ഓപ്പറേഷൻ തൂഫാൻ: 15697 പേർ അറസ്റ്റിൽ, 14544 കേസുകൾ രജിസ്റ്റർ ചെയ്തു
തിരുവനന്തപുരം: സംസ്ഥാനത്ത് ലഹരിക്കെതിരെ കേരള പോലീസ് ശക്തമായി തുടരുന്ന ‘ഓപ്പറേഷൻ തൂഫാൻ’ മിന്നൽ പരിശോധനകളിൽ ഇതുവരെ പിടിയിലായത് 15,697 പേർ. ഏറ്റവും പുതിയ കണക്കുകൾ പ്രകാരം 43 കേസുകൾ കൂടി രജിസ്റ്റർ ചെയ്യുകയും 44 പേരെ കൂടി പിടികൂടുകയും ചെയ്തതോടെ ആകെ കേസുകളുടെ എണ്ണം 14,544 ആയി ഉയർന്നു. പരിശോധനകൾക്കിടെ ഇതുവരെയായി 28,722.706 ഗ്രാം എം.ഡി.എം.എയും 2,004.477 കിലോഗ്രാം കഞ്ചാവുമാണ് പോലീസ് പിടിച്ചെടുത്തിട്ടുള്ളത്.
കഴിഞ്ഞ ദിവസം രജിസ്റ്റർ ചെയ്ത കേസുകളിൽ ലഹരിമരുന്നിന്റെ അളവ് അടിസ്ഥാനമാക്കി വിവിധ നിയമനടപടികളാണ് സ്വീകരിച്ചത്. ഇതിൽ ചെറിയ അളവിൽ മയക്കുമരുന്ന് കൈവശം വെച്ചതിന് 20 കേസുകളും, ഇടത്തരം അളവിലുള്ളതിന് രണ്ട് കേസുകളും ചാർജ് ചെയ്തു. ഇതിനുപുറമെ, എൻ.ഡി.പി.എസ് നിയമപ്രകാരം 21 കേസുകളും കോട്പ നിയമപ്രകാരം 29 കേസുകളും എടുത്തിട്ടുണ്ട്. ഇവരിൽ നിന്ന് 2.220 ഗ്രാം എം.ഡി.എം.എയും 2.851 കിലോഗ്രാം കഞ്ചാവും കണ്ടെടുക്കുകയുണ്ടായി. ഓപ്പറേഷൻ തൂഫാന്റെ ഭാഗമായി ജനങ്ങളെ ബോധവൽക്കരിക്കുന്നതിനും പോലീസ് പ്രത്യേക ഊന്നൽ നൽകുന്നുണ്ട്. ഇന്നലെ മാത്രം സംസ്ഥാനത്തുടനീളം 34 ബോധവൽക്കരണ ക്ലാസുകളാണ് സംഘടിപ്പിച്ചത്. ഇത്തരത്തിൽ ഇതുവരെ 11,972 ക്ലാസുകളും 1,106 കൗൺസിലിംഗ് സെഷനുകളും പൂർത്തിയാക്കി. കൂടാതെ, സ്കൂൾ, കോളേജ് പ്രൊട്ടക്ഷൻ ഗ്രൂപ്പുകളുടെ മേൽനോട്ടത്തിൽ 8,211 ബോധവൽക്കരണ പരിപാടികളും നടത്തിവരുന്നു.
ലഹരി കടത്തുകയോ വിൽപന നടത്തുകയോ ചെയ്യുന്നതിനെക്കുറിച്ച് എന്തെങ്കിലും വിവരങ്ങൾ ലഭിക്കുകയാണെങ്കിൽ പൊതുജനങ്ങൾക്ക് നേരിട്ട് 9497979794, 9497927797 എന്നീ നമ്പറുകളിലോ വാട്സാപ്പ് വഴിയോ 9995966666 എന്ന നമ്പറിലോ അധികൃതരെ അറിയിക്കാവുന്നതാണ്. വിവരം നൽകുന്നവരുടെ പേരുവിവരങ്ങൾ പൂർണ്ണമായും രഹസ്യമായി സൂക്ഷിക്കുമെന്ന് കേരള പോലീസ് വ്യക്തമാക്കിയിട്ടുണ്ട്.
