മുദ്രാവാക്യം വിളികളിൽ കഴുത്തുളുക്കുന്ന പ്രശ്നമില്ല: പിണറായിക്ക് മറുപടിയുമായി റോജി എം ജോൺ
മഹാരാജാസ് കോളേജിലെ എസ്.എഫ്.ഐ സമരവുമായി ബന്ധപ്പെട്ട് പ്രതിപക്ഷ നേതാവ് പിണറായി വിജയൻ ഉന്നയിച്ച വിമർശനങ്ങൾക്ക് ചുട്ട മറുപടിയുമായി മന്ത്രി റോജി എം. ജോൺ രംഗത്തെത്തി. എന്റെ ഭാഗത്തും പിഴവുകൾ സംഭവിച്ചിട്ടുണ്ട്. അങ്ങ് പൊതുവേദികളിൽ സ്വീകരിക്കാറുള്ളത് പോലെ, സമരം ചെയ്യുന്നവരെ ‘കടക്ക് പുറത്ത്’ എന്ന് ആക്രോശിച്ചോ, വീട്ടിൽ പോയി പരാതി പറയാൻ ആജ്ഞാപിച്ചോ ആട്ടിയോടിക്കണമായിരുന്നു. അങ്ങനെ ചെയ്താൽ മാത്രമേ അങ്ങയുടെ ഉന്നതമായ ജനാധിപത്യ ബോധം എനിക്കും സ്വന്തമാകുമായിരുന്നുള്ളൂ എന്ന് മന്ത്രി പരിഹാസരൂപേണ ഫേസ്ബുക്ക് കുറിപ്പിലൂടെ വ്യക്തമാക്കി. മുദ്രാവാക്യങ്ങൾ കേൾക്കുമ്പോൾ അങ്ങയുടെ സഹപ്രവർത്തകർ കാണിക്കാറുള്ള അസ്വസ്ഥതകളൊന്നും തനിക്കില്ലെന്നും, ജനാധിപത്യപരമായ സംവാദത്തിന്റെ ഭാഷ മാത്രമേ തനിക്ക് വശമുള്ളൂവെന്നും റോജി എം. ജോൺ കൂട്ടിച്ചേർത്തു.
മന്ത്രി റോജി എം. ജോണിന്റെ ഫേസ്ബുക്ക് പോസ്റ്റിലെ പ്രധാന ഭാഗങ്ങൾ:
ബഹുമാനപ്പെട്ട പ്രതിപക്ഷ നേതാവേ,
എന്റെ ഭാഗത്തും തെറ്റുകൾ സംഭവിച്ചിട്ടുണ്ട്. താങ്കൾ പതിവായി ചെയ്യാറുള്ളത് പോലെ പ്രതിഷേധിക്കുന്നവരെ ‘പുറത്തേക്ക് പോകൂ’ എന്ന് ആട്ടിയോടിക്കാനോ, വീട്ടിൽ പോയി ചോദിക്കാനോ പറഞ്ഞ് അങ്ങ് പുലർത്തുന്ന ഉന്നത നിലവാരത്തിലുള്ള ‘ജനാധിപത്യ ബോധം’ ഞാനും കാണിക്കണമായിരുന്നു. അതല്ലെങ്കിൽ, താങ്കൾ മുൻപ് ചെയ്തതുപോലെ കയ്യിൽ ഹെൽമറ്റോ ചെടിച്ചട്ടിയോ നൽകി ഒരു വിഭാഗം ആളുകളെക്കൊണ്ട് ‘രക്ഷാപ്രവർത്തനം’ നടത്തിച്ച് അങ്ങയുടേതായ ആ മഹത്തായ ‘മനുഷ്യത്വം’ ഞാനും പ്രകടിപ്പിക്കണമായിരുന്നു. ഒന്നുകിൽ കറുത്ത മാസ്ക്, വസ്ത്രം, ബാനർ എന്നിവയ്ക്ക് കർശന വിലക്കേർപ്പെടുത്തി താങ്കളെപ്പോലെ പ്രതിഷേധക്കാരുമായി ഐക്യദാർഢ്യം പ്രഖ്യാപിക്കണമായിരുന്നു. അങ്ങയുടെ ഒപ്പമുള്ളവരെപ്പോലെ മുദ്രാവാക്യങ്ങൾ കേൾക്കുമ്പോൾ കഴുത്തുളുക്കുന്ന അസുഖമൊന്നും എനിക്കില്ല.
ജനാധിപത്യത്തിന്റെ മാന്യമായ ഭാഷ മാത്രമേ എനിക്ക് കൈവശമുള്ളൂ. അതൊരു പരിമിതിയാണെന്ന് കരുതുന്നുണ്ടെങ്കിൽ, ആ കുറവ് അങ്ങനെ തന്നെ തുടരട്ടെ.
