ഭർത്താവിന്റെ അസുഖം മാറ്റാനെത്തിയ പൂജാരി വീട്ടമ്മയെ പീഡിപ്പിച്ചു; ഏഴ് വർഷം കഠിനതടവും പിഴയും
തിരുവനന്തപുരം∙ ഭർത്താവിനെ ബാധിച്ച ദുരാത്മാവിനെ ഒഴിപ്പിക്കാമെന്ന് വിശ്വസിപ്പിച്ച് വീട്ടമ്മയെ ക്രൂരമായ പീഡനത്തിനിരയാക്കിയ പൂജാരിക്ക് ഏഴ് വർഷം കഠിനതടവും അരലക്ഷം രൂപ പിഴയും വിധിച്ച് കോടതി. ആലപ്പുഴ ഏഴുപുന്ന പുതുകുളങ്ങര വൈകുണ്ഠം വീട്ടിൽ താമസിക്കുന്ന രാജേഷിനെയാണ് പട്ടികജാതി-പട്ടികവർഗ പീഡന നിരോധന പ്രത്യേക കോടതി ജഡ്ജി എ. ഷാജഹാൻ ശിക്ഷയ്ക്ക് വിധേയനാക്കിയത്. പിഴ അടയ്ക്കുന്നതിൽ വീഴ്ച വരുത്തിയാൽ പ്രതി ഒരു വർഷം കൂടി അധിക തടവ് അനുഭവിക്കേണ്ടി വരും.
2016 ഏപ്രിൽ മാസത്തിലാണ് കേസിനാസ്പദമായ ഞെട്ടിപ്പിക്കുന്ന സംഭവം നടന്നത്. ഭർത്താവിനെ അലട്ടുന്ന ദുഷ്ടശക്തികളെ അകറ്റാൻ വിശേഷാൽ പൂജകൾ അനിവാര്യമാണെന്ന് പറഞ്ഞ് തെറ്റിദ്ധരിപ്പിച്ചാണ് പ്രതി വീട്ടമ്മയെ ക്ഷേത്രത്തിലേക്ക് വരുത്തിയത്. തുടർന്ന് ക്ഷേത്രത്തിലെ സ്റ്റോർ റൂമിലേക്ക് കൂട്ടിക്കൊണ്ടുപോയി വീട്ടമ്മയെ ബലാത്സംഗം ചെയ്തുവെന്നാണ് പ്രോസിക്യൂഷൻ കോടതിയിൽ സമർപ്പിച്ച കുറ്റപത്രത്തിൽ വ്യക്തമാക്കുന്നത്.
