യുവതലമുറയിലെ വർധിച്ചുവരുന്ന പക്ഷാഘാതം: ശരീരത്തിന്റെ മുന്നറിയിപ്പുകൾ അവഗണിക്കരുത്
സ്ട്രോക്ക് അല്ലെങ്കിൽ പക്ഷാഘാതം എന്നത് വയോധികരെ മാത്രം ബാധിക്കുന്ന ഒരു ആരോഗ്യപ്രശ്നം എന്ന തെറ്റിദ്ധാരണ ഇന്നും പലരിലുമുണ്ട്. എന്നാൽ, സമീപകാലത്തെ മെഡിക്കൽ റിപ്പോർട്ടുകൾ വിശകലനം ചെയ്താൽ, 50 വയസ്സിന് താഴെയുള്ള യുവാക്കളിലും സ്ട്രോക്ക് കേസുകൾ ആശങ്കാജനകമായ രീതിയിൽ വർദ്ധിച്ചുവരുന്നതായി കാണാൻ സാധിക്കും. നമ്മുടെ ജീവിതശൈലിയിലുണ്ടായ മാറ്റങ്ങളും പലപ്പോഴും ശ്രദ്ധിക്കപ്പെടാതെ പോകുന്ന ആരോഗ്യപ്രശ്നങ്ങളും കാരണം, റിപ്പോർട്ട് ചെയ്യപ്പെടുന്ന സ്ട്രോക്ക് കേസുകളിൽ നാലിലൊന്നും യുവാക്കളിലാണ്. പ്രായമായവരിൽ കാണപ്പെടുന്ന സ്ട്രോക്കിൽ നിന്ന് വ്യത്യസ്തമായി, ചെറുപ്പക്കാരിൽ ഇതിനുള്ള കാരണങ്ങൾ കൂടുതൽ സങ്കീർണ്ണമാണ്.
യുവാക്കളിൽ രക്തധമനികളിൽ തടസ്സമുണ്ടാകുന്ന (ഇസ്കെമിക് സ്ട്രോക്ക്) അല്ലെങ്കിൽ അവ പൊട്ടി രക്തസ്രാവമുണ്ടാകുന്ന (ഹെമറേജിക് സ്ട്രോക്ക്) സാഹചര്യങ്ങളിലേക്ക് നയിക്കുന്ന പ്രധാന ഘടകങ്ങൾ താഴെ പറയുന്നവയാണ്:
ശാരീരിക ചലനങ്ങൾ കുറഞ്ഞ ജീവിതരീതിയും അമിതവണ്ണവും: ദീർഘനേരം ഒരേയിരുപ്പിൽ ജോലി ചെയ്യുന്നതും വ്യായാമക്കുറവും ആരോഗ്യത്തിന് ഭീഷണിയാണ്. ഒപ്പം, സംസ്കരിച്ച ഭക്ഷണങ്ങളുടെ അമിത ഉപയോഗം അമിതവണ്ണത്തിലേക്കും അതുവഴി രക്തസമ്മർദ്ദം, പ്രമേഹം, കൊളസ്ട്രോൾ തുടങ്ങിയ ജീവിതശൈലീ രോഗങ്ങളിലേക്കും നയിക്കുന്നു.
ലഹരിവസ്തുക്കളുടെയും പുകവലിയുടെയും ഉപയോഗം: പുകയില ഉൽപ്പന്നങ്ങളും ഇ-സിഗരറ്റുകളും രക്തധമനികളുടെ ഭിത്തികളെ ബലഹീനമാക്കുന്നു. കൂടാതെ, മയക്കുമരുന്ന് പോലുള്ള രാസലഹരികളുടെ ഉപയോഗം പെട്ടെന്ന് രക്തസമ്മർദ്ദം ഉയർത്താനും ധമനികൾ ചുരുങ്ങാനും കാരണമായി മാറുന്നു. ഇത് യുവാക്കളിൽ പക്ഷാഘാതത്തിനുള്ള സാധ്യത പലമടങ്ങ് വർദ്ധിപ്പിക്കുന്നു.
തിരിച്ചറിയപ്പെടാത്ത രക്തധമനി സംബന്ധമായ തകരാറുകൾ: ജന്മനാ തലച്ചോറിലെ ധമനികളിലുണ്ടാകുന്ന ബലക്കുറവോ തകരാറുകളോ (ആർട്ടീരിയോവീനസ് മാൽഫോർമേഷൻ/അന്യൂറിസം) മിക്കപ്പോഴും പുറമേ ലക്ഷണങ്ങൾ കാണിക്കാറില്ല. ഇവ പെട്ടെന്നുള്ള രക്തസ്രാവത്തിനും സ്ട്രോക്കിനും വഴിവെക്കാം.
അമിതമായ മാനസിക സംഘർഷവും ഉറക്കക്കുറവും: ജോലിസ്ഥലത്തെ സമ്മർദ്ദങ്ങളും മാനസിക പിരിമുറുക്കവും ശരീരത്തിലെ കോർട്ടിസോൾ, അഡ്രിനാലിൻ തുടങ്ങിയ ഹോർമോണുകളുടെ സന്തുലിതാവസ്ഥ തെറ്റിക്കുന്നു. ഇത് രക്തസമ്മർദ്ദം ഉയർത്തുകയും ഗാഢനിദ്രയെ തടസ്സപ്പെടുത്തുകയും ചെയ്യുന്നു.
ഓട്ടോഇമ്മ്യൂൺ രോഗങ്ങളും രക്തസംബന്ധമായ അസുഖങ്ങളും: ശരീരത്തിന്റെ പ്രതിരോധ സംവിധാനം സ്വന്തം ധമനികളെ ആക്രമിക്കുന്ന വാസ്കുലൈറ്റിസ്, രക്തം പെട്ടെന്ന് കട്ടപിടിക്കുന്ന അവസ്ഥയായ ആന്റിഫോസ്ഫോളിപ്പിഡ് സിൻഡ്രോം (എ.പി.എസ്) തുടങ്ങിയവ ചെറുപ്പക്കാരിൽ കണ്ടുവരുന്ന പ്രധാന രോഗാവസ്ഥകളാണ്.
ലക്ഷണങ്ങൾ തിരിച്ചറിയാം: സ്ട്രോക്ക് വരുമ്പോൾ ഗ്യാസിന്റെ പ്രശ്നമായോ അതീവ ക്ഷീണമായോ തെറ്റിദ്ധരിച്ച് പലരും ചികിത്സ വൈകിപ്പിക്കാറുണ്ട്. സ്ട്രോക്കിന്റെ ലക്ഷണങ്ങൾ എളുപ്പത്തിൽ മനസ്സിലാക്കാൻ ‘BE-FAST’ എന്ന മാർഗ്ഗം സഹായിക്കും:
(B – Balance) തുലനാവസ്ഥ നഷ്ടപ്പെടുക: പെട്ടെന്നുണ്ടാകുന്ന കടുത്ത തലകറക്കം അല്ലെങ്കിൽ നടക്കുമ്പോൾ വശങ്ങളിലേക്ക് ചരിഞ്ഞുപോകുന്ന അവസ്ഥ.
(E – Eyes) കാഴ്ചയിലെ മാറ്റങ്ങൾ: പെട്ടെന്ന് ഒരു കണ്ണിന്റെയോ രണ്ട് കണ്ണുകളുടെയോ കാഴ്ച മങ്ങുകയോ രണ്ടായി കാണുകയോ ചെയ്യുക.
(F – Face) മുഖം കോടിപ്പോവുക: ചിരിക്കുമ്പോഴോ സംസാരിക്കുമ്പോഴോ മുഖത്തിന്റെ ഒരു വശം കോടിയതായും തളർന്നതായും തോന്നുക.
(A – Arms) കൈകാലുകൾക്ക് തളർച്ച: ഇരു കൈകളും നീട്ടിപ്പിടിക്കാൻ ശ്രമിക്കുമ്പോൾ ഒരു കൈ താഴേക്ക് വീണുപോകുക.
(S – Speech) സംസാരത്തിലെ തടസ്സം: സംസാരിക്കുമ്പോൾ വിക്കൽ ഉണ്ടാവുകയോ മറ്റുള്ളവർ പറയുന്നത് മനസ്സിലാക്കാൻ പ്രയാസപ്പെടുകയോ ചെയ്യുക.
(T – Time) സമയം വിലപ്പെട്ടതാണ്: ഈ ലക്ഷണങ്ങളിൽ ഏതെങ്കിലും ഒന്ന് ശ്രദ്ധയിൽപ്പെട്ടാൽ ഒട്ടും വൈകാതെ അടിയന്തര വൈദ്യസഹായം തേടുക.
ജീവൻ രക്ഷിക്കാൻ ഓരോ നിമിഷവും നിർണ്ണായകമാണ്: ലക്ഷണങ്ങൾ കണ്ടാൽ ആദ്യത്തെ മൂന്നു മുതൽ നാല് മണിക്കൂറിനുള്ളിൽ (Golden Hour) ആശുപത്രിയിൽ എത്തിക്കാൻ കഴിഞ്ഞാൽ, അത്യാധുനിക ചികിത്സകൾ വഴി തലച്ചോറിന് സംഭവിക്കാവുന്ന മാരകമായ ആഘാതങ്ങൾ ഒഴിവാക്കാനും വൈകല്യങ്ങൾ തടയാനും സാധിക്കും.
സ്ട്രോക്ക് പ്രതിരോധിക്കാം ഇങ്ങനെ:
കൃത്യമായ ആരോഗ്യ പരിശോധനകൾ: 20-30 വയസ്സ് കഴിഞ്ഞവർ ഇടയ്ക്കിടെ രക്തസമ്മർദ്ദം, പ്രമേഹം, കൊളസ്ട്രോൾ എന്നിവ പരിശോധിക്കുക.
സജീവമായ ജീവിതശൈലി: ദിവസവും വ്യായാമം ചെയ്യുക. ദീർഘനേരം ഇരിക്കുന്നവർ ഇടയ്ക്കിടെ എഴുന്നേറ്റ് നടക്കാൻ ശ്രദ്ധിക്കുക.
ആരോഗ്യകരമായ ആഹാരം: ജങ്ക് ഫുഡ്, സംസ്കരിച്ച ഭക്ഷണങ്ങൾ എന്നിവ ഒഴിവാക്കി പോഷകസമൃദ്ധമായ പച്ചക്കറികളും പഴങ്ങളും വീട്ടിലുണ്ടാക്കുന്ന ഭക്ഷണങ്ങളും ശീലമാക്കുക.
ലഹരിവർജ്ജനം: പുകവലി, മദ്യപാനം, ലഹരി ഉപയോഗം എന്നിവ പൂർണ്ണമായും ഉപേക്ഷിക്കുക.
മാനസികാരോഗ്യം: യോഗ, ധ്യാനം, കൃത്യസമയത്തുള്ള ഉറക്കം എന്നിവ വഴി സമ്മർദ്ദം ലഘൂകരിക്കുക.
ചെറുപ്പക്കാർക്ക് പക്ഷാഘാതം വരില്ലെന്ന തെറ്റിദ്ധാരണ ഉപേക്ഷിക്കുക എന്നതാണ് പ്രതിരോധത്തിന്റെ ആദ്യ പടി. ബോധവൽക്കരണത്തിലൂടെയും ആരോഗ്യകരമായ ജീവിതശൈലിയിലൂടെയും ലക്ഷണങ്ങൾ നേരത്തെ തിരിച്ചറിഞ്ഞ് കൃത്യസമയത്ത് ചികിത്സ തേടുന്നതിലൂടെ സ്ട്രോക്ക് മൂലമുണ്ടാകുന്ന അപകടങ്ങളെ നമുക്ക് പൂർണ്ണമായും പ്രതിരോധിക്കാൻ സാധിക്കും.
