ട്രെയിനിൽ വിളമ്പിയ ഭക്ഷണത്തിൽ പാറ്റ; റെയിൽവേ നടപടിക്ക് പിന്നിൽ യാത്രികന്റെ പരാതി
ന്യൂഡൽഹി: ഗുവാഹത്തി-ഓഖ ദ്വാരക എക്സ്പ്രസിൽ യാത്ര ചെയ്ത യാത്രക്കാരന് ലഭിച്ച ഭക്ഷണത്തിൽ ലോഹക്കഷണം കണ്ടെത്തിയ സംഭവത്തിൽ കർശന നടപടിയുമായി റെയിൽവേ അധികൃതർ. അമിത് അവസ്തി എന്ന യാത്രക്കാരനാണ് ട്രെയിനിൽ വിളമ്പിയ ഭക്ഷണത്തിൽ നിന്നും ലോഹത്തിന്റെ അംശം ലഭിച്ചതിനെ തുടർന്ന് അധികൃതർക്ക് പരാതി നൽകിയത്. വിഷയത്തിൽ റെയിൽവേ കേറ്ററിങ് ആൻഡ് ടൂറിസം കോർപറേഷൻ (IRCTC) ഇടപെടുകയും, ട്രെയിനിൽ ഭക്ഷണവിതരണ ചുമതല വഹിച്ചിരുന്ന കരാറുകാരനെതിരെ നടപടി സ്വീകരിക്കുകയും ചെയ്തു.
ഭക്ഷണത്തിനുള്ളിൽ നിന്നും ലോഹക്കഷണം ലഭിച്ചതിന്റെ ദൃശ്യങ്ങൾ യാത്രക്കാരൻ തന്നെ സമൂഹമാധ്യമങ്ങളിൽ പങ്കുവെച്ചിരുന്നു. പാത്രം കഴുകാൻ ഉപയോഗിക്കുന്ന സ്‌ക്രബ്ബറിന്റെ ഒരു ചെറിയ ഭാഗമാണ് ഭക്ഷണത്തിൽ നിന്നും കണ്ടെടുത്തത്. ഭക്ഷണത്തിന്റെ പകുതി ഭാഗത്തോളം കഴിച്ച ശേഷമാണ് ഇതിൽ ലോഹക്കഷണം ശ്രദ്ധയിൽപ്പെട്ടതെന്നും, ഇതിനകം എന്തെങ്കിലും ഉള്ളിലേക്ക് പോയിട്ടുണ്ടാകുമോ എന്ന ആശങ്കയുണ്ടെന്നും അമിത് തന്റെ എക്സ് (ട്വിറ്റർ) അക്കൗണ്ടിലൂടെ വ്യക്തമാക്കിയിരുന്നു.
സംഭവം അറിഞ്ഞ ഉടൻ തന്നെ ഭക്ഷണം വിതരണം ചെയ്ത ജീവനക്കാരൻ യാത്രക്കാരനോട് മാപ്പ് അപേക്ഷിക്കുകയും, പകരമായി മറ്റൊരു ഭക്ഷണം നൽകാനോ പണം തിരികെ നൽകാനോ തയ്യാറാവുകയും ചെയ്തു. എന്നാൽ, ഇതിന് വഴങ്ങാതെ യാത്രക്കാരൻ ഔദ്യോഗികമായി പരാതി നൽകാൻ തീരുമാനിക്കുകയായിരുന്നു. യാത്രക്കാരന്റെ പരാതിയുടെ അടിസ്ഥാനത്തിൽ കരാറുകാരനെതിരെ കൃത്യമായ നടപടി കൈക്കൊണ്ടതായി ഐആർസിടിസി ഔദ്യോഗികമായി സ്ഥിരീകരിച്ചു.
