ഉലുവ ഉപയോഗിച്ച് തക്കാളിയിൽ കൂടുതൽ വിളവെടുക്കാം: എളുപ്പവഴികൾ ഇതാ
പ്രതീകാത്മക ചിത്രം
എല്ലാ അടുക്കളകളിലും ഒഴിച്ചുകൂടാനാവാത്ത ഒന്നാണ് തക്കാളി. വിറ്റാമിൻ സിയുടെ കലവറയായ തക്കാളി ചർമ്മത്തിന്റെ ആരോഗ്യത്തിന് ആവശ്യമായ കൊളാജൻ ഉല്പ്പാദിപ്പിക്കാൻ സഹായിക്കുന്നു. ഇതിലടങ്ങിയിരിക്കുന്ന ലൈക്കോപീൻ എന്ന ആന്റിഓക്സിഡന്റ് സൂര്യനിൽ നിന്നുള്ള അൾട്രാവയലറ്റ് രശ്മികളിൽ നിന്ന് ചർമ്മത്തിന് സംരക്ഷണം നൽകുന്നതോടൊപ്പം, ശരീരത്തിലെ ചീത്ത കൊളസ്ട്രോളിനെ നിയന്ത്രിച്ച് രക്തസമ്മർദ്ദം കൃത്യമാക്കാനും ഉത്തമമാണ്.
വീട്ടുമുറ്റത്തോ ഗ്രോബാഗുകളിലോ തക്കാളി വളർത്താൻ എല്ലാവർക്കും താല്പര്യമാണെങ്കിലും, പലപ്പോഴും പ്രതീക്ഷിക്കുന്ന വിളവ് ലഭിക്കാറില്ല എന്നതാണ് യാഥാർത്ഥ്യം. പൂക്കൾ കൊഴിഞ്ഞുപോകുക, ഇലകൾ മഞ്ഞനിറമാകുക, ഫലങ്ങൾക്ക് വലിപ്പമില്ലാതിരിക്കുക, കീടബാധ തുടങ്ങിയവയാണ് കൃഷിയിൽ നേരിടുന്ന പ്രധാന വെല്ലുവിളികൾ. എന്നാൽ ഇത്തരം പ്രശ്നങ്ങൾക്ക് ശാശ്വതമായ പരിഹാരം കാണാൻ നമ്മുടെ അടുക്കളയിലെ സാധനങ്ങൾ മതിയാകും.
തക്കാളി ചെടികൾ സമൃദ്ധമായി കായ്ക്കാൻ സഹായിക്കുന്ന അത്ഭുതകരമായ ഒരു വിദ്യ ഉലുവ ഉപയോഗിച്ച് ചെയ്യാം. ചെടിയുടെ വളർച്ചയ്ക്കും മണ്ണിലെ നൈട്രജന്റെ അളവ് വർദ്ധിപ്പിക്കുന്നതിനും ഉലുവ അത്യുത്തമമാണ്. ഇതിനായി ഒരുപിടി ഉലുവ ഒരു ലിറ്റർ വെള്ളത്തിൽ ഏകദേശം ഒന്ന് മുതൽ രണ്ട് ദിവസം വരെ നന്നായി കുതിർത്തു വെക്കുക. ശേഷം, കുതിർത്ത വെള്ളത്തോടൊപ്പം ഉലുവയും ചേർത്ത് നന്നായി അരച്ചെടുക്കണം.
ഈ മിശ്രിതം അല്പം കൂടി വെള്ളം ചേർത്ത് നേർപ്പിച്ച ശേഷം തക്കാളിച്ചെടികളുടെ ചുവട്ടിൽ ഒഴിച്ചുകൊടുക്കാവുന്നതാണ്. ആഴ്ചയിൽ രണ്ടോ മൂന്നോ പ്രാവശ്യം ഇങ്ങനെ ചെയ്യുന്നത് മികച്ച ഫലം നൽകും. കൂടാതെ, ഉലുവ നേരിട്ടും വളമായി ഉപയോഗിക്കാം. ഉലുവ ലേശം വറുത്തെടുത്ത ശേഷം നന്നായി പൊടിച്ച്, ചെടിച്ചുവട്ടിലെ മണ്ണിൽ വിതറി മണ്ണ് അല്പം ഇളക്കി കൊടുക്കുക. ഇത് മണ്ണിലെ സൂക്ഷ്മജീവികളുടെ പ്രവർത്തനം സുഗമമാക്കാൻ സഹായിക്കും.
ഉലുവയിലുള്ള ഫോസ്ഫറസും നൈട്രജനും തക്കാളിച്ചെടിയുടെ ഇലകൾക്ക് നല്ല പച്ചപ്പും കരുത്തും നൽകുന്നു. ചെടിയുടെ വേരുകൾ മണ്ണിൽ ആഴത്തിൽ പടർന്ന് പിടിക്കാനും ഇത് സഹായിക്കും. കീടങ്ങളെ അകറ്റി നിർത്തി ചെടികളെ രോഗവിമുക്തമായി സംരക്ഷിക്കാനും ഉലുവ അടിസ്ഥാനമാക്കിയുള്ള ഈ ജൈവവളം വളരെ ഫലപ്രദമാണ്.
