വളർമതി വീണ്ടും സമരപ്പന്തലിൽ: നിരാഹാരസമരം പുനരാരംഭിച്ചു
തിരുവനന്തപുരം: സെക്രട്ടേറിയറ്റിന് മുന്നിൽ എൽപിഎസ്ടി റാങ്ക് ഹോൾഡേഴ്‌സ് അസോസിയേഷൻ നടത്തിവരുന്ന പ്രതിഷേധ സമരത്തിനിടെ, ഇന്നലെ രാത്രി പൊലീസ് നിർബന്ധപൂർവം ആശുപത്രിയിലേക്ക് മാറ്റിയ സമരസമിതി നേതാവ് വളർമതി വീണ്ടും സമരഭൂമിയിൽ തിരിച്ചെത്തി. ഉച്ചയോടെ സമരപ്പന്തലിൽ വീണ്ടുമെത്തിയ അവർ തന്റെ നിരാഹാര സമരം തുടരുമെന്ന് പ്രഖ്യാപിച്ചു. തങ്ങളുടെ ന്യായമായ ആവശ്യങ്ങൾ നിറവേറ്റാതെ അടിച്ചമർത്തലിലൂടെ സമരം അവസാനിപ്പിക്കാമെന്ന് കരുതേണ്ടെന്ന് വളർമതി സർക്കാരിന് മുന്നറിയിപ്പ് നൽകി.
സർക്കാരിന് ഒരുതരത്തിലുള്ള സാമ്പത്തിക ബാധ്യതയുമില്ലാത്ത കാര്യങ്ങൾ പോലും പരിഗണിക്കാതെ തങ്ങളെ വഞ്ചിക്കുകയാണെന്ന് അവർ കുറ്റപ്പെടുത്തി. ആരോഗ്യനില വഷളാണെന്ന് പറഞ്ഞ് ഇന്നലെ രാത്രി ബലം പ്രയോഗിച്ചാണ് തന്നെ ആശുപത്രിയിലേക്ക് കൊണ്ടുപോയത്. എന്നാൽ അവിടെ നടത്തിയ വൈദ്യപരിശോധനയിൽ തനിക്ക് ആരോഗ്യപ്രശ്നങ്ങളൊന്നും ഇല്ലെന്ന് വ്യക്തമായിട്ടും തന്നെ ഐസിയുവിൽ പ്രവേശിപ്പിക്കുകയായിരുന്നു. പിറ്റേന്ന് രാവിലെ വരെ യാതൊരു വിധത്തിലുള്ള ചികിത്സയും ലഭ്യമാക്കിയിട്ടില്ലെന്നും, സമരപ്പന്തലിൽ നിന്ന് മാറ്റി നിർത്തുക എന്ന ലക്ഷ്യത്തോടെയാണ് മനഃപൂർവം തന്നെ അവിടെ കിടത്തിയതെന്നും വളർമതി ആരോപിച്ചു. അധികാരത്തിൽ എത്തിയപ്പോൾ സമരം അനാവശ്യമാണെന്ന തോന്നൽ സർക്കാരിന് ഉണ്ടായതിൽ അത്ഭുതമില്ലെന്നും അവർ പരിഹസിച്ചു.
