ഗൾഫ് മേഖലയിൽ യുദ്ധഭീതി ഒഴിഞ്ഞു; ഉപരോധം അവസാനിപ്പിച്ചതായി പ്രഖ്യാപനം, പ്രവാസികൾക്ക് വലിയ ആശ്വാസം

റിയാദ്∙ മാസങ്ങളായി പശ്ചിമേഷ്യയിൽ നിഴലിച്ചുനിന്നിരുന്ന യുദ്ധഭീതിക്ക് അറുതിവരുത്തിക്കൊണ്ട് ഇറാനെതിരെയുള്ള യുഎസ് നാവിക ഉപരോധം പൂർണ്ണമായും അവസാനിച്ചു. മേഖലയിലെ സംഘർഷ സാധ്യതകൾ ലഘൂകരിക്കുന്ന പുതിയ രാജ്യാന്തര നീക്കങ്ങൾ, ഗൾഫ് രാജ്യങ്ങളിൽ കഴിയുന്ന ലക്ഷക്കണക്കിന് മലയാളി പ്രവാസികൾ ഉൾപ്പെടെയുള്ള വിദേശി സമൂഹത്തിന് വലിയ പ്രതീക്ഷയും ആശ്വാസവുമാണ് പകരുന്നത്.ഇറാനും അമേരിക്കയും ഒപ്പുവെച്ച ചരിത്രപരമായ ഇസ്​ലാമാബാദ് ധാരണാപത്രത്തിന്റെ അടിസ്ഥാനത്തിലാണ് പുതിയ സംഭവവികാസങ്ങൾ. യുദ്ധം അവസാനിച്ചതായി പാക്കിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് പ്രഖ്യാപിച്ചതും, ഉപരോധം നീക്കുന്നത് സ്ഥിരീകരിച്ചുകൊണ്ടുള്ള അമേരിക്കൻ പ്രസിഡന്റ് ഡോണൾഡ് ട്രംപിന്റെ പ്രതികരണവും സമാധാന ചർച്ചകൾക്ക് വേഗം കൂട്ടിയിട്ടുണ്ട്. കരാർ പ്രകാരം മുപ്പത് ദിവസത്തിനകം ഉപരോധങ്ങൾ പൂർണ്ണമായി നീക്കണമെന്ന വ്യവസ്ഥ അമേരിക്ക നടപ്പിലാക്കിയതോടെയാണ് ഗൾഫ് മേഖലയിലെ വ്യോമ-നാവിക പാതകൾ വീണ്ടും സുരക്ഷിതമായത്.ഹോർമുസ് കടലിടുക്കിലെ സുരക്ഷ ഉറപ്പാക്കുന്നതിനൊപ്പം, കഴിഞ്ഞ ദിവസങ്ങളിൽ ബഹ്റൈനിലെയും കുവൈത്തിലെയും യുഎസ് താവളങ്ങൾക്ക് നേരെ നടത്തിയ ആക്രമണങ്ങൾ വെടിനിർത്തൽ ലംഘനത്തിനുള്ള മറുപടിയായിരുന്നുവെന്നും ഇറാൻ വ്യക്തമാക്കുന്നു. ഏതായാലും, വൻശക്തികൾ തമ്മിലുള്ള ചർച്ചകൾ ലക്ഷ്യം കാണുന്നതോടെ മേഖലയിൽ പുകയുന്ന യുദ്ധമേഘങ്ങൾ ഒഴിഞ്ഞുമാറുമെന്ന ഉറപ്പിലാണ് പശ്ചിമേഷ്യയിലെ ബിസിനസ് മേഖലയും പ്രവാസി സമൂഹവും.


Source link