കാം. ഇന്ധന നികുതി, സബ്സിഡി, എണ്ണക്കമ്പനികളുടെ ചെലവ് എന്നിവയുമായി ബന്ധപ്പെട്ട തീരുമാനങ്ങൾ. ഉപഭോക്താക്കളിലേക്ക് ചെലവ് എത്രത്തോളം കൈമാറപ്പെടുന്നു എന്നതിനെ സ്വാധീനിക്കും.അതേസമയം, ആഗോള ക്രൂഡ് വിലയിലെ ഓരോ വർധനയും ഇന്ത്യയിലെ പെട്രോൾ-ഡീസൽ വിലയിൽ ഉടൻ അതേ അളവിൽ പ്രതിഫലിക്കണമെന്നില്ല. വില എത്ര ഉയരുന്നു എന്നതുപോലെ തന്നെ, ഉയർന്ന വില എത്രകാലം തുടരുന്നു എന്നതും നിർണായകമാണ്.


Read News