രാത്രിയിൽ കൂടെക്കൂടെയുള്ള മൂത്രശങ്ക ഹൃദയസംബന്ധമായ രോഗങ്ങളുടെ ലക്ഷണമാകാം
രാത്രിയിൽ പലതവണ മൂത്രശങ്ക തോന്നി ഉണരുന്നത് പലരും ഗൗരവമായി എടുക്കാറില്ല. എന്നാൽ, ഇതൊരു നിസ്സാരമായ ശാരീരിക അവസ്ഥയായി തള്ളിക്കളയരുതെന്ന് ഹൃദ്രോഗ വിദഗ്ധനായ ഡോ. അനിൽ സലീം മുന്നറിയിപ്പ് നൽകുന്നു. ഹൃദയത്തിന്റെ പ്രവർത്തനം മന്ദഗതിയിലാകുന്നു എന്നതിന്റെ പ്രധാനപ്പെട്ട ഒരു സൂചനയായിരിക്കാം ഇതെന്നും അദ്ദേഹം തന്റെ ഫേസ്ബുക്ക് വീഡിയോയിലൂടെ വ്യക്തമാക്കി.
പകൽ സമയങ്ങളിൽ നമ്മൾ നിവർന്നു നിൽക്കുമ്പോഴോ നടക്കുമ്പോഴോ ഹൃദയത്തിന് ശരീരത്തിലെ രക്തം കാര്യക്ഷമമായി പമ്പ് ചെയ്യാൻ ബുദ്ധിമുട്ട് നേരിട്ടേക്കാം. ഹൃദയത്തിന്റെ പമ്പിങ് ശേഷി കുറയുമ്പോൾ ശരീരത്തിലെ ദ്രാവകങ്ങൾ കാലുകളിൽ അടിഞ്ഞുകൂടുന്നു. വൈദ്യശാസ്ത്രത്തിൽ ഇതിനെ ‘ഡിപെൻഡന്റ് എഡിമ’ (Dependent Edema) എന്ന് വിളിക്കുന്നു. എന്നാൽ, രാത്രിയിൽ കിടക്കുമ്പോൾ ഗുരുത്വാകർഷണ ബലത്തിൽ മാറ്റം വരികയും കാലുകളിൽ കെട്ടിക്കിടക്കുന്ന ഈ അധിക ജലാംശം ഹൃദയത്തിലേക്ക് ഒഴുകിയെത്തുകയും ചെയ്യുന്നു. ഈ ദ്രാവകം പിന്നീട് വൃക്കകളിലെത്തുകയും, വൃക്കകൾ അത് അമിതമാണെന്ന് കണ്ട് മൂത്രത്തിലൂടെ പുറന്തള്ളുകയും ചെയ്യുന്നതാണ് ഇടയ്ക്കിടെ മൂത്രശങ്ക അനുഭവപ്പെടാൻ കാരണം.
ഹൃദയത്തിന്റെ പമ്പിങ് കുറവുള്ള രോഗികൾക്ക് പകൽ സമയത്ത് ശരീരത്തിലെ ജലാംശം അരിച്ചുമാറ്റാൻ സാധിക്കില്ലെന്നും, കിടക്കുമ്പോൾ മാത്രമാണ് വൃക്കകൾക്ക് ഈ ജോലി ചെയ്യാൻ കഴിയുന്നതെന്നും ഡോക്ടർ വിശദീകരിക്കുന്നു. ഹൃദയത്തിൽ ജലാംശം കൂടുമ്പോൾ ‘എ.എൻ.പി’ (ANP) എന്നൊരു ഹോർമോൺ ഉൽപ്പാദിപ്പിക്കപ്പെടും. ഇത് വൃക്കകളോട് രക്തത്തിലെ വെള്ളം അരിച്ചുമാറ്റാൻ നേരിട്ട് നിർദ്ദേശം നൽകുന്നു. രാത്രിയിൽ രക്തസമ്മർദ്ദം കൂടുന്നത് ഹൃദയത്തിന് നല്ലതല്ല. അതിനാൽ ഇത്തരമൊരു അവസ്ഥ ഹൃദയത്തിന്റെ തകരാറിലേക്കുള്ള ആദ്യപടിയായി കണ്ടുതന്നെ ചികിത്സ തേടണം.
രാത്രിയിലെ അമിത മൂത്രശങ്ക നിയന്ത്രിക്കാൻ ശ്രദ്ധിക്കേണ്ട കാര്യങ്ങൾ:
- ഉറങ്ങുന്നതിന് രണ്ട് മണിക്കൂർ മുമ്പ്, കാലുകൾ ഹൃദയഭാഗത്തേക്കാൾ അല്പം ഉയർന്നിരിക്കത്തക്ക രീതിയിൽ ഒരു 20 മിനിറ്റ് വിശ്രമിക്കുന്നത് സഹായകമാണ്. എന്നാൽ ഹൃദ്രോഗമുള്ളവർ ഇത് ചെയ്യുന്നതിന് മുൻപ് ഡോക്ടറുടെ ഉപദേശം തേടണം.
- ഉച്ചയ്ക്ക് ശേഷം ഉപ്പടങ്ങിയ ഭക്ഷണപദാർത്ഥങ്ങൾ കുറയ്ക്കുക. അമിതമായി ഉപ്പ് കഴിക്കുന്നത് ശരീരത്തിൽ വെള്ളം കെട്ടിക്കിടക്കാനും ഹൃദയത്തിന് കൂടുതൽ ജോലിഭാരം നൽകാനും ഇടയാക്കും.
- വൈകുന്നേരം ആറു മണിക്ക് ശേഷം ധാരാളം വെള്ളം കുടിക്കുന്നത് ഒഴിവാക്കാൻ ശ്രമിക്കുക.
- പകൽ സമയങ്ങളിൽ കാലുകളിൽ ഇറുകിയ സോക്സുകൾ ഉപയോഗിക്കുന്നത് രക്തം കാലിൽ കെട്ടിക്കിടക്കുന്നത് തടയാൻ സഹായിക്കും. ഇത് പകൽ സമയം തന്നെ മൂത്രത്തിലൂടെ വെള്ളം പുറന്തള്ളപ്പെടാൻ വഴിയൊരുക്കുന്നു.
- പ്രമേഹം കൃത്യമായി നിയന്ത്രിക്കുക. രക്തത്തിൽ പഞ്ചസാരയുടെ അളവ് കൂടിയാൽ രാത്രിയിൽ മൂത്രശങ്ക വർധിക്കും.
- രാത്രിയിലെ കൂർക്കംവലി, സ്ലീപ്പ് അപ്നിയ (Sleep Apnea) തുടങ്ങിയ പ്രശ്നങ്ങളുള്ളവർ അത് ചികിത്സിച്ചു ഭേദമാക്കണം.
- അവസ്ഥ ഗുരുതരമാണെങ്കിൽ, ഒരു എക്കോ കാർഡിയോഗ്രാം (Echo Test) നടത്തി ഹൃദയത്തിന്റെ പമ്പിങ് ശേഷി പരിശോധിക്കാൻ മറക്കരുത്.
എല്ലാവരിലും ഈ ലക്ഷണം ഹൃദ്രോഗം മൂലമാകണമെന്നില്ലെങ്കിലും, പലരിലും ഇത് ഹൃദയത്തിന്റെ ആരോഗ്യത്തെക്കുറിച്ചുള്ള ഒരു നിർണായക മുന്നറിയിപ്പായിരിക്കുമെന്ന് ഡോ. അനിൽ സലീം ഓർമ്മിപ്പിക്കുന്നു.
