വിജയ്‌ക്കൊപ്പം വിവാഹച്ചടങ്ങിൽ പങ്കെടുത്ത തൃഷയുടെ 80,000 രൂപയുടെ സാരിയും ലുക്കും ശ്രദ്ധേയമാകുന്നു
ആന്ധ്രാപ്രദേശ് മുൻ മുഖ്യമന്ത്രി വൈ.എസ്. ജഗൻ മോഹൻ റെഡ്ഡിയുടെ അടുത്ത ബന്ധുവായ വൈ.എസ്. അനിൽ റെഡ്ഡിയുടെ മകളുടെ വിവാഹ സൽക്കാരം ചെന്നൈയിലെ ലീലാ പാലസിൽ വെച്ച് വിപുലമായ രീതിയിൽ നടന്നു. നിരവധി പ്രമുഖർ അണിനിരന്ന ഈ ചടങ്ങിൽ തമിഴ് സിനിമയിലെ സൂപ്പർതാരം ജോസഫ് വിജയിയും നടി തൃഷ കൃഷ്ണനും എത്തിയത് സോഷ്യൽ മീഡിയയിൽ വലിയ ചർച്ചയായിരിക്കുകയാണ്. ഇരുവരും ഒരുമിച്ചെത്തിയ ചിത്രങ്ങളും വീഡിയോകളും നിമിഷനേരം കൊണ്ടാണ് ആരാധകർക്കിടയിൽ ശ്രദ്ധിക്കപ്പെട്ടത്.
ഈ ചടങ്ങിൽ അതിസുന്ദരിയായ തൃഷയെ കണ്ടപ്പോൾ മാലാഖയെപ്പോലെ തോന്നിക്കുന്നുവെന്നാണ് ആരാധകർ സോഷ്യൽ മീഡിയയിലൂടെ അഭിപ്രായപ്പെടുന്നത്. പിങ്ക് നിറത്തിലുള്ള നെറ്റ് സാരിയിൽ അതീവ സുന്ദരിയായാണ് താരം പ്രത്യക്ഷപ്പെട്ടത്. പ്രശസ്തമായ റൂഷ് (Rouje) ബ്രാൻഡിന്റെ ഈ സാരിക്ക് ഏകദേശം 80,000 രൂപയാണ് വിലയെന്നാണ് ഔദ്യോഗിക വെബ്‌സൈറ്റുകളിൽ നിന്ന് അറിയാൻ കഴിയുന്നത്. പൗഡർ പിങ്ക് ട്യൂൾ (tulle) സാരിയിൽ ചെയ്തിരിക്കുന്ന സൂക്ഷ്മമായ ഹാൻഡ് എംബ്രോയ്ഡറി എടുത്തുപറയേണ്ടതാണ്. സീക്വൻസുകളും മുത്തുകളും ക്രിസ്റ്റലുകളും കൊണ്ട് അലങ്കരിച്ച ബോർഡറുകൾ ഈ വസ്ത്രത്തിന് പ്രത്യേക ഭംഗി നൽകുന്നു. സാരിയുടെ പല്ലു ഭാഗത്തായി നൽകിയിരിക്കുന്ന ടസലുകൾ ഇതിന് കൂടുതൽ ആകർഷണീയത പകരുന്നുണ്ട്.
സാരിക്ക് അനുയോജ്യമായ രീതിയിൽ തുന്നിച്ചേർത്ത എംബ്രോയ്ഡറി ചെയ്ത ബ്ലൗസാണ് തൃഷ ധരിച്ചിരുന്നത്. ബ്ലൗസിന്റെ അരക്കെട്ട് ഭാഗത്ത് ടസലുകളും സ്ലീവുകളിൽ ആകർഷകമായ തൂവലുകളും പിടിപ്പിച്ചിട്ടുണ്ട്. ഹെവി ചോക്കറും അതിന് ഇണങ്ങുന്ന കമ്മലുകളും താരത്തിന്റെ വേഷത്തിന് പൂർണ്ണത നൽകി. പിങ്ക് ഷേഡിലുള്ള ബ്ലഷ്, തിളക്കമാർന്ന ലിപ്സ്റ്റിക്, ഐഷാഡോ എന്നിവ ഉപയോഗിച്ചുള്ള മേക്കപ്പ് തൃഷയുടെ ലുക്കിനെ കൂടുതൽ മനോഹരമാക്കി. സോഫ്റ്റ് വേവ്‌സ് ഹെയർ സ്‌റ്റൈൽ കൂടി ആയതോടെ താരത്തിന്റെ രൂപം ഏറെ ശ്രദ്ധേയമായി.
