ദേശീയപാത വികസനം: നിർമാണം പൂർത്തിയായാൽ യാത്രാസമയം കുറയുമോ? നാട്ടുകാരുടെ പ്രതീക്ഷകൾ ഇങ്ങനെ
ആലപ്പുഴ ∙ ‘പണി പൂർത്തിയായിക്കഴിഞ്ഞാൽ പിന്നെ എന്ത് സുഖമായിരിക്കും ഈ വഴിയിലൂടെയുള്ള യാത്ര’ – ദേശീയപാതയിലൂടെ കടന്നുപോകുന്ന ഓരോ യാത്രികന്റെയും മനസ്സിൽ ഇപ്പോൾ ഇങ്ങനെ ഒരു ചിന്തയുണ്ടാകും. എന്നാൽ, കരുതുന്നത് പോലെ അത്രമേൽ സുരക്ഷിതവും സുഗമവുമായിരിക്കുമോ ഈ യാത്ര? തുറവൂർ മുതൽ പറവൂർ വരെയുള്ള ഭാഗത്തെ നിർമാണപ്രവർത്തനങ്ങൾ ദ്രുതഗതിയിൽ പുരോഗമിക്കുന്ന സാഹചര്യത്തിൽ, പലയിടത്തും മേൽപാതയിലൂടെയുള്ള ഗതാഗതം ഇതിനകം സാധ്യമായിട്ടുണ്ട്. വിവിധ സ്ഥലങ്ങളിൽ മുന്നറിയിപ്പ് ബോർഡുകളും സുരക്ഷാ സംവിധാനങ്ങളും സ്ഥാപിച്ചു തുടങ്ങിയെങ്കിലും, യാത്രക്കാരുടെ ആശങ്കകൾക്കും സംശയങ്ങൾക്കും ഇപ്പോഴും കുറവില്ല.
സുരക്ഷാക്രമീകരണങ്ങളിലെ പോരായ്മകൾ തന്നെയാണ് പ്രധാന വിഷയം. താൽക്കാലികമായി വാഹനങ്ങൾക്ക് സഞ്ചരിക്കാൻ അനുമതി നൽകിയിട്ടുള്ള ദേശീയപാതയുടെ പല ഭാഗങ്ങളിലും വേണ്ടത്ര സുരക്ഷാ ക്രമീകരണങ്ങൾ ഏർപ്പെടുത്തിയിട്ടില്ലെന്ന ആക്ഷേപം ശക്തമാണ്. മേൽപാതയുടെ മുകളിൽ ബസ് നിർത്തുന്നതും, വിദ്യാർഥികളടക്കമുള്ളവർ ബസിറങ്ങുന്നതും കയറുന്നതും വലിയ അപകടഭീഷണി ഉയർത്തുന്നുണ്ട്. കാൽനടയാത്രക്കാരെയും ഈ പാതയിൽ അങ്ങിങ്ങായി കാണാൻ കഴിയുന്നു. ജില്ലയിലൂടെ കടന്നുപോകുന്ന ദേശീയപാതയുടെ ഭൂരിഭാഗം ഇടങ്ങളിലും പ്രധാനപാത ഉയരത്തിലും സർവീസ് റോഡുകൾ താഴ്ന്നുമാണ് സ്ഥിതി ചെയ്യുന്നത്.
നഗരപ്രവേശനം കൂടി സാധ്യമാകുന്നതോടെ ഈ ഭാഗങ്ങളിലെ തിരക്ക് നിയന്ത്രിക്കാൻ കഴിയാത്തവിധം വർധിക്കുമെന്നാണ് വിലയിരുത്തൽ. ഇവിടെ ഇറങ്ങാൻ സാധിച്ചില്ലെങ്കിൽ, നിലവിലെ നിർമാണരീതി അനുസരിച്ച് കൊമ്മാടിയിൽ നിന്ന് ആലപ്പുഴ ബൈപാസിലേക്ക് വാഹനം പ്രവേശിക്കും. പിന്നീട് കിലോമീറ്ററുകൾ താണ്ടി കളർകോട് ജംക്‌ഷൻ കടന്നാൽ മാത്രമേ ദേശീയപാതയിൽ നിന്ന് പുറത്തിറങ്ങാൻ കഴിയൂ. സമാനമായ അവസ്ഥയാണ് ആലപ്പുഴ നഗരത്തിൽ നിന്ന് ദേശീയപാതയിലേക്ക് പ്രവേശിക്കാൻ ആഗ്രഹിക്കുന്നവർക്കും നേരിടേണ്ടി വരിക; അവർക്ക് തുമ്പോളിയിലെ പടിഞ്ഞാറ് വശത്തുള്ള എൻട്രി പോയിന്റ് വഴി മാത്രമേ കയറാൻ സാധിക്കൂ. അവിടത്തെ സർവീസ് റോഡിന്റെ വീതിക്കുറവും വലിയൊരു പ്രതിസന്ധിയായി തുടരുന്നു.
