അർധ സെഞ്ചറിയും സെഞ്ചറിയും വിജയവും നേടിയത് സിക്സറുകൾ തൂക്കി, 15,000 റൺസ് ക്ലബ്ബിൽ സച്ചിനെ പിന്നിലാക്കി; കാര്യവട്ടത്തെ കോലീശ്വരൻ!

തിരുവനന്തപുരം∙ കാര്യവട്ടത്ത് ആരാധകർക്കായി സൂപ്പർ താരം വിരാട് കോലിയുടെ ബാറ്റിങ് വിരുന്ന്. വെസ്റ്റിൻഡീസിനെതിരായ ആദ്യ ഏകദിനത്തിൽ ഇന്ത്യ വമ്പൻ വിജയം നേടിയപ്പോൾ, വിരാട് കോലിയുടെ ചരിത്ര നേട്ടം ആരാധകർക്ക് ഇരട്ടിമധുരമായി. ഏകദിന ഫോർമാറ്റിൽ വേഗതയേറിയ 15000 റൺസെന്ന റെക്കോർഡാണ് വിരാട് കോലി മലയാളി ആരാധകരെ സാക്ഷിയാക്കി സ്വന്തം പേരിലാക്കിയത്. 303 ഇന്നിങ്സുകളിൽനിന്നാണ് കോലി ഈ നേട്ടത്തിലെത്തിയത്. പിന്നിലാക്കിയത് ഇതിഹാസ താരം സച്ചിൻ തെൻഡുൽക്കറെ. 15,000 റൺസ് തികയ്ക്കാൻ സച്ചിൻ തെൻഡുൽക്കർക്ക് 377 ഇന്നിങ്സുകളാണു വേണ്ടിവന്നത്. 2007 ജൂണില്‍ ബെൽഫാസ്റ്റിൽ ദക്ഷിണാഫ്രിക്കയ്ക്കെതിരെയായിരുന്നു സച്ചിൻ 15,000 റൺസ് പിന്നിട്ടത്.ഗ്രീന്‍ഫീല്‍ഡ് സ്റ്റേഡിയത്തിൽ പുറത്താകാതെനിന്ന താരം 88 പന്തുകളിൽ 139 റൺസ് സ്കോർ ചെയ്തു. കാര്യവട്ടത്ത് 74 പന്തുകളിൽനിന്നാണ് കോലി സെഞ്ചറിയിലെത്തിയത്. അൽസാരി ജോസഫിന്റെ 27–ാം ഓവറിലെ ആദ്യ പന്തിൽ സിക്സടിച്ചായിരുന്നു കോലി 50 തികച്ചത്. 40 പന്തിൽ അർധ സെഞ്ചറിയിലെത്തിയ കോലി, പിന്നീടുള്ള 34 പന്തുകളിൽ 100 കടന്നു. സ്കോർ 94 ൽ നിൽക്കെ വിൻഡീസ് സ്പിന്നർ ഗുഡകേഷ് മോട്ടിയുടെ 38–ാം ഓവറിലെ നാലാം പന്ത് സിക്സർ തൂക്കിയ കോലി ഏകദിന ഫോർമാറ്റിലെ 55–ാം സെഞ്ചറിയും രാജ്യാന്തര ക്രിക്കറ്റിലെ 86–ാം സെഞ്ചറിയും സ്വന്തം പേരിലാക്കി. സെഞ്ചറിയിലെത്താൻ കോലി ബൗണ്ടറി കടത്തിയത് ആറു വീതം സിക്സുകളും ഫോറുകളുമായിരുന്നു. 


Auto ⏭️