ക്രിപ്‌റ്റോയിൽ പോയത് പോസ്റ്റുകളിൽ പിടിക്കാൻ ട്രംപ്! ട്രൂത്ത് സോഷ്യൽ പോസ്റ്റുകൾ ആദ്യം ലഭിക്കാൻ ‘കോടികൾ’ നൽകണം

ഹൂസ്റ്റൺ∙ ട്രംപ് മീഡിയയുടെ ‘ട്രൂത്ത് എപിഐ’ സർവീസ് വാൾസ്ട്രീറ്റ് കമ്പനികളെ ഉപഭോക്താക്കളാക്കി മാറ്റിക്കഴിഞ്ഞു. സംഭവം സത്യമാണ്. കനത്ത ക്രിപ്‌റ്റോ നഷ്ടത്തിനിടയിലും വരുമാനം കണ്ടെത്താനുള്ള കമ്പനിയുടെ ശ്രമങ്ങളുടെ ഭാഗമായി, ട്രൂത്ത് സോഷ്യലിലെ പോസ്റ്റുകൾ വേഗത്തിൽ ലഭ്യമാക്കുന്ന സേവനമാണ് ഇവർ നൽകുന്നത്.ട്രംപ് മീഡിയ ട്രൂത്ത് എപിഐ സേവനത്തിനായി 10-ലധികം ഉപഭോക്താക്കളെ സ്വന്തമാക്കി. ട്രംപിന്റെ ട്രൂത്ത് സോഷ്യൽ പ്ലാറ്റ്ഫോമിലെ സ്വാധീനമുള്ള അക്കൗണ്ടുകൾ പങ്കുവയ്ക്കുന്നതും മാർക്കറ്റിനെ സ്വാധീനിക്കാൻ ശേഷിയുള്ളതുമായ പോസ്റ്റുകൾ വേഗത്തിൽ ലഭിക്കാൻ ഈ സേവനം വാൾസ്ട്രീറ്റ് വ്യാപാരികളെ സഹായിക്കും. ഓഗസ്റ്റ് തുടക്കത്തിലാണ് ട്രൂത്ത് എപിഐ ആരംഭിച്ചത്. പ്രമുഖ ട്രൂത്ത് സോഷ്യൽ അക്കൗണ്ടുകളിൽ നിന്നുള്ള പോസ്റ്റുകൾ വിവരങ്ങൾ വ്യാപകമായി പ്രചരിക്കുന്നതിന് മുൻപ് തന്നെ ചില വരിക്കാർക്ക് മുൻകൂട്ടി കാണാൻ അവസരമൊരുക്കുന്ന രീതിയിലാണ് ഇത് രൂപകൽപന ചെയ്തിരിക്കുന്നത്.എന്നിരുന്നാലും, ഈ ബിസിനസ് മോഡൽ നിയമപരവും ധാർമികവുമായ ചോദ്യങ്ങൾ ഉയർത്തിയിട്ടുണ്ട്. പ്രസിഡന്റിന്റെ കുടുംബവുമായി ബന്ധമുള്ള ഒരു കമ്പനി അദ്ദേഹത്തിന്റെ പൊതു പ്രസ്താവനകളിൽ നിന്ന് പണം സമ്പാദിക്കുന്നത് ഉചിതമാണോ എന്ന് വിമർശകർ ചോദ്യം ചെയ്യുന്നു. ട്രംപ് മീഡിയയുടെ ഭൂരിഭാഗം ഓഹരികളും ഇപ്പോഴും ട്രംപിന്റെ കുടുംബത്തിന്റെ കൈവശമാണ്. യുഎസ് പ്രസിഡന്റ് കൂടിയായ ട്രംപ് പോസ്റ്റ് ചെയ്യുന്ന വിവരങ്ങളിൽ നിന്ന് കമ്പനി ലാഭമുണ്ടാക്കുന്നുവെന്ന ആശങ്ക ഇത് വർധിപ്പിക്കുന്നു.


Fashion ⏭️