അനിരുദ്ധും കാവ്യ മാരനും ഒന്നിക്കുന്നു? ഗ്രീസിലെ ആഡംബര വിവാഹവും 500 കോടിയുടെ ബിസിനസ്സ് കണക്കുകളും പുറത്ത്!
‘വൈ ദിസ് കൊലവെറി ഡി’ എന്ന സൂപ്പർ ഹിറ്റ് ഗാനത്തിലൂടെയാണ് അനിരുദ്ധ് രവിചന്ദർ എന്ന യുവ സംഗീത പ്രതിഭ സംഗീത ലോകത്ത് തന്റേതായ ഇടം കണ്ടെത്തിയത്. പിന്നീട് സംഗീതം നൽകിയ ചിത്രങ്ങളെല്ലാം വൻ വിജയങ്ങളാക്കി മാറ്റിയ അനിരുദ്ധ്, തമിഴ്, തെലുങ്ക്, ഹിന്ദി ചലച്ചിത്ര രംഗത്തെ ഏറ്റവും തിരക്കുള്ള സംഗീത സംവിധായകനായി ഉയർന്നു. രജനികാന്ത്, വിജയ്, അജിത്, ഷാറുഖ് ഖാൻ തുടങ്ങിയ വമ്പൻ താരങ്ങളെല്ലാം അനിരുദ്ധിന്റെ സംഗീതത്തിനൊത്ത് ചുവടുവെച്ചവരാണ്.
ഇപ്പോഴിതാ, സൺ ഗ്രൂപ്പ് ചെയർമാൻ കലാനിധി മാരന്റെ മകളും സൺ ടിവി നെറ്റ്‍വർക്ക് എക്സിക്യൂട്ടീവ് ഡയറക്ടറും സൺറൈസേഴ്സ് ഹൈദരാബാദിന്റെ ഉടമയുമായ കാവ്യ മാരനുമായി അനിരുദ്ധ് പ്രണയത്തിലാണെന്നും ഇരുവരും വിവാഹിതരാകാൻ പോകുന്നുവെന്നുമുള്ള വാർത്തയാണ് സമൂഹമാധ്യമങ്ങളിൽ നിറയുന്നത്. വരാനിരിക്കുന്ന നവംബർ 11-ന് ഗ്രീസിൽ വെച്ചാണ് ഇവരുടെ വിവാഹം നടക്കുകയെന്നും, തുടർന്ന് നവംബർ 21-ന് ചെന്നൈയിൽ വെച്ച് വിവാഹ സൽക്കാരം സംഘടിപ്പിക്കുമെന്നുമാണ് റിപ്പോർട്ടുകൾ.
അനിരുദ്ധ് സംഗീതം പകർന്ന രജനികാന്ത് ചിത്രം ‘ജയിലർ 2’ തിയേറ്ററുകളിൽ വൻ തരംഗം സൃഷ്ടിക്കുന്നതിനിടെയാണ് ഇരുവരുടെയും വിവാഹത്തെക്കുറിച്ചുള്ള വാർത്തകളും പുറത്തുവന്നിരിക്കുന്നത്. ഇതോടെ അനിരുദ്ധിന്റെയും കാവ്യയുടെയും സാമ്പത്തിക നിലയും സിനിമയുമായുള്ള അവരുടെ ബന്ധവുമെല്ലാം ചർച്ചാവിഷയമായിരിക്കുകയാണ്.
2012-ൽ പുറത്തിറങ്ങിയ ‘3’ എന്ന ചിത്രത്തിലെ ധനുഷ് ആലപിച്ച ‘വൈ ദിസ് കൊലവെറി ഡി’ എന്ന ഗാനത്തിലൂടെയാണ് അനിരുദ്ധ് സംഗീത ലോകത്ത് അവിസ്മരണീയമായ തുടക്കം കുറിച്ചത്. ആ വിജയം അദ്ദേഹത്തിന് വലിയ അവസരങ്ങൾ നേടിക്കൊടുത്തു. വിവിധ റിപ്പോർട്ടുകൾ പ്രകാരം 60 കോടി രൂപയോളമാണ് അനിരുദ്ധിന്റെ ആസ്തി. സിനിമകൾക്ക് സംഗീതം നൽകുന്നതിനും പശ്ചാത്തല സംഗീതം ഒരുക്കുന്നതിനും പുറമെ ലൈവ് മ്യൂസിക്കൽ ഷോകളിലൂടെയും അദ്ദേഹം വലിയൊരു തുക വരുമാനമായി കണ്ടെത്തുന്നുണ്ട്.
Disclaimer: ഈ വാർത്തയ്ക്കൊപ്പം ഉപയോഗിച്ചിരിക്കുന്ന ചിത്രം മനോരമയുടേതല്ല. അത് X/@Cinetrendsskൽ നിന്ന് എടുത്തിട്ടുള്ളതാണ്. ഈ വാർത്ത കൂടുതൽ വ്യക്തവും സമഗ്രവുമാക്കുന്നതിനാണ് ഈ ചിത്രം ഉപയോഗിച്ചിരിക്കുന്നത്.
